CNA၊ဂူးဂူး။
ဂွမြို့နယ်အတွင်း က ကုလားပြင်ကျေးရွာ (ရတနာမြိုင်)တိုက်ပွဲအတွင်းမှာ ဝင်ရောက်တိုက်ခိုက်နေကြရတဲ့ စစ်ကောင်စီတပ်သားတွေဟာ အာရက္ခတပ်တော် ရဲ့ ထိုးစစ်ကို ခုခံတိုက်ခိုက်မှု မလုပ်ရဲတော့တာကြောင့် ထွက်ပြေးနေကြတယ်လို့ ဒေသတွင်း သတင်းအရင်းမြစ်ကပြောပါတယ်။
အာရက္ခတပ်တော် ရဲ့ ထိုးစစ်ဟာ ကုလားပြင်( ရတနာမြိုင်)ကျေးရွာအတွင်းကို ပြီးခဲ့တဲ့ အောက်တိုဘာလ ၈ ရက်နေ့ကတည်းကပင် ဝင်ရောက်တိုက်ခိုက်ခဲ့တာဖြစ်ပြီး လက်ရှိမှာလည်း အာရက္ခတပ်တော် နဲ့ စစ်ကောင်စီတို့ဟာ နှစ်ဖက်တိုက်ပွဲတွေ ဆက်လက် ဖြစ်ပွါးနေဆဲဖြစ်ပါတယ်။
အဲဒီလိုတိုက်ပွဲ ဖြစ်ပွါးနေတာ နဲ့ အတူ စစ်ကောင်စီတပ်သားတွေဟာ အေအေ ရဲ့ ထိုးစစ်ကို မခုခံနိုင်တော့တာကြောင့် ကုလားပြင်(ရတနာမြိုင်) ကျေးရွာ အတွင်းကနေ ထွက်ပြေးနေကြတာ ဖြစ်တယ်လို့ ဒေသသတင်းအရင်းမြစ်ကပြောပါတယ်။
“စစ်ကောင်စီတပ်သားတွေ ထွက်ပြေးနေကြတယ်။မနိုင်မှန်း သိသိနဲ့ ငါတို့ကို အတင်းတိုက်ခိုင်းနေတာ ငါလိုးမသားတွေလို့ အော်ပြီးတော့ ပြောကြတယ်။ခုခံပြီးတော့ တိုက်နေတဲ့ သူတွေလည်းရှိတယ်။ဒါပေမယ့် ပြေးတဲ့သူတွေတော့ များနေတယ်လို့”သူကပြောပါတယ်။
အဲဒီလို ထွက်ပြေးသွားတဲ့ စစ်ကောင်စီတပ်သားတွေဟာ ကြွေချိုင်ကမ်းခြေဘက်ကို ထွက်ပြေးသွားကြတာ ဖြစ်တယ်လို့ဒေသသတင်းအရင်းအမြစ်ကပြောပါတယ်။
အာရက္ခတပ်တော် အေအေ အနေ နဲ့ လက်ရှိမှာ ကုလားပြင်(ရတနာမြိုင်)ရဲစခန်းကို အပြီးသတ်သိမ်းပိုက်ထားနိုင်ပြီးဖြစ်သလို စစ်ကောင်စီရဲ့ လက်ကျန်တပ်သားတွေကို လိုက်လံရှင်းလင်းတာတွေကို လုပ်ဆောင်နေပြီးဖြစ်တယ်လို့လည်း ဒေသ သတင်းအရင်းအမြစ်ကပြောပါတယ်။
“အခုက လက်ကျန်တပ်သားတွေကိုရှင်းလင်းနေတယ်။ဈေးနားမှာ တိုက်ပွဲက ဆက်ဖြစ်နေတယ်။စစ်ကောင်စီကလည်းလေကြောင်းက မကြာခဏဆိုသလိုမျိုးလာပစ်နေတာ ရှိတယ်။ကျေးရွာထဲက အိမ်တွေကိုလည်း လက်နက်ကြီးတွေထိတယ်။အိမ်တွေလည်း တော်တော်ပျက်စီးသွားကြပြီးဖြစ်တယ်လို့”သူကပြောပါတယ်။
အာရက္ခတပ်တော် အေအေ အနေ နဲ့ ဂွမြို့နယ်၊ကျိန္တလီမြို့ အတွင်းက ကိုင်းခုန် နဲ့ကံဂေါ်တောင်က စစ်ကောင်စီတပ်စခန်းတွေကိုလည်း အောက်တိုဘာလ (၆) ရက်နေ့မှာ အပြီးသတ်သိမ်းပိုက်ထားနိုင်ခဲ့ပြီးဖြစ်ပါတယ်။
လက်ရှိမှာ ဂွမြို့နယ် တစ်ခုလုံးကို အပြီးသတ်သိမ်းပိုက်ရရှိနိုင်ဖို့အတွက် ဂွမြို့နယ်အတွင်းက စစ်ကောင်စီတပ်စခန်းတွေကို ဆက်လက်ထိုးစစ်ဆင်တိုက်ခိုက်သွားမယ်လို့ သတင်းထုတ်ပြန်ပြောဆိုထားပါတယ်။
