ကချင်လွတ်မြောက်ရေးတပ်မတော်(KIA) ဌာနချုပ်တည်ရှိရာ လိုင်ဇာမြို့အနီးက ဗိုလ်သင်တန်းကျောင်းတိုက်ခိုက်ခံရမှုဖြစ်စဉ်မှာ ကျဆုံးခဲ့တဲ့ ဗိုလ်လောင်းတွေအတွက် ဝမ်းနည်းအောက်မေ့ဖွယ် အထိမ်းအမှတ် အခမ်းအနားကိုပြုလုပ်ခဲ့တယ်လို့ အာရက္ခတပ်တော်(AA)က ထုတ်ပြန်လာပါတယ်။
၂၀၁၄ခုနှစ်၊ နိုဝင်ဘာ ၁၉ရက်နေ့တုန်းက လိုင်ဇာမြို့အနီး KIAရဲ့ ဝေကြိုင်ဘွမ်၊ ဗိုလ်သင်တန်းကျောင်းမှာ စစ်ပညာသင်ယူနေတဲ့ အာရက္ခတပ်တော်က ဗိုလ်လောင်း ၈ဦးနဲ့ တခြားသောတိုင်းရင်းသား တော်လှန်ရေးလက်နက်ကိုင် အဖွဲ့အစည်းတချို့က ဗိုလ်လောင်းတွေအပါအဝင် စုစုပေါင်း ဗိုလ်လောင်း ၂၃ဦးဟာ စစ်ကောင်စီရဲ့ အလစ်အငိုက် လက်နက်ကြီးပစ်ခတ်မှုကြောင့် ကျဆုံးခဲ့ရတာပါ။
အဲဒီဖြစ်စဉ်အတွက် အာရက္ခတပ်တော်(AA)ဟာ နိုဝင်ဘာ ၁၉ရက်နေ့ရောက်တိုင်း ဝမ်းနည်းအောက်မေ့ဖွယ် အထိမ်းအမှတ် အခမ်းအနားကိုပြုလုပ်လေ့ရှိပြီး နိုင်ငံရေးအခြေအနေပေါ်မူတည်ပြီး ဗိုလ်လောင်းတွေရဲ့ အာဇာနည်ကုန်းမှာ လွမ်းသူ့ပန်းခွေချ ဂါရဝပြုတာ၊ တပ်စခန်းတွေမှာ အောင်လံတဝက်လွှင့်တာတွေကို နှစ်စဉ်ပြုလုပ်လေ့ရှိတယ်လို့ သိရပါတယ်။
ယခုနှစ်မှာတော့ စစ်ရေးအခြေအနေအရ ဗိုလ်လောင်းတွေအတွက်ဝမ်းနည်းအောက်မေ့ဖွယ် အထိမ်းအမှတ် အခမ်းအနားကို အကျဉ်းချုပ်မျှသာ ပြုလုပ်နိုင်ခဲ့တယ်လို့ AA က ဆိုပါတယ်။
ဒါ့အပြင် အာရက္ခတပ်တော်(AA)အနေနဲ့ နိုဝင်ဘာ ၁၉ရက်နေ့ကို ဘယ်တော့မှ မေ့မှာ မဟုတ်ပဲ ဗိုလ်လောင်းတွေရဲ့ တိုင်းပြည်နဲ့ လူမျိုးအတွက် အသက်ပေးဆပ်မှုတွေကို အမြဲတမ်းသတိရနေမှာဖြစ်တယ်လို့လည်း ထုတ်ပြန်ထားပါတယ်။
လက်ရှိမှာတော့ ရခိုင်ပြည်နယ်အတွင်း၊ စစ်ကောင်စီနဲ့ အာရက္ခတပ်တော်(AA)တို့ တိုက်ပွဲတွေပြင်းထန်းလျှက်ရှိပြီး၊ ပလက်ဝဒေသအပြင် ပေါက်တော၊ ကျောက်တော်၊ မြေပုံ၊ မြောက်ဦး၊ မင်းပြား၊ ပုဏ္ဏားကျွန်း၊ ရမ်းဗြဲ၊ ရသေ့တောင်၊ ဘူးသီးတောင်နဲ့ သံတွဲမြို့တို့ကို သိမ်းပိုက်ထားတယ်လို့ AA က နိုဝင်ဘာ ၁၃ရက်နေ့မှာ ထုတ်ပြန်ထားပါတယ်။
