CNA၊ ဟိန်းထက်။
အမ်းမြို့နယ်အတွင်းက မှာ အာရက္ခတပ်တော်က သိမ်းပိုက်ဖို့ ကျန်ရှိနေသေးတဲ့ စစ်ကောင်စီတပ်စခန်း ၁၀ ခုထဲကို တပ်စခန်းတစ်ခုကို အာရက္ခတပ်တော် က ထပ်မံသိမ်းပိုက်ထားနိုင်ခဲ့တယ်လို့ စစ်ရေးသတင်းအရင်းမြစ်တွေကပြောပါတယ်။
အဲဒီသိမ်းပိုက်ရရှိလိုက်တဲ့ စစ်ကောင်စီတပ်စခန်းကတော့ ခမရ (၃၇၁) ခြေမြန်တပ်ရင်းဖြစ်ပြီးတော့ အဲဒီတပ်ရင်းကို အာရက္ခတပ်တော်က နိုဝင်ဘာလ ၁၈ ရက်နေ့မှာ အပြီးသတ်သိမ်းပိုက်ရယူခဲ့တာဖြစ်တယ်လို့ စစ်ရေး သတင်းအရင်းအမြစ်ကပြောပါတယ်။
“ထူးခြားမှုကတော့ တပ်တော်က စစ်ကောင်စီတပ်စခန်းတွေထဲက အဲဒီ ခမရ – ၃၇၁ ကို နိုဝင်ဘာလ ၁၈ ရက်နေ့ ညနေမှာ သိမ်းပိုက်တာပေါ့နော်။တိုက်ပွဲတွေကတော့ အခုလည်း ဖြစ်နေတယ်။စစ်ကောင်စီကတော့ လေကြောင်း ပစ်ကူတွေ နဲ့ အပြင်းအထန်တိုက်ခိုက်တာတွေတော့ ရှိနေတာပေါ့နော်။ မြို့တွင်းပျက်စီးမှုက ရှိပါတယ်။ ကျနော်တို့ သိရသလောက်တော့ မြို့တွင်းမှာလည်း လက်နက်ကြီးတွေပစ်လို့ လေကြောင်းပစ်လို့ နေအိမ်တွေပျက်စီးတာ လူတွေ ထိခိုက်သေဆုံးတာတွေတော့ ရှိတယ်လို့ သိရတယ်။ဒါပေမယ့် အခုကတော့ အတိအကျမသိရဘူးပေါ့နော်လို့”သူကပြောပါတယ်။
လက်ရှိမှာတော့ အာရက္ခတပ်တော် ဟာ အမ်းမြို့နယ်တစ်ခုလုံးကို အပြီးသတ်သိမ်းပိုက်ရရှိနိုင်ဖို့အတွက် စစ်ကောင်စီတပ်ရဲ့ နပခ-အနောက်ပိုင်းတိုင်း စစ်ဌာနချုပ် ၊အပါအဝင် ဆလအခွဲ (၉၄၆) – အမှတ် (၉၄၆) ဆောက်လုပ်ရေးအင်ဂျင်နီယာတပ်ခွဲ၊ခမရ (၃၇၂) – အမှတ် (၃၇၂) ခြေမြန်တပ်ရင်း၊လလစ (၇၅၇/၂) – အမှတ် (၇၅၇/၂) လျှပ်စစ်အလုပ်ရုံတပ်ခွဲ ၊ထပခ (၉၂၆) – အမှတ် (၉၂၆) ထောက်ပံ့နှင့်ပိုဆောင်ရေးတပ်ခွဲ၊ ဆသလ (၉) – အမှတ် (၉) ဆက်သွယ်ရေးလုံခြုံမှုတပ်ရင်း၊ အဆရ (၈) – အမှတ် (၈) အဆင့်မြင့်ဆက်သွယ်ရေးတပ်ရင်း၊ တထခ (၁၀) – အမှတ် (၁၀) တပ်ထိန်းတပ်ခွဲ နဲ့ စအရ (၉၁၉) – အမှတ် (၉၁၉) စစ်မြေပြင်အင်ဂျင်နီယာတပ်ရင်းတွေသာ ကျန်ရှိတော့တာလည်းဖြစ်တယ်လို့ ဆိုပါတယ်။
တဖက်မှာလည်း စစ်ကောင်စီတပ်တွေဟာ အကျအရှုံးများစွာ နဲ့ ဆက်တိုက်ရင်ဆိုင်လာရတာကြောင့် စစ်မတိုက်လိုတော့ပဲ အာရက္ခတပ်တော် ဆီမှာ အလင်းဝင်တာ ထွက်ပြေးတာတွေ မြောက်များစွာရှိနေတယ်လို့လည်း အဲဒီစစ်ရေး သတင်းအရင်အမြစ်ကပြောပါတယ်။
“စစ်ကောင်စီတပ်တွေထွက်ပြေးတာ အလင်းဝင်တာကတော့ အရင်ကလည်းရှိတယ်အခုလည်းရှိတယ်။အခုပိုများလာတယ် အေအေ နဲ့ အဆက်အသွယ်မရနိုင်လို့ တောထဲမှာ ပြေးရင်းနဲ့ ဖမ်းမိတဲ့ တပ်သားတွေလည်း ရှိတယ်။ တစ်ဖက်က ပူးပေါင်းတပ်တွေဆီမှာ လက်နက်ချအညံ့ခံတာတွေလည်း ရှိနေတယ်။စစ်ကောင်စီကတော့ ရိက္ခတွေကို ရဟတ်ယာဉ်နဲ့ လာပို့တာ စစ်လက်နက်တွေကို ရဟတ်ယာဉ် နဲ့ လာချပေးတာတွေလည်းရှိတယ်။အဲဒီလို ချပေးတဲ့ ပစ္စည်းတွေ များစွာကိုလည်း အေအေကသိမ်းဆည်းရမိတာ ရှိတယ်လို့”သူကပြောပါတယ်။
ရခိုင်ပြည်နယ်မှာ စစ်ကောင်စီနဲ့ အာရက္ခတပ်တော်AAကြား တိုက်ပွဲစတင်ခဲ့ ပြီး တစ်နှစ်တာ အတွင်းမှာ ရခိုင်ပြည်နယ်က မြို့နယ် ၁ဝခုနဲ့ ချင်းပြည်နယ်က ပလက်ဝမြို့နယ်တွေကို AAဘက်က သိမ်းပိုက်ရရှိထားခဲ့ပြီး အမ်း၊တောင်ကုတ်၊ဂွ နဲ့ မောင်တော မြို့နယ်တွေက စစ်ကောင်စီတပ်စခန်းများစွာကိုလည်း အာရက္ခတပ်တော် က သိမ်းပိုက်ထားနိုင်ခဲ့ပြီးဖြစ်ပါတယ်။
ဒါ့အပြင် တိုက်ပွဲ ဖြစ်ပွါးခြင်းမရှိသေးတဲ့ မာန်အောင် အပါအဝင် ၊ကျောက်ဖြူ၊စစ်တွေ စတဲ့မြို့နယ်တွေကိုလည်း အာရက္ခတပ်တော်က ဆက်လက်ထိုးစစ် ဆင်တိုက်ခိုက်သွားမယ်လို့ ထုတ်ပြန်ပြောဆိုထားပါတယ်။
