CNA၊ဟိန်းဇော်။
အာရက္ခတပ်တော်က မောင်ရွှေလေးရေတပ်စခန်းကိုသိမ်းပိုက်စဉ်အတွင်းက ထွက်ပြေးလွတ်မြောက်နေတဲ့ စစ်ကောင်စီတပ်ရဲ့ တပ်မှူးကျော်ကျော်ဦး နဲ့ အဖွဲ့ကို ပြန်လည်ကယ်ထုတ်နိုင်ဖို့ အတွက် စစ်ကောင်စီတပ်တွေဘက်က ကြိုးစားနေတာ ရှိနေတယ်လို့ စစ်ရေးအခြေအနေကို လေ့လာစောင့်ကြည့်နေသူတွေက ဆိုပါတယ်။
အဲဒီ တပ်မှူးကျော်ကျော်ဦးအပါအဝင် စစ်ကောင်စီတပ်သားဦးရေ ၂၀ ကျော်လောက်ဟာ လက်ရှိအချိန်ထိ အာရက္ခတပ်တော် အေအေ ကရှင်းလင်းသုတ်သင်နိုင်ခြင်း မရှိသေးပဲ ထွက်ပြေးလွတ်မြောက်နေဆဲဖြစ်ပြီး အဲဒီအဖွဲ့ကို ဒီရက်ပိုင်းအတွင်းမှာ စစ်ကောင်စီက ကယ်ထုတ်ဖို့ကြိုးစားနေတာဖြစ်တယ်လို့ စစ်ရေးသတင်းအရင်းအမြစ်ကပြောပါတယ်။
“မောင်ရွှေလေးရေတပ်စခန်းကိုသိမ်းတုန်းကတပ်မှူးကျော်ကျော်ဦးနဲ့အတူထွက်ပြေးလွတ်မြောက်နေတဲ့အဖွဲ့တစ်ဖွဲ့ရှိပါတယ်။သူတို့အဖွဲ့ဟာ သံတွဲမြို့နယ်က မလွတ်မြောက်သေးဘူးလို့ယူဆရပါတယ်။ သံတွဲမြို့နယ်က လွတ်မြောက်သွားပြီဆိုရင်တောင် ကျိန္တလီ နဲ့ ကုလားပြင် အနီးဝန်းကျင်မှာပဲရှိကြပါလိမ့်မယ်။ဂွမြို့နယ်မှာ လက်ရှိစစ်ကောင်စီတပ်ဖွဲ့ဝင်တွေလှုပ်ရှားနေတဲ့ပုံစံကိုကြည့်ရတာ ကုလား ပြင်အထိအတင်းထိုးဖောက်ပြီး ထွက်ပြေးလွတ်မြောက်နေတဲ့ ကျော်ကျော်ဦးနဲ့အဖွဲ့ကို ဆွဲထုတ်ယူချင် နေတဲ့ပုံစံပါ။ကမ်းသာယာ ၊ဆပ်သွား ဖက်သို့ပို့ထားတဲ့အင်အားဟာ တစ်ထောင်ကျော်သွားပါပြီ။ ယခုကျနော့်ဆီသို့ဝင်လာတဲ့သတင်းအရဆိုရင် အင်အား ၅၀၀ လောက်ရှိတဲ့စစ်ကောင်စီစစ်ကြောင်းတစ်ကြောင်းဟာ တိုက်ပွဲမဖော်ဆောင်ပဲဆပ်သွားကနေ တောလမ်းအတိုင်း ကုလားပြင်အထိ ပတ်ပြီးဝင်ရောက်ဖို့လုပ်ဆောင်နေတာတွေ့နေရတယ်လို့” ဆိုပါတယ်။
အဲဒီလို စစ်ကောင်စီတပ်တွေက နောက်ကြောင်းပြန်ဝင်ရောက်နိုင်ဖို့ ကြိုးစားနေတာတွေကြောင့် ဒေသခံ ပြည်သူတွေ အနေ နဲ့ သတိ ထားနိုင်ဖို့ လိုအပ်နေသလို အာရက္ခတပ်တော် အေအေ အနေ နဲ့လည်းတောလမ်းအတိုင်းစစ်ကောင်စီတပ်တွေ ဝင်ရောက်လာနိုင်တဲ့ နေရာတွေကို ပိတ်ဆို့စောင့်ကြည့်ဖို့လိုအပ်နေတယ်လို့ သူကဆိုပါတယ်။
“တစ်ကယ်လို့ အဲဒီစစ်ကြောင်းသာ ကုလားပြင်အထိရောက်လာမယ်ဆိုရင် ရှေ့သို့ရောက်နေတဲ့ တပ်တော်တပ်ဖွဲ့ဝင်တွေအတွက်လည်း အရမ်းအန္တရာယ်များပါတယ်။လုံခြုံရေးလုပ်ငန်းများကိုအထူးကြပ်မတ်ကြဖို့လိုပါမယ်။သူတို့ဝင်ရောက်လာနိုင်တဲ့လမ်းကြောင်းမှန်သမျှကို နေ့ညမပြတ်စောင့်ကြည့်ဖို့လိုပါတယ်”သူကဆက်လက်ပြောဆိုပါတယ်။
အာရက္ခတပ်တော် အေအေဟာ သံတွဲမြို့၊ကျိန္တလီမြို့ နဲ့ဂွမြို့နယ် အတွင်းက စစ်ကောင်စီရဲ့တပ်စခန်းတွေဖြစ်တဲ့ ကုလားပြင် တပ်စခန်းတွေကို အပြီးသတ်သိမ်းပိုက်ရရှိထားပြီးဖြစ်ပါတယ်။
လက်ရှိမှာလည်း ဂွမြို့နယ် အတွင်းက ကျန်ရှိနေသေးတဲ့ စစ်ကောင်စီရဲ့ တပ်စခန်းတွေကို အာရက္ခတပ်တော်က ဆက်လက်ထိုးစစ်ဆင် တိုက်ခိုက်နေပြီး ဂွမြို့နယ် နဲ့ အနီးဝန်းကျင်က နေရာတွေမှာ ဆက်လက်တိုက်ပွဲတွေ ဖြစ်ပွါးနေဆဲ ဖြစ်ပါတယ်။
