CNA၊မြတ်သူ။
တောင်ကုတ်မြို့နယ် အတွင်းက ပန်းမြောက်တောင်မှာ စစ်ကောင်စီတပ်တွေ နဲ့ အာရက္ခတပ်တော်တို့ နှစ်ဖက်တိုက်ပွဲဖြစ်ပွါးနေတာတွေရှိနေပြီး စစ်ကောင်စီက လက်နက်ကြီးပစ်ကူး နဲ့ လေကြောင်းပစ်ကူတွေအပြင်းအထန်ပေးကာ ခုခံကာကွယ်တိုက်ခိုက်နေကြရတယ်လို့ ဒေသသတင်း အရင်းမြစ်တွေဆီက သိရပါတယ်။
အဲဒီလိုလေကြောင်းပစ်ကူ နဲ့ လက်နက်ကြီး ပစ်ကူပေးတိုက်ခိုက်နေတဲ့ နေရာတွေမှာ တောင်ကုတ်မြို့ အတွင်းက ကျေးရွာတွေကို လက် နက်ကြီးတွေ ကျရောက်ပေါက်ကွဲ တာတွေလည်းရှိနေပြီး နေအိမ်ပျက်စီးတာတွေ ရှိနေတယ်လို့ ဒေသသတင်းအရင်းအမြစ်ကပြောပါတယ်။
“တိုက်ပွဲကတော့ တော်တော်ပြင်းနေတယ်။သိရသလောက် ပန်းမြောက်တောင်မှာ ရှိတဲ့ တပ်က ကျဖို့ နီးနေပြီလို့သိရတယ်။အဲဒါကြောင့် စစ်ကောင်စီက လက်နက်ကြီးပစ်ကူ ၊လေကြောင်းပစ်ကူတွေပေးပြီးတော့ အပြင်းအထန်ခုခံနေရတယ်။အဲဒီလို လေကြောင်းပစ်ကူ လက်နက်ကြီး ပစ်ကူပေးပြီးတိုက်တဲ့ နေရာတွေမှာလည်း အဲဒီပန်းမြောက်တောင် အနီးက ရှိတဲ့ရွာတွေကို လက်နက်ကြီးတွေ ကျရောက်ပေါက်ကွဲတာတွေ ရှိနေတယ်။လူတွေထိခိုက်ဒဏ်ရာ ရတာတွေတော့ မရှိဘူးလို့”သူကပြောပါတယ်။
အဲဒီလိုလက်နက်ကြီးတွေ ကျရောက်ပေါက်ကွဲမှု ရှိနေကြတဲ့ကျေးရွာတွေကတော့ ကျောက်တံခါးကျေးရွာ၊မှန်နီကျေးရွာ နဲ့ ပန်းမြောင်းတောင် အောက်ဖက်မှာ ရှိတဲ့ သင်္ချီကိုင်းကျေးရွာတွေကို ကျရောက်ပေါက်ကွဲတာ ဖြစ်တယ်လို့ ဆိုပါတယ်။
အဲဒီလို လက်နက်ကြီးကျည်တွေ ကျရောက်ပေါက်ကွဲတာကြောင့် ဒေသခံတွေ အနေနဲ့ ဘေးလွတ်ရာနေရာတွေကို ထွက်ပြေးတိမ်းရှောင်နေကြရတယ်လို့ ဒေသသတင်းအရင်းမြစ်တွေက ပြောပါတယ်။
“တိုက်ပွဲပြင်းနေတော့ အခုက ဒေသခံတွေက ဘေးလွတ်ရာနေရာတွေကိုထွက်ပြေးနေကြရတာပေါ့။ကျောက်တံခါးကျေးရွာ၊မှန်နီကျေးရွာ ၊သင်္ချီကိုင်းကျေးရွာတွေက ပြည်သူတော်တော်များများကတော့ ထွက်ပြေးနေကြရတာ ။ ပြည်မဘက်ကို ပြေးကြတာလည်းရှိတယ်။နောက် တခြားနေရာတွေကိုလည်း ပြေးနေကြတာတွေရှိတယ်”လို့ သူကပြောပါတယ်။
လက်ရှိတိုက်ပွဲဖြစ်ပွါးနေတဲ့ ပန်းမြောက်တောင် နဲ့ တောင်ကုတ်မြို့ဟာ ၇ မိုင်ခန့်အကွာမှာ ရှိပြီး အဲဒီပန်းမြောက်တောင်အနီးမှာ စစ်ကောင်စီတပ်တွေ နဲ့ အာရက္ခတပ်တော်တို့ဟာ ပြီးခဲ့တဲ့ နိုဝင်ဘာလ ၁ ရက်နေ့ကတည်းကပင် တိုက်ပွဲ စတင်ဖြစ်ပွါးခဲ့တာဖြစ်ပြီး စစ်ကောင်စီက တိုက်ပွဲဖြစ်ချိန်ကတည်းကပင် လေကြောင်းတိုက်ခိုက်မှုတွေဆက်တိုက်လုပ်ဆောင်နေတာတွေလည်း ရှိနေပါတယ်။
