CNA၊မြတ်သူ။
တိုက်ပွဲတွေ ပြင်းထန်နေတဲ့ တောင်ကုတ်မြို့အတွင်းက မြို့ရဲ့ ၇၀ ရာခိုင်နူန်းလောက်ကို အာရက္ခတပ်တော် က ထိန်းချုပ်ထားနိုင်ပြီးဖြစ်တယ်လို့ စစ်ရေး သတင်းအရင်းအမြစ်တွေ နဲ့ နီးစပ်သူတွေဆီက သိရပါတယ်။
တောင်ကုတ်မြို့နယ် အတွင်းက စစ်ကောင်စီတပ်စခန်းတွေကို အာရက္ခတပ်တော် ဟာ ပြီးခဲ့တဲ့ နိုဝင်ဘာလ ၁ ရက်နေ့ကတည်းက စတင်ထိုးစစ်ဆင်ဝင်ရောက်တိုက်ခိုက်ခဲ့ပြီးနောက် ပန်းမြောက်တောင် နဲ့ အာလိန်ငါးဆင့်မှာရှိတဲ့ စစ်ကောင်စီရဲ့ တပ်စခန်းတွေ ကို အာရက္ခတပ်တော်က သိမ်းပိုက်ရရှိခဲ့ပါတယ်။
အဲဒီနောက်မှာတော့ အာရက္ခတပ်တော် ဟာ တောင်ကုတ်မြို့တွင်းမှာ ရှိနေတဲ့ စစ်ကောင်စီအခြေစိုက်တပ်စခန်းတွေကို ဆက်လက်ထိုးစစ်ဆင်တိုက်ခိုက် ခဲ့ပြီးနောက် တောင်ကုတ်မြို့ ရဲစခန်းကို နိုဝင်ဘာလ ၁၉ ရက်နေ့ မနက်မှာ သိမ်းပိုက်နိုင်ခဲ့ပြီးနောက် လက်ရှိမှာတော့ တောင်ကုတ်မြို့ရဲ့ ၇၀ ရာခိုင်နူန်းလောက်ကိုအာရက္ခတပ်တော်က ထိန်းချုပ်ထားနိုင်ခဲ့ပြီးဖြစ်တယ်လို့ဆိုပါတယ်။
“မြို့ရဲ့ ၇၀ ရာခိုင်နူန်းလောက်ကိုတော့ တပ်တော်ကထိန်းချုပ်လိုက်ပြီ ၊ရဲစခန်းကိုလည်း သိမ်းထားလိုက်ပြီ။ဒီနေ့မှာလည်း စကခ ၅ တပ်မဌာနချုပ် နဲ့ ခမရ ၃၄၆ နဲ့ ၅၄၄တပ်ရင်းတွေကို ဆက်ပြီးတော့ထိုးစစ်ဆင်တိုက်ခိုက်နေတယ်။စစ်ကောင်စီကတော့ လေကြောင်းက ဆက်တိုက် ပစ်ခတ်တာတွေရှိတယ်လို့”သူကပြောပါတယ်။
အဲဒီနောက် ဒီနေ့မှာတော့ အာရက္ခတပ်တော် ဟာ စစ်ကောင်စီအခြေစိုက် တပ်စခန်းဖြစ်တဲ့ စကခ ၅ တပ်မဌာနချုပ် နဲ့ ခမရ ၃၄၆ နဲ့ ၅၄၄ တပ်ရင်းတွေကို ဆက်လက်ထိုးစစ်ဆင်တိုက်ခိုက်နေပြီး မြို့တွင်းမှာ နှစ်ဖက်တိုက်ပွဲတွေ ဆက်လက်ပြင်းထန်နေဆဲဖြစ်တယ်လို့ ဆိုပါတယ်။
တဖက်မှာလည်း စစ်ကောင်စီကတော့ တောင်ကုတ်မြို့ကို လက်မလွတ်ရဖို့အရေးအတွက် လေကြောင်းတိုက်ခိုက်မှုကို ဆက်တိုက်လုပ်ဆောင်နေတာတွေ ရှိနေပြီး စစ်ကောင်စီပစ်ခတ်လိုက်တဲ့ လက်နက်ကြီးကျည်တွေ ကျရောက်ပေါက်ကွဲမှုတွေကြောင့် ဒေသခံအရပ်သားပြည်သူတွေဟာလည်း ထိခိုက်သေဆုံးမှုတွေ ရှိနေသလို ပြည်သူပိုင် အဆောက်အဦးတွေလည်း မီးလောင်ပျက်စီးမှုတွေ များစွာရှိနေတယ်လို့ ဆိုပါတယ်။
အာရက္ခတပ်တော် ကတော့တိုက်ပွဲပြင်းထန်နေတဲ့ ကြားကနေ မြို့တွင်းရပ်ကွက်တွေဖြစ်ကြတဲ့ သိမ်တောင်၊ချောင်းကောက် ၊ ဂူတာ၊ ကံပိုင် နဲ့ ၄ ရပ်ကွက် အတွင်းက ပြည်သူတွေ စစ်ပွဲ နဲ့ ဘေးလွတ်ရာနေရာတွေကို ပြောင်းရွေ့ပေးနေတာတွေကိုလည်း လုပ်ဆောင်ပေးနေတာတွေ ရှိနေတယ်လို့လည်း ဆိုပါတယ်။
“မြို့ထဲမှာတော့ ပြည်သူ သောင်းနဲ့ချီပိတ်မိနေတာတွေတော့ရှိနေသေးတယ်။ တပ်တပ်တော်ကလည်း ကယ်ထုတ်နေတယ် အခုက စစ်ကောင်စီက တိုက်ပွဲ ဖြစ်တဲ့နေရာလို့ မဟုတ်မဘူး ဗုံးကြဲနေတာက ရတဲ့နေရာကို ကြဲတော့ ပြည်သူတွေလည်းထိခိုက်တာတွေ ရှိနေတယ်။ပြည်သူပိုင်ပစ္စည်းတွေလည်း မီးလောင်တာတွေလည်း ရှိနေတယ်လို့”သူကပြောပါတယ်။
စစ်ကောင်စီက အဲဒီလို ပစ်ခတ်တာတွေကြောင့် ပြီးခဲ့တဲ့ နိုဝင်ဘာလ ၁၉ ရက်နေ့ကလည်း တောင်ကုတ်မြို့နယ် အတွင်းက သိမ်တောင်ရပ်ကွက် နဲ့ ချောင်းတစ်ဖက်တစ်ကမ်းမှာ ရှိတဲ့ သင်္ချီကိုင်းကျေးရွာက လက်နက်ကြီးကျည်ကျရောက်ပြီးတော့ ကိုအောင်မြင့်အေး အပါအဝင် ဒေသခံ ၄ သေဆုံးတာရှိခဲ့ပါတယ်။
တောင်ကုတ်မြို့နယ် အတွင်းက ဒေသခံ ပြည်သူအများစုဟာ မြို့တွင်းတိုက်ပွဲမဖြစ်ခင်ကတည်းကပင် စစ်ပွဲ နဲ့ ဘေးလွတ်ရာနေရာတွေကို ထွက်ပြေးဖို့အတွက် ပြင်ဆင်တာတွေကို လုပ်ဆောင်ခဲ့ကြပေမယ့် စစ်ကောင်စီ တပ်တွေက ထွက်သွားခွင့်မပေးခဲ့တာကြောင့် ပြည်သူအများစုဟာ မြို့တွင်းမှာ ပိတ်မိနေကြရတာဖြစ် ပြီး လက်ရှိမှာလည်း သောင်းနဲ့ချီတဲ့ ပြည်သူတွေဟာ ပိတ်မိနေဆဲ ဖြစ်တယ်လို့ လည်း သိရပါတယ်။
