CNA ၊ဖီးနစ်။
တောင်ကုတ်မြို့နယ်အတွင်းက LGBT လူငယ်တစ်ဦးအပါအဝင် ဒေသခံ လူငယ် ၃ ဦးပျောက်ဆုံးနေတာဟာ ဒီနေ့ နဲ့ဆိုရင် ၅ ရက်ထိရှိနေပြီးဖြစ်တယ်လို့ ပျောက်ဆုံးနေတဲ့ သူတွေ ရဲ့ မိသားဝင်တွေ နဲ့ နီးစပ်သူတွေဆီက သိရပါတယ်။
ပျောက်ဆုံးနေသူ ၃ ဦးကတော့ တောင်ကုတ်မြို့ ကံပိုင်ရပ်ကွက် ခရေလမ်း မှာနေထိုင်တဲ့ အသက် ၁၆ နှစ်အရွယ် LGBT တစ်ဦးဖြစ်တဲ့ ဖိုးခွား ညီဖြစ်သူ အသက် ၁၃ နှစ်အရွယ် ကံကောင်း ဆိုသူနဲ့ နောက်ထက် အသက် ၁၈ နှစ်အရွယ်လူငယ်တစ်ဦးတို့ ဖြစ်ကြတယ်လို့ ဆိုပါတယ်။.
အဲဒီလူငယ် ၃ ဦးဟာ ပြီးခဲ့တဲ့ အောက်တိုဘာလ ၂၇ ရက်နေ့ နေ့လယ် ၂ နာရီလောက်မှာ သူတို့နေထိုင်ရာ ကံပိုင်ရပ်ကွက်၊ခရေလမ်းမှာ ရှိတဲ့နေ အိမ်ကနေ ပန်းမြောက်တောင် အနီးကို ဟင်းစားရှာဖို့သွားရာကနေ ဒီနေ့အထိအိမ်ပြန်မရောက်လာတော့ပဲ ပျောက်ဆုံးနေတာဖြစ်တယ်လို့ ပျောက်ဆုံးနေတဲ့ ကိုဖိုးခွါးနဲ့ နီးစပ်သူ တစ်ဦးကပြောပါတယ်။
“သူတို့က ဟင်းခူးဖို့ ပန်းမြောက်တောင်ကို သွားတာလို့ သိရတယ်။အဲဒီကတည်းကပင် သူတို့က ပြန်မရောက်လာတော့ဘူး။ပန်းမြောက်တောင်က သူတို့နေတဲ့ နေရာကနေပြီးတော့ရိုးလမ်းအတိုင်ဆိုင်ကယ်နဲ့ သွားရင်တော့ နာရီဝက်လောက်သွားရတယ် ခန့်မှန်းခြေတော ၇ မိုင်လောက်ဝေးမယ်ထင်တယ်လို့ “သူကပြောပါတယ်။
အဲဒီလိုပျောက်ဆုံးနေတဲ့ သူတွေကို လုက်လံရှာဖွေတာတွေ လုပ်နေကြပြီး လက်ရှိမှာ လိုက်လံ ရှာဖွေနေတဲ့ ဖိုးခွား နဲ့ ကံကောင်း တို့ရဲ့ မိခင်ဖြစ်သူ ဒေါ်ခင်ခင်မြဟာလည်း ပျောက်ဆုံးနေတယ်လို့ ဆိုပါတယ်။
“အခုက သူ့သားတွေပျောက်လို့ လိုက်ရှာနေတဲ့ အရီးဒေါ်ခင်ခင်မြကလည်းပျောက်နေတယ်။သွားတာတော့ သူ့ရဲ့သားတွေကို သွားရှာတာ ခလေးတွေက ၂၇ ရက်နေ့မှာ ပျောက်တော့ သူက ၂၈ ရက်နေ့မှာသူ့သားတွေကိုသွားရှာတာ အခုထိသူလည်း ပြန်မရောက် သူ့ကိုလည်းရှာမရ။ဘာများဖြစ်နေကြပြီလည်းဆို တာတော့ အရမ်းစိတ်ပှုမိတယ်လို့”သူကပြောပါတယ်။
တောင်ကုတ်မြို့နယ်အတွင်းမှာ စစ်ကောင်စီတပ်တွေ နဲ့ အာရက္ခတပ်တော်တို့ နှစ်ဖက်စစ်ရေးတင်မာမှုတွေ ရှိနေပြီး စစ်ကောင်စီတပ်တွေကတော့ မြို့တွင်းနေရာတွေက ပြည်သူပိုင်နေအိမ်တွေမှာ တပ်စခန်းချနေထိုင်တာ တောတောင်အနီးဝန်းကျင်တွေမှာ မြေမြှုပ်မိုင်းထောင်တာ အရပ်သားပြည်သူတွေကို ဖမ်းဆီးတာတွေ ကို အရင်ကထက်ပိုမိုလုပ်ဆောင်နေတာတွေရှိနေတယ်လို့ တောင်ကုတ်မြို့ခံတွေက ဆိုပါတယ်။
ဒါအပြင် ဒီရက်ပိုင်းမှာ စစ်ကောင်စီက တောင်ကုတ်မြို့နယ် အတွင်းမှာရှိနေတဲ့ အရပ်သားနေထိုင်ရာကျေးရွာတွေကိုလေကြောင်းပစ်ခတ်တိုက်ခိုက်တာတွေကိုလည်း ဆက်တိုက်လုပ်ဆောင်နေပြီး အရပ်သားပြည်သူသေဆုံးမှုတွေဟာလည်းနေ့စဉ်ရှိနေရပါတယ်။
