စစ်ကောင်စီနဲ့အာရက္ခတပ်တော်AAကြား ရခိုင်ပြည်နယ် တောင်ပိုင်း ဂွမြို့နယ် ဂျိုင်ကောက် ကျေးရွာအနီးမှာ တိုက်ပွဲတွေ ဆက်လက်ပြင်းထန်နေပြီး စစ်ကောင်စီရေတပ်သင်္ဘောတွေကနေ လက်နက်ကြီးတွေနဲ့ ပစ်နေတယ်လို့ ဒေသခံတွေကပြောပါတယ်။
ဂွမြို့ဒေသခံ တစ်ဦးပြောတာက “တိုက်ပွဲက ဂျိုင်ကောက်မှာဖြစ်နေတယ်။အခု ဂွမှာရောက်နေတဲ့ ရေတပ်သင်္ဘောကလည်း လက်နက်ကြီးတွေ နဲ့ပစ်နေတယ် ဒီနေ့တနေကုန်ပစ်နေတာဂျိုင်ကောက်၊ဆပ်သွား ဇီးကုန်း အဲဒီရွာတွေကို ဒီကပစ်တဲ့ လက်နက်ကြီးတွေကျတာရှိတယ်လို့ သိရတယ်။ဒေသခံတွေကိုတော့ အေအေက ကယ်ထုတ်ပေးနေတယ်။လူထိခိုက်မှုရှိမရှိတော့မသိရဘူး။
အာရက္ခတပ်တော်AAအနေနဲ့ ရခိုင်တောင်ပိုင်းက သံတွဲမြို့နယ်ကို သိမ်းပိုက်ပြီးနောက်ပိုင်းမှာ သံတွဲနဲ့ဆက်စပ်နေတဲ့ ဂွနဲ့ တောင်ကုတ်မြို့နယ်တွေကိုပါ ထိုးစစ်ဆင်တိုက်ခိုက်နေတာဖြစ်ပါတယ်။
ဂွမြို့နယ်မှာတော့ တိုက်ပွဲတွေဟာ မြို့အနီးအနားကိုရောက်ရှိနေပြီဖြစ်သလို စစ်ကောင်စီဘက်က လည်း စစ်အင်အားတွေ ထပ်မံဖြည့်တင်းနေတာရှိသလို လေကြောင်းပစ်ကူ ရေတပ်ပစ်ကူတွေနဲ့ AAထိုးစစ်ကို ခုခံတိုက်ခိုက်နေတာလည်းဖြစ်ပါတယ်။
လက်ရှိ်မှာတော့ ဂွမြို့ပေါ်မှာ တိုက်ပွဲဖြစ်ပွားတာမရှိသေးပေမယ့် စစ်ကောင်စီတပ်သားတွေ လုံခြုံရေးတင်းကြပ်ထားသလို ဒေသခံတွေဟာလည်း ကိုယ့်နည်းကိုယ့်ဟန်နဲ့ မြို့ကို စွန့်ခွာနေကြတယ်လို့ ဂွမြို့ခံတဦးကပြောပါတယ်။
“ မြို့ထဲမှာတော့ ဧရာဝတီကလာတဲ့ တပ်အင်အားတွေအပြည့်ရှိနေတယ်။စစ်ကောင်စီတပ်သားတွေ မြို့ထဲမှာတော့ တော်တော်ခြေရှုပ်နေတယ်။မြို့ပေါ်ကလက်နက် ကြီးပစ်ခတ်သံတွေတော့ကြား ရတယ်။မြို့ထဲမှာတော့တိုက်ပွဲဖြစ်တာတော့မရှိသေးဘူး။ဒေသခံတွေကတော့ ဘေးလွတ်ရာတွေကို ကိုယ့်နည်း ကိုယ့်ဟန်နဲ့ ထွက်ပြေးနေကြတယ်။အခု ရိုးလမ်းတလျှောက်မှာလည်း စစ်ကောင်စီက အင်အားအပြည့်ဖြည့်တင်းထားတာတွေရှိနေတယ်။”
ရခိုင်ပြည်နယ်မှာ စစ်ကောင်စီနဲ့ အာရက္ခတပ်တော်AAကြား တိုက်ပွဲစတင်ခဲ့တာ ဒီကနေ့မှာ တနှစ်ပြည့်ပြီးဖြစ်သလို ရခိုင်ပြည်နယ်က မြို့နယ် ၁ဝခုနဲ့ ချင်းပြည်နယ်က ပလက်ဝမြို့နယ်တွေကို AAဘက်က သိမ်းပိုက်ထားပြီးဖြစ်ပါတယ်။
လက်ရှိ အပြီးသတ်သိမ်းပိုက်ဖို့ကျန်ရှိနေသေးတဲ့ မြို့နယ်တွေကိုလည်း အာရက္ခတပ်တော်က ဆက်လက်ထိုးစစ်ဆင်တိုက်ခိုက်နေတာလည်းဖြစ်ပါတယ်။
