CNA၊ ဂူးဂူး။
တောင်ကုတ်မြို့နယ် အတွင်းက ပေါက်အင်းကျေးရွာကို စစ်ကောင်စီက မနေ့ကအောက်တိုဘာလ ၁၄ ရက်နေ့ညနေက လေကြောင်းတိုက်ခိုက်မှု လုပ်ဆောင်ခဲ့တာကြောင့် ဒေသခံ ၃ ဦးကို ထိမှန်ကာ အပြင်းအထန် ဒဏ်ရာ ရရှိခဲ့ရတယ်လို့ ဒေသခံတွေဆီက သိရပါတယ်။
ဒဏ်ရာ ရရှိသွားတဲ့ ဒေသခံ ၃ ဦးမှာ ပေါက်အင်းကျေးရွာက အသက် ၃၉ နှစ်အရွယ်ဒေါ်ခင်မြင့်ဝေ၊အသက် ၆၁ နှစ်အရွယ် ဒေါ်သန်းသန်းမြိုင် နဲ့ အသက် ၄၇ နှစ်အရွယ် ဦးလှထွန်းကျော်တို့ ဖြစ်ကြတယ်လို့ ဆိုပါတယ်။
စစ်ကောင်စီက အဲဒီကျေးရွာကို တိုက်ပွဲတစ်စုံတရာ ဖြစ်ပွါးတာ မရှိပဲ အခုလို လေကြောင်းကနေလာရောက် တိုက်ခိုက်ခဲ့တာ ဖြစ်တယ်လို့ ဒေသခံ တစ်ဦးကပြောပါတယ်။
“ညနေ ၄ နာရီကျော်လောက်မှာ လာပြီးတော့ ဗုံးကြဲတိုက်ခိုက်တာပါ စစ်ကောင်စီက တိုက်ပွဲမရှိပဲ ဒီအတိုင်း ဘုန်းကြီးကျောင်းအနီးဝန်းကျင်းကို လေကြောင်းက လာတိုက်ခိုက်ခဲ့တာ။နေအိမ်တွေ ဘုန်းကြီးကျောင်းတွေ လည်းပျက်စီးသွားခဲ့ရပါတယ်လို့”သူကပြောပါတယ်။
တောင်ကုတ်မြို့နယ် အတွင်းမှာ စစ်ကောင်စီနဲ့ အာရက္ခတပ်တော် အေအေတို့ဟာ နှစ်ဖက်တိုက်ပွဲ အပြင်းအထန် ဖြစ်ပွါးတာ မရှိပေမယ့် စစ်ကောင်စီက လေကြောင်းတိုက်ခိုက်မှုတွေ မကြာခဏဆိုသလို လုပ်ဆောင်နေတာကြောင့် ဒေသခံတွေ ထိခိုက်သေဆုံးဒဏ်ရာ ရတာတွေ များစွာရှိနေရတယ်လို့လည်းဆိုပါတယ်။
လက်ရှိမှာလည်း စစ်ကောင်စီဟာ တောင်ကုတ်မြို့နယ် အတွင်းကို ဖုန်းလိုင်းအင်တာနက်လိုင်းတွေ ဖြတ်တောက်ကာ တောင်ကုတ်မြို့နယ် အတွင်းက ကျေးရွာတွေကို စစ်ကြောင်းထိုးဝင်ရောက်စစ်ဆေးတာတွေကိုလည်း လုပ်ဆောင်တာတွေ ရှိနေတယ်လို့ တောင်ကုတ်မြို့ခံ တစ်ဦးကပြောပါတယ်။
“အခု ဖုန်းလိုင်းက တောင်ကုတ်တစ်မြို့လုံးဖြတ်တောက်ခံထားရတယ်။ဖုန်းတချို့ကပဲ ဖုန်းပြောလို့ ရတာ အခုက ဒီရက်ပိုင်းမှာတော့ စစ်ကောင်စီက ဒုံ၊ ကိုင်းရှည်၊ နတ်မော်၊ သလိန်ပြင် နဲ့ တောင်ရွာတွေကို စစ်ကြောင်းထိုးဝင်ရောက်တာရှိတယ်ဒီရက်ပိုင်းမှာ။ဖုန်းလိုင်းအင်တာနက်လိုင်းတွေကိုဖြတ်ပြီးတော့ လုပ်ချင်သလို လုပ်နေတဲ့ သဘောမှာရှိနေတယ်လို့”သူကပြောပါတယ်။
ပြီးခဲ့တဲ့ အောက်တိုဘာလ ၇ ရက်နေ့ကလည်း တောင်ကုတ်မြို့နယ် အတွင်းက တန်းလွဲရွာမမြို့ကို စစ်ကောင်စီက လေကြောင်းတိုက်ခိုက်မှု လုပ်ဆောင်ခဲ့တာကြောင့် ဒေသခံ ၁၅ ဦးထိခိုက်သေဆုံးခဲ့ရသလို ၁၀ ဦးထက်မနည်းတဲ့ ပြည်သူတွေဟာလည်း ထိခိုက်ဒဏ်ရာ ရရှိတာတွေ ရှိခဲ့ပါတယ်။
