CNA၊ဂူးဂူး။
ဂွမြို့နယ်အတွင်းက ဆပ်သွားတံတားကို စစ်ကောင်စီက ပြီးခဲ့တဲ့ နိုဝင်ဘာလ ၁၄ ရက်နေ့ ညအချိန်မှာ မိုင်းခွဲဖျက်ဆီးလိုက်တာကြောင့် တံတားအလယ်ရှိကြမ်းခင်းတစ်ခုလုံးပြိုကျပျက်စီးသွားခဲ့ရတယ်လို့ ဒေသ နဲ့ အဆက်အသွယ်ရှိသူ တစ်ဦးက အတည်ပြုပြောပါတယ်။
စစ်ကောင်စီတပ်တွေဟာ အဲဒီဆပ်သွားတံတားထိပ်မှာ ခုခံစစ်အနေ နဲ့ အာရက္ခတပ်တော်ရဲ့ထိုးစစ်ကိုခုခံတိုက်ခိုက်နေခဲ့ပြီးနောက် စစ်ရေးရှုံးနိမ့်လာချိန်မှာ စစ်ကောင်စီတပ်တွေက တပ်ဆုတ်ထွက်ခွါသွားပြီး တံတားကို အခုလို မိုင်းခွဲဖျက်ဆီးထားခဲ့တာဖြစ်တယ်လို့ အဲဒီမြေပြင်နဲ့ အဆက်အသွယ် ရရှိသူ တစ်ဦးကပြောပါတယ်။
“တံတားမိုင်းခွဲဖျက်ဆီးခံရတာကတော့ ဟုတ်တယ်လို့ သိထားရတယ်။အချိန်ကတော့ မသိရဘူး စစ်ကောင်စီတပ်တွေက အဲဒီတံတားထိပ်မှာ ခံစစ်အနေအထား အာရက္ခတပ်တော်ရဲ့ ထိုးစစ်ကို ခုခံနေခဲ့တာ အဲတာ သူတို့မနိုင်တော့ပဲတပ်ဆုတ်သွားရတဲ့ အခါမှာ အခုလို မိုင်းခွဲဖျက်ဆီးထားခဲ့တာ။ပျက်စီးမှုကတော့ ပုံမှာ ပါတဲ့ အတိုင်းပါပဲလို့”သူကပြောပါတယ်။
အဲဒီက တပ်ဆုတ်သွားကြတဲ့ စစ်ကောင်စီတပ်ဖွဲ့တွေဟာ ကမ်းသာယာမှာအခြေချထားတဲ့ တပ်ဖွဲ့နဲ့ အာရက္ခတပ်တော် အေအေ ရဲ့ထိုးစစ်ကို ခုခံတိုက်ခိုက်ဖို့ ပြင်ဆင်နေတာရှိနေသလို လက်ရှိ ဆပ်သွားအနားမှာလည်း အာရက္ခတပ်တော် နဲ့ စစ်ကောင်စီတပ်တို့ဟာ နှစ်ဖက်တိုက်ပွဲ ဆက်လက်ဖြစ်ပွါးနေဆဲ ဖြစ်တယ်လို့ အဲဒီဒေသခံ နဲ့ သတင်းအရင်းအမြစ်တွေ နဲ့ အဆက်အသွယ် ရရှိသူ က ဆိုပါတယ်။
“ကျနော်သိထားရသလောက် ထွက်ပြေးလို့ ကျန်နေခဲ့တဲ့ စစ်ကောင်စီတပ်သားတွေ နဲ့ အာရက္ခတပ်တော်တို့ကတိုက်ပွဲက ဖြစ်နေတုန်းလို့ သိရတယ်။အဲဒီအနားမှာက တိုက်ပွဲကလည်း ပြင်းပြင်းထန်ထန်ဖြစ်နေတော့ ဖုန်းလိုင်းတွေကလည်းမရတော့ တိတိကျကျ မေးဖို့ကခက်တယ်။ရွာတွေကို လေကြောင်းတိုက်ခိုက်လို့ နေအိမ်တွေ ပျက်စီးတာတွေ လူတွေ ထိခိုက်သေဆုံးတာတွေ ရှိတယ်လို့ သိရတယ်။ဒါပေမယ့် အတည်တော့ ပြုလို့မရဘူးလို့”သူကပြောပါတယ်။
ပြီးခဲ့တဲ့ ရက်ပိုင်းတွေက အဲဒီဆပ်သွားအနီးက ကျေးရွာတွေကို စစ်ကောင်စီက လေကြောင်းတိုက်ခိုက်မှုလုပ်ဆောင်ခဲ့တာကြောင့် ဒေသခံတွေ ထိခိုက်သေဆုံးတာ ရှိခဲ့တယ်လို့ သတင်းတွေ ထွက်နေပေမယ့် ဖုန်းလိုင်း အခြေအနေတွေကြောင့် လက်ရှိမှာ ဆက်သွယ်မေးမြန်းအတည်ပြုနိုင်ဖို့ အတွင် CNAသတင်းဌာနက ဆက်လက်ကြိုးစားနေဆဲ ဖြစ်ပါတယ်။
ရခိုင်စစ်မြေပြင်မှာ စစ်ရေး အရှုံးနဲ့ ရင်ဆိုင်နေရတဲ့ စစ်ကောင်စီဟာ တကျော့ပြန်တိုက်ပွဲအတွင်းမှာ ပြည်သူတွေ သွားလာရေး နဲ့ လမ်း ပန်းဆက်သွယ်ရေးတွေ အတွက် အဓိကထား အရေးပါတဲ့ တံတား ၂၈ စင်းကို မိုင်းခွဲဖျက်ဆီးတာ၊လေကြောင်းက ဗုံးကြဲဖျက်ဆီးတာ လုပ်ဆောင်ခဲ့တာတွေရှိခဲ့တယ် အာရက္ခတပ်တော်က နိုဝင်ဘာ ၁၃ ရက်နေ့မှာ ထုတ်ပြန်ပြောဆိုထားပါတယ်။
