CNA၊မြတ်သူ။နိုဝင်ဘာ၊ ၁၄ ။ရခိုင်ပြည်နယ်တောင်ပိုင်း တောင်ကုတ်မြို့နယ်အတွင်းက ရန်ခိုကျေးရွာကို ဒီနေ့ မနက် ၃ နာရီလောက်မှာ စစ်ကောင်စီလေကြောင်းက ဗုံးကြဲတိုက်ခိုက်ခဲ့တာကြောင့် မိသားစု ၄ ဦးသေဆုံးခဲ့ရတယ်လို့ ဒေသခံတွေကပြောပါတယ်။
သေဆုံးသွားသူတွေဟာ လေကြောင်းက ဗုံးကြဲစဉ် ဗုံးစထိမှန်ပြီး သေဆုံးခဲ့ရတာ ဖြစ်တယ်လို့ သေဆုံးသူတွေရဲ့ ဆွေမျိုးတစ်ဦးက အတည်ပြုပြောပါတယ်။
“ဟုတ်ပါတယ်။သေသွားတာက ကိုစိုးမင်းဌေးရဲ့ မိသားစုဝင်တွေပါ သူတို့အိမ်ကိုလက်နက်ကြီး ကျပြီးတော့ အခုလို အစုလိုက်အပြုံလိုက်မိသားဝင်တွေတစ်နေရာတည်းမှာသေသွားတာရပါ လို့”သူကပြောပါတယ်။
မနေ့ကလည်း အဲဒီရန်ခိုကျေးရွာကို စစ်ကောင်စီလေကြောင်းက ဗုံးကြဲခဲ့တာကြောင့် အရပ်သား ၅ ဦးထက် မနည်းထိခိုက်ဒဏ်ရာ ရတာရှိခဲ့ပြီးနေအိမ်တချို့ မီးလောက်ပျက်စီးခဲ့တာလည်းဖြစ်ပါတယ်။
ဒါ့အပြင် စစ်ကောင်စီဟာဒီရက်ပိုင်းအတွင်းမှာ တောင်ကုတ်မြို့နဲ့ အနီးဝန်းကျင်မှာ ရှိနေတဲ့ ဒုံးကျေးရွာ၊ ကြိုးကြာကွင်းကျေးရွာ နဲ့ ဖုံညိုကျေးတွေကိုလည်း လေကြောင်းက ဗုံးကြဲတိုက်ခိုက်တာတွေ ဆက်တိုက်လုပ်ဆောင်နေတာတွေရှိနေသလိုလည်းနောက်ထပ်တောင်ကုတ်ဒေသခံ တစ်ဦးကပြောပါတယ်။
“ဒီရက်ပိုင်းကတော့ စစ်ကောင်စီက လေကြောင်းတိုက်ခိုက်တာ ဆက်တိုက်လုပ်နေတာ တော့ဟုတ်ပါ တယ်။ပြီးတော့ လက်နက်ကြီးတွေ နဲ့ ပစ်ခတ်တာတွေလည်းရှိတယ်။တိုက်ပွဲကတော့ အရမ်းကြီးပြင်းပြင်းထန်ထန်ဖြစ်တာတော့မရှိဘူး။ဒါပေမယ်စစ်ကောင်စီကတော့ လေကြောင်းကပစ်လိုက်၊လက်နက်ကြီးနဲ့ ပစ်လိုက်ကတော့ အချိန်မရွေးလုပ်နေတယ်။ဘာတွေ ပျက်စီးနေလဲဆိုတာတော့ အတည်ပြုဖို့ ခက်တယ် အခုက ဖုန်းလိုင်းတွေလည်းမရ လူတွေကလည်းပြေးနေရတော့။ကျနော်ကြားမိသလောက်တော့ ဒုံးကျေးရွာတို့ ကြိုးကြာကွင်းကျေးရွာ တို့ ဖုံညိုကျေးတို့ မီးလောင်တာတွေ ရှိတယ်လို့တော့ ကြားမိ”လို့ သူကပြောပါတယ်။
တောင်ကုတ်မြို့နယ် စစ်ကောင်စီနဲ့ အာရက္ခတပ်တော်AAတို့ကြား ပြီးခဲ့တဲ့ နိုဝင်ဘာလ ၁ ရက်နေ့ကတည်းကစပြီး နှစ်ဖက်တိုက်ပွဲတွေ ဒီကနေ့အထိ ပြင်းထန်နေဆဲဖြစ်ပါတယ်။ လက်ရှိမှာတော့ တောင်ကုတ်မြို့နယ်က စစ်ကောင်စီရဲ့ ပန်းမြောက်တောင်အမြောက်တပ်နဲ့ အာလိန်ငါးဆင့်ဘုရားအနီးက စစ်ကောင်စီတပ်စခန်းတွေကို သိမ်းပိုက်နိုင်ခဲ့ပါတယ်။
လက်ရှိမှာတော့ AA ထိုးစစ်ဟာ တောင်ကုတ်မြို့အနီးကို ရောက်ရှိလာနေပြီးစစ်ကောင်စီဘက်ကတော့ ကြည်း၊ရေ၊လေ ပူးပေါင်းပြီးတော့ ခုခံတိုက်ခိုက်နေတာလည်းဖြစ်ပါတယ်။
