(ပန်းမြောက်တောင် အနီးတိုက်ပွဲဆက်လက်ပြင်းထန်နေ)
CNA၊ မြတ်သူ။
တောင်ကုတ်မြို့နယ် ပန်းမြောက်တောင်မှာရှိတဲ့ စစ်ကောင်စီလက်နက်ကြီးကုန်းကို အာရက္ခတပ်တော် က မနေ့က သိမ်းပိုက်လိုက်ပြီးဖြစ်တယ်လို့ ဒေသခံ သတင်းအရင်းမြစ်တွေဆီက သိရပါတယ်။
အဲဒီပန်းမြောက်တောင်က အသက်မသေပဲလွတ်မြောက်လာကြတဲ့ စစ်ကောင်စီတပ်တွေဟာ ပန်းမြောက်တောင်အနီးက သိမ်တောင်ရပ်ကွက် ဝေဠုဝန်ကျောင်း အနီးက တောင်မှာ ပြန်လည်တပ်စွဲကာ အာရက္ခတပ်တော်ရဲ့ ထိုးစစ်ကို ပြန်လည်ခုခံဖို့ ပြင်ဆင်နေတာတွေကို လုပ်ဆောင်နေတယ်လို့ ဒေသသတင်းအရင်းအမြစ်က ပြောပါတယ်။
“ပန်းမြောက်တောင်ကတော့ ပြီးသွားပြီ ဒါပေမယ့် အဲဒီပန်းမြောက်တောင် အနီးက တောင်မှာတပ်စွဲပြီးတော့ ပြန်ပြီးခုခံတိုက်ခိုက်နေတယ်။အဲဒီ ပန်းမြောက်တောင် နဲ့ စကခ – ၅ နဲ့လည်း သိပ်မဝေးဘူး အခုက အဲဒီကြားကတောင်မှာ ထွက်ပြေးလာတဲ့ စစ်တပ်က ထပ်ပြီးတပ်စွဲပြီး ပြန်ပြီး ခုခံတိုက်ခိုက်နေတာဖြစ်တယ်လို့”သူကပြောပါတယ်။
လက်ရှိအာရက္ခတပ်တော်က သိမ်းပိုက်ရရှိထားတဲ့ ပန်းမြောက်တောင်ကို ပြီးခဲ့တဲ့ နိုဝင်ဘာလ ၁ ရက်နေ့ကပင် အာရက္ခတပ်တော်က ဝင်ရောက် ထိုးစစ်ဆင်တိုက်ခိုက်ခဲ့တာ ဖြစ်ပြီး နိုဝင်ဘာလ ၃ ရက်နေ့ ညနေမှာ စခန်းကုန်းတစ်ခုလုံးကို အာရက္ခတပ်တော် က သိမ်းပိုက်နိုင်ခဲ့တာဖြစ်ပါတယ်။
ဒီနေ့မှာလည်း အာရက္ခတပ်တော် နဲ့ စစ်ကောင်စီတပ်တွေဟာ ပန်းမြောက်တောင် အနီးဝန်းကျင်မှာ ဆက်လက်တိုက်ပွဲတွေဖြစ်ပွါးနေဆဲဖြစ်ပြီး စစ်ကောင်စီကတော့ လေကြောင်းပစ်ကူ ၊လက်နက်ကြီးပစ်ကူတွေ နဲ့ အပြင်းအထန်ခုခံတိုက်ခိုက်နေပြီး နှစ်ဖက်တိုက်ပွဲပြင်းထန်နေတယ်လို့ ဒေသ သတင်းအရင်းအမြစ်က ပြောပါတယ်။
“စခန်းကုန်းကို ပြန်ရအောင်တိုက်မယ်ဆိုတဲ့ သဘောနဲ့ စစ်ကောင်စီကအပြင်းအထန်တိုက်ခိုက် နေတယ်။လေကြောင်းပစ်ကူ ၊လက်နက်ကြီးပစ်ကူတွေ နဲက အပြင်းအထန်တိုက်ခိုက်နေတယ်။လို့”သူကပြောပါတယ်။
အဲဒီလိုစစ်ကောင်စီက လက်နက်ကြီးတွေ ၊လေကြောင်းပစ်ကူတွေ ပေးတိုက်ခိုက်နေတာကြောင့် အနီးအနားမှာရှိတဲ့ မှန်နီကျေးရွာ နဲ့ ကျောက်တံခါးကျေးရွာတွေက ဒေသခံတွေဟာ ဘေးလွတ်ရာနေရာတွေကို ထွက်ပြေးတိမ်းရှောင်နေကြရတယ်လို့ ဒေသသတင်း အရင်းမြစ်တွေဆီက သိရပါတယ်။
စစ်ကောင်စီတပ်တွေဟာ တောင်ကုတ်မြို့တစ်ခုလုံး အာရက္ခတပ်တော် လက်ထဲကို မကျရောက်သွားအောင်အတွက် မြို့ပတ်ဝန်းကျင်က နေရာတွေ ဖြစ်တဲ့ တောင်ကုတ်တက္ကသိုလ်၊တောင်ကုတ်တက္ကသိုလ်နဲ့ ဘေးတစ်ဖက်မှာ ဦးထွန်းလှိုင်ရာဘာခြံ၊ ဇီးကိုင်းတောင် နဲ့ သဲခံတောင်ဘုရား ကုန်းပေါ်တွေမှာ လက်နက်ကြီးတွေ တပ်ဆင်ကာ အေအေ ရဲ့ ထိုးစစ်ကိုခုခံဖို့ အတွက်ပြင်ဆင်ထားသလို မြို့ပေါ် ရပ်ကွက်တွေက အဆောက်အဦးအမြင့်နေရာတွေ လမ်းဆုံလမ်းခွတွေမှာလည်း စစ်စခန်းတွေတည်ဆောက်ကာ ခုခံဖို့ ပြင်ဆင်ထားတာ တွေ များစွာရှိနေတယ်လို့ ဆိုပါတယ်။
