CNA၊ဂူးဂူး။
တောင်ကုတ်မြို့နယ် အတွင်းက ပန်းမြောက်တောင် အနီးမှာ စစ်ကောင်စီတပ် နဲ့ အာရက္ခတပ်တော် အေအေတို့ဟာ နှစ်ဖက်တိုက်ပွဲဖြစ်ပွါးနေပြီး စစ်ကောင်စီက လေကြောင်းက ဗုံးကြဲတိုက်ခိုက်တာတွေကို ဆက်တိုက်လုပ်ဆောင်နေတယ်လို့ ဒေသခံ သတင်းအရင်းမြစ်တွေဆီက သိရပါတယ်။
အဲဒီပန်းမြောက်တောင် အနီးမှာ စစ်ကောင်စီတပ်တွေ နဲ့ အာရက္ခတပ်တော်တို့ ဟာ မနေ့က ညနေကတည်းကပင် နှစ်ဖက်ထိတွေ့တိုက်ပွဲတွေ အနည်းငယ် ဖြစ်ပွါးခဲ့တာ ရှိခဲ့ပြီး ဒီနေ့မနက်ပိုင်းမှာလည်း တိုက်ပွဲတွေ ပြန်လည်ဖြစ်ပွါးနေတာ ဖြစ်တယ်လို့ဒေသခံ သတင်းအရင်းမြစ်ကပြောပါတယ်။
“မနေ့က ပန်းမြောက်တောင် အနီးမှာ တိုက်ပွဲ ခဏဖြစ်ပွါးတာ ရှိခဲ့တယ်။ ပန်းမြောက်တောင်မှာက စကစ လက်နက်ကြီးစခန်းရှိတယ် အဲဒီစခန်းကို အာရက္ခတပ်တော်က ဒရုန်းနဲ့ ပစ်လို့ စစ်ကောင်စီတပ်သား ၂ ဦးသေတယ် ပြောတယ်။ဒီနေ့မနက်ပိုင်းမှာလည်း တိုက်ပွဲက ဖြစ်နေ။စစ်ကောင်စီကလည်း လေကြောင်းကလည်း တနေကုန်ပစ်နေတယ်။လက်နက်ကြီးတွေ နဲ့လည်းပစ်နေတယ်လို့”သူကပြောပါတယ်။.
မနေ့က ထိတွေ့တိုက်ပွဲ ဖြစ်ပွါးပြီးကတည်းကပင် တောင်ကုတ်မြို့ စစ်ကောင်စီအခြေစိုက် စကခ – ၅ ကလက်နက်ကြီးတွေ နဲ့ပစ်ခတ်တာတွေကို ဆက်တိုက် လုပ်ဆောင်နေတာ ရှိသလို တောင်ကုတ်တက္ကသိုလ် အရှေ့ဖက် ရာဘာခြံထဲမှာ ရှိတဲ့ လက်နက်ကြီးစခန်းက လက်နက်ကြီးတွေ နဲ့ ပစ်ခတ်တာ တွေကိုလည်းဆက်တိုက်လုပ်ဆောင်တာတွေ ရှိနေတယ်လို့ ဒေသခံတွေက ပြောပါတယ်။
ဒါ့အပြင် ဒီနေ့မနက်ပိုင်းမှာ ဂျက်ဖိုက်တာ ၂ စီးနဲ့ လေကြောင်းတိုက်ခိုက်မှုတွေကိုလည်းဆက်တိုက်လုပ်ဆောင်နေတာ ရှိနေပြီး ဒေသခံတွေ ကို မြို့တွင်းက ထွက်ခွါခွင့်မပြုပဲ စစ်ကောင်စီတပ်တွေက ပိတ်ဆို့ထားတာတွေကိုလည်း လုပ်ဆောင်ထားတယ်လို့ ဒေသခံတစ်ဦးကပြောပါတယ်။
“လက်နက်ကြီးတွေကအပြင်းအထန်ပစ်နေတာ လေကြောင်းတိုက်ခိုက်တာကလည်း အပြင်းအထန်လုပ်နေတာ မနက်ကတည်းကပင်ချနေတာ။မြို့ခံတွေ ကိုတော့ စစ်ကောင်စီတပ်တွေက ထွက်ခွင့်မပေးဘူး ပိတ်ထားတယ်။မြို့အခြေအနေက တော်တော်စိုးရိမ်ဖို့ကောင်းတဲ့ အခြေအနေမှာ ရှိနေတယ်လို့”သူ ကပြောပါတယ်။
လက်ရှိတိုက်ပွဲဖြစ်ပွါးနေတဲ့ ပန်းမြောက်တောင် နဲ့ တောင်ကုတ်မြို့ဟာ ၇ မိုင်ခန့်အကွာမှာ ရှိပြီး ဒေသခံ ပြည်သူတွေ အနေ နဲ့ဘေးလွတ်ရာနေရာတွေ ကို တိမ်းရှောင်ခွင့်မရပဲတိုက်ပွဲပြင်းထန်လားပြီး တိုက်ပွဲကြားပိတ်မိနေမှာကိုစိုရိမ်နေရတယ်လို့ ဒေသခံတွေက ဆိုပါကြပါတယ်။
