ရခိုင်က မြို့ ၄မြို့ကို အာရက္ခတပ်တော်က ဆက်လက်ထိုးစစ်ဆင်နေ

ရခိုင်ပြည်နယ်အတွင်းက မြို့ နယ် ၄ ခုမှာရှိတဲ့ စစ်ကောင်စီတပ်စခန်းတွေ အာရက္ခတပ်တော်က ဆက်လက်ထိုးစစ်ဆင်တိုက်ခိုက်နေတယ်လို့ ရခိုင်တကျော့ပြန်တိုက်ပွဲ ၁ နှစ်ပြည့်နေ့မှာ သတင်းထုတ်ပြန်ပြောဆိုလာခဲ့ပါတယ်။

အဲဒီလို အာရက္ခတပ်တော်က ဆက်လက်ထိုးစစ်ဆင်တိုက်ခိုက်နေတဲ့ မြို့နယ်တွေ မှာ အမ်း၊ တောင်ကုတ်၊ ဂွနဲ့ မောင်တောမြို့တွေဖြစ်ကြတယ်လို့ဆိုပါတယ်။

အဲဒီထဲက အနောက်ပိုင်းတိုင်းစစ်ဌာနချုပ်ရှိတဲ့ အမ်းမြို့မှာဆိုရင်လည်း စစ်ကောင်စီရဲ့ တပ်ရင်း၊ တပ်ခွဲ၊ တိုက်ပွဲဝင်စည်းရုံးရေးသင်တန်းကျောင်း၊ လေကြောင်းရန်ကာကွယ်ရေးတပ်နဲ့ စစ်ဖက်ရေးရာလုံခြုံရေးတပ် စုစုပေါင်း ၈ခုတို့ကို AAက သိမ်းပိုက်ထားပြီးဖြစ်သလို မောင်တောမြို့နယ်တစ်ခုလုံးကိုလည်း အပြီးသတ် သိမ်းပိုက်နိုင်ဖို့ အတွက် စစ်ကောင်စီရဲ့ နခခ – ၅ တစ်ခုသာ ကျန်ရှိတော့တယ်လို့ ဖော်ပြထားပါတယ်။

ဒါ့အပြင် တစ်ဖက်မှာလည်း ကျန်ရှိနေသေးတဲ့ စခန်းတွေကိုလည်း AAကဆက်လက်ထိုးစစ်ဆင်တိုက်ခိုက်နေသလို သိမ်းပိုက်ထားတဲ့ စခန်းတွေထဲက ထွက်ပြေးလွတ်မြောက်နေတဲ့ စစ်ကောင်စီတပ်ဖွဲ့ဝင်တွေကို လိုက်လံချေမှုန်းတိုက်ခိုက်နေတဲ့အတွက် အမ်း၊နပခ ဌာနချုပ်ရှိရာ ပတ်ဝန်းကျင်မှာ တိုက်ပွဲတွေဆက်လက်ပြင်းထန်နေတယ်လို့ AAကဆိုပါတယ်။

တောင်ကုတ်နဲ့ ဂွမြို့တို့က စစ်ဆင်ရေးအသေးစိတ်အခြေ‌အနေတွေကိုတော့ AAရဲ့ ထုတ်ပြန်ချက်ထဲမှာ ဖော်ပြထားတာမတွေ့ရပါဘူး။

၂၀၂၃ခုနှစ်၊ နိုဝင်ဘာ ၁၃ ရက်နေ့မှာစတင်ခဲ့တဲ့ AAရဲ့ စစ်ဆင်ရေးမှာ ပလက်ဝဒေသအပြင် ပေါက်တော၊ ကျောက်တော်၊ မြေပုံ၊ မြောက်ဦး၊ မင်းပြား၊ ပုဏ္ဏားကျွန်း၊ ရမ်းဗြဲ၊ ရသေ့တောင်၊ ဘူးသီးတောင် နဲ့ သံတွဲမြို့တို့ကို စစ်ဆင်ရေး ၁နှစ်မပြည့်ခင်မှာတင် သိမ်းပိုက်နိုင်ခဲ့တာဖြစ်ပါတယ်။

တစ်နှစ်တာစစ်ဆင်ရေးကာလအတွင်း စခန်းသိမ်း၊ မြို့သိမ်းတိုက်ပွဲတွေမှာ အသက်ပေးဆပ်စွန့်လွှတ်ခဲ့ကြတဲ့ အာရိက္ခတပ်တော်နဲ့ မိတ်ဖက်အဖွဲ့အစည်း အချို့မှ စစ်သည်တော်တွေ၊ ကိုယ်လက်အင်္ဂါပေးဆပ်ခဲ့ကြတဲ့ စစ်သည်တော်တွေနဲ့ စစ်ဆင်ရေးကို ပုံစံ တစ်မျိုးမျိုးနဲ့ အထောက်အပံ့ဖြစ်စေတဲ့ ကျန်းမာရေးဝန်ထမ်းတွေအပါအဝင် သက်ဆိုင်တဲ့ သူအားလုံးကို AAက အလေးအနက်မှတ်တမ်းတင်ဂုဏ်ပြုတယ်လို့လည်း ထုတ်ပြန်ထားပါတယ်။