CNA၊မြတ်သူ။
မနေ့က နိုဝင်ဘာလ ၁၉ ရက်နေ့ ညနေ ၅ နာရီလောက်မှာ စစ်ကောင်စီက တောင်ကုတ်မြို့နယ် အတွင်းကကျေးရွာတွေကို လေကြောင်းကနေ တဆင့်ဗုံးကြဲတိုက်ခိုက်ခဲ့တာကြောင့် ဒေသခံ ပြည်သူ ၄ ဦးသေဆုံးခဲ့ရပြီး ဒဏ်ရာရရှိသူ အများအများလည်း ရှိခဲ့ရတယ်လို့ ဒေသခံ သတင်းအရင်းအမြစ်တွေကပြောပါတယ်။
သေဆုံးသွားတဲ့ ဒေသခံတွေကတော့ သိမ်တောင်ရပ်ကွက် နဲ့ ချောင်းတစ်ဖက်တစ်ကမ်းမှာ ရှိတဲ့ သင်္ချီကိုင်းကျေးရွာက ကိုအောင်မြင့်အေး အပါအဝင် ဒေသခံ ၄ ဦးဖြစ်ပြီးတယ်လို့ ဒေသခံ သတင်းအရင်းအမြစ်ကပြောပါတယ်။
“မနေ့က မြို့ထဲမှာ တိုက်ပွဲတွေ ဖြစ်တော့ စစ်ကောင်စီက လေကြောင်း နဲ့ ဆက်တိုက်ပစ်ခတ်တာတွေ လုပ်တာ အဲဒီမှာ သင်္ချီကိုင်းကျေးရွာထဲကို စစ်ကောင်စီ ပစ်လိုက်တဲ့ လက်နက်ကြီးတွေ ကျရောက်ပေါက်ကွဲပြီးတော့ အိမ်တွေကိုထိတယ်။အဲဒီထဲမှာ ကိုအောင်မြင့်အေး အပါအဝင် ၄ ဦးသေသွားတာ။ကိုအောင်မြင့်အေးကတော့ LGBT တစ်ယောက်ဖြစ်တယ်။ကျန်တဲ့ လူတွေကတော့ နာမည်တွေမသိရသေးဘူးလို့”သူကပြောပါတယ်။
အာရက္ခတပ်တော် နဲ့ စစ်ကောင်စီတပ်တွေဟာ မနေ့က မှာတောင်ကုတ်မြို့ပေါ်ရပ်ကွက်က ကမ္ဘောဇဘဏ်အနီး၊ သံတွဲလမ်းခွဆုံ၊ သိမ်တောင် နဲ့ စကခ၅ တပ်မဌာနချုပ် ရှိရာ အနီးဝန်းကျင်မှာ နှစ်ဖက်တိုက်ပွဲတွေ အပြင်းအထန်ဖြစ်ပွါးခဲ့ပြီး စစ်ကောင်စီလေကြောင်းပစ်ကူ လက်နက်ကြီးပစ်ကူ နဲ့ ဒရုန်းပစ်ကူမြောက်များစွာ နဲ့ တိုက်ခိုက်မှုတွေ လုပ်ဆောင်ခဲ့တယ်လို့ ဆိုပါတယ်။
အဲဒီလို လေကြောင်း၊လက်နက်ကြီး၊ဒရုန်းတွေ နဲ့ ပစ်ခတ်တိုက်ခိုက်ခဲ့တာကြောင့် ကံပိုင်ရပ်ကွက် အတွင်းက စာသင်ကျောင်းကို ကျရောက်ပေါက်ကွဲပြီးတော့ စစ်ဘေးရှောင် ပြည်သူတချို့ ထိခိုက်ဒဏ်ရာ ရရှိတာတွေ ရှိသလို ကမ္ဘောဇဘဏ် အပါအဝင် ရပ်ကွက်အများစုက နေအိမ်တွေဟာလည်း မီးလောင်ပျက်စီးတာတွေ ရှိနေတယ်လို့ ဒေသ သတင်းအရင်းအမြစ်တွေက ပြောပါတယ်။
“တောင်ကုတ်မြို့ထဲမှာလည်း စစ်ကောင်စီ လက်နက်ကြီးတွေ ကျလို့ စစ်ဘေးရှောင်ပြည်သူတွေ ဒဏ်ရာ ရတာတွေ ရှိပါတယ်။ကံပိုင်ရပ်ကွက် အတွင်းက စာသင်ကျောင်းမှာ စစ်ဘေးရှောင်တွေ နေကြတယ် အဲဒီစာသင်ကျောင်းကို လက်နက်ကြီးကျပြီးတော့ စစ်ဘေးရှောင်တွေ ဒဏ်ရာ ရတာတွေ ရှိတယ်။ အေအေ ကတော့ တိုက်ပွဲကြားကနေပြီးတော့ ပြည်သူတွေကို ကယ်ထုတ်နေတာတွေ တော့ရှိတယ်။ပြီးတော့ ကမ္ဘောဇဘဏ် ၊မိခင်နဲ့ ကလေး ဆေးခန်း ၊သိမ်တောင် မူကြိုကျောင်း၊လယ်ယာကုန်သွယ်ရေး ဂိုဒေါင်လည်း မနေ့ညနေက စစ်ကောင်စီလေကြောင်းက ဗုံးကြဲတိုက်ခိုက်လို့ မီးလောင်တာတွေ ရှိနေတယ်လို့”ဆိုပါတယ်။
ဒါ့အပြင် မြို့အနီးဝန်းကျင်က ကျေးရွာတွေဖြစ်တဲ့ ဒုံကျေးရွာ၊ ကြိုးကြာကွင်းကျေးရွာ၊ ကမ်းဒေးကျေးရွာ တွေကိုလည်း စစ်ကောင်စီက လက်နက်ကြီးတွေ နဲ့ ပစ်ခတ်တာလေကြောင်းတိုက်ခိုက်တာ ဒရုန်း နဲ့ ဗုံးကြဲတိုက်ခိုက်တာတွေကြောင့် ကျေးရွာအတွင်းက နေအိမ်တွေ မီးလောင်နေတာတွေလည်းရှိသလို ရန်ခိုကွက်သစ်ကိုလည်း စစ်ကောင်စီတပ်တွေက ဝင်ရောက်မီးရှို့တာတွေ ရှိနေတာကြောင့် နေအိမ်အများအပြားမီးလောင်ပျက်စီးနေရတယ်လို့ ဒေသသတင်းအရင်းအမြစ်ကဆိုပါတယ်။
တောင်ကုတ်မြို့နယ် အတွင်းမှာ စစ်ကောင်စီတပ်တွေ နဲ့ အာရက္ခတပ်တော် တို့ဟာ ပြီးခဲ့တဲ့ နိုဝင်ဘာလ ၁ ရက်နေ့ကတည်းကပင် နှစ်ဖက်တိုက်ပွဲတွေ အပြင်းအထန် ဖြစ်ပွားခဲ့ကြပြီး စစ်ကောင်စီတပ်စခန်းတွေ ဖြစ်တဲ့ ပန်းမြောက်တောင် နဲ့ အာလိန်ငါးဆင့်မှာရှိတဲ့ စစ်ကောင်စီရဲ့ ခံစစ်တပ်စခန်းတွေကို အာရက္ခတပ်တော်က သိမ်းပိုက်ခဲ့ပါတယ်။
အဲဒီနောက်မှာတော့ အာရက္ခတပ်တော် အေအေဟာ တောင်ကုတ်မြို့ အတွင်းမှာ ရှိတဲ့ စစ်ကောင်စီတပ်ရင်းတွေ ဖြစ်တဲ့ စကခ ၅ တပ်မဌာနချုပ် နဲ့ ခမရ ၃၄၆, ၅၄၄ တပ်ရင်းတွေကို ဒရုန်းတွေ၊ရှော့တိုက်ဒုံးတွေ နဲ့ ဆက်လက်ထိုးစစ်ဆင်တိုက်ခိုက်တာတွေကို ဆက်လက်လုပ်ဆောင်လာနေတာ ဖြစ်ပါတယ်။
