မာန်အောင်မြို့နယ် အပါအဝင် ရခိုင်ကမြို့နယ် တော်တော်များများမှာ ပြီးခဲ့တဲ့ ရက်ပိုင်းကတည်းကပင် ဖုန်းလိုင်း နဲ့ အင်တာနက်လိုင်းတွေ ပြတ်တောက်သွားခဲ့ရပြီးမိသားစုဝင်တွေ နဲ့ အဆက်အသွယ်မရ ဖြစ်နေကြရတယ်လို့ ပြည်ပရောက် ရခိုင်ဒေသခံတွေဆီက သိရပါတယ်။
ရခိုင်ပြည်အတွင်က မြောက်ပိုင်းမြို့နယ်အများစုကိုတော့ ရခိုင်တကျော့ပြန်တိုက်ပွဲ စတင်ချိန်ကတည်းကပင် စစ်ကောင်စီက ဖုန်းလိုင်း အင်တာနက်လိုင်းတွေကို ဖြတ်တောက်ထားတာတွေ ရှိခဲ့ပါတယ်။
ဒါပေမယ့် ရခိုင်တောင်ပိုင်းက မြို့နယ်တွေဖြစ်ကြတဲ့ ကျောက်ဖြူ၊မာန်အောင်၊တောင်ကုတ်၊အမ်း၊သံတွဲ၊ဂွ၊ရမ်းဗြဲ စတဲမြို့နယ်တွေ မှာတော့ ဖုန်းလိုင်းအင်တာနက်လိုင်းတွေ ဟာ ပြတ်တောက်တာတွေ မရှိခဲ့ဘဲ အတော်အသင့် ရရှိခဲ့တာတွေ ရှိခဲ့ပါတယ်။
အဲဒီနောက် အောက်တိုဘာလ ၁၂ ရက်နေ့ကတည်းကပင် မာန်အောင် ၊ရမ်းဗြဲ နဲ့ ကျောက်ဖြူမြို့နယ်တွေမှာ အင်တာနက်လိုင်းတွေ အပြင် ဖုန်းလိုင်းတွေပါ လုံးဝပြတ်တောက်သွားခဲ့ရတယ်လို့ ရန်ကုန်ကို ရောက်နေတဲ့ မာန်အောင်ဒေသခံ တစ်ဦးကပြောပါတယ်။
“နယ်ကရွာတွေကို ဖုန်းဆက်မရတာတော့ ၄ ရက်လောက်ရှိပြီး အဲဒီအချိန်မှာ မြို့ပေါ်ရပ်ကွက်တွေကိုတော့ ဆက်လို့ ရသေးတယ်။ ၁၃ ရက်နေ့ည ၈ နာရီ နောက်ပိုင်းမှာတော့ ဘယ်ကိုမှ ဖုန်းဆက်မရတော့ဘူး။ဖုန်းလိုင်းတွေအကုန်ပြတ်သွားတာ ။အခုကလည်း မာန်အောင်ကို ဗုံးကြဲခံရတယ် ဘာညာဆိုပြီး သတင်းတွေကလည်းထွက်နေတော့ မိသားစုတွေကို တော်တော်စိုးရိမ်နေတယ်လို့”သူကပြောပါတယ်။
အဲဒီလိုပဲ ကျောက်ဖြူမြို့နယ် အတွင်းမှာလည်း ပြီးခဲ့တဲ့ အောက်တိုဘာလ ၁၂ ရက်နေ့ ကတည်းကပင် ဖုန်းလိုင်းအင်တာနက်လိုင်းတွေဟာ တစ်မြို့နယ်လုံး ပြတ်တောက်သွားခဲ့ရတယ်လို့ ပြည်ပကို ရောက်နေတဲ့ ကျောက်ဖြူဒေသခံ တစ်ဦးကပြောပါတယ်။
“ကျောက်ဖြူကိုတော့ စနေနေ့ ၁၂ ရက်နေ့ကတည်းကပင် ဖုန်းဆက်သွယ်လို့ မရတော့ဘူး။ဘာကြောင့် ပြတ်တာလည်း ဆိုတာတော့ ကျနော်လည်း မသိဘူး။ဖုန်းဆက်မရတာတော့ ကျောက်ဖြူတစ်မြို့လုံးက လူတွေကို ဖုန်းဆက်မရတာဖြစ်တယ်လို့”သူကပြောပါတယ်။
အခုလို ဖုန်းလိုင်း အင်တာနက်လိုင်းတွေ ပြတ်တောက်သွားတာ နဲ့အတူ မာန်အောင်မြို့ကို ဗုံးကြဲခံရတယ်ဆိုတဲ့ ကောလဟာလသတင်းတွေ ထွက်ပေါ်လာတာကြောင့် ပြည်ပကို ရောက်နေတဲ့ ဒေသခံ ပြည်သူတွေ အနေ နဲ့ မာန်အောင်မှာ ကျန်နေခဲ့ကြတဲ့မိသားစုဝင်တွေကို စိုးရိမ်နေကြရတယ်လို့ ပြည်ပကိုရောက်နေတဲ့ မာန်အောင်ဒေသခံတွေကပြောပါတယ်။
Coastal News Agency သတင်း ဌာန အနေ နဲ့ မာန်အောင် မှာဗုံးကြဲခံရတယ်ဆိုတဲ့ သတင်းကို အတည်ပြုနိုင်ဖို့ အတွက် ဒီနေ့ မနက်ပိုင်းကတည်းကပင် ဒီနေ့ ညနေ ၃ နာရီကျော်ထိ ဖုန်းဆက်သွယ်နေပေမယ့် ဒေသခံတွေကို ဖုန်းဆက်သွယ်လို့ မရခဲ့ပါဘူး။အဲဒီလိုပဲ ကျောက်ဖြူမြို့နယ် အတွင်းက ဒေသခံတွေကို ဖုန်းဆက်သွယ်ခဲ့ပေမယ့် ဖုန်းအဆက်အသွယ် လုံးဝမရရှိခဲ့ပါဘူး။
အဲဒီလို မာန်အောင်၊ကျောက်ဖြူ နဲ့ ရမ်းဗြဲ စတဲ့ မြို့နယ် ၃ ခု လုံးမှာ ဖုန်းလိုင်း အင်တာနက်လိုင်းတွေပါ ပြတ်တောက် နေပေမယ့် တောင်ကုတ်၊သံတွဲ နဲ့ ဂွမြို့နယ် အတွင်းက နေရာ တချို့မှာတော့ ဖုန်းလိုင်း ရရှိကာ အဆက်အသွယ်ရရှိနေဆဲဖြစ်ပါတယ်။
