CNA၊နိုဝင်ဘာ၊ ၂၃။
စစ်ကောင်စီက ပြီးခဲ့တဲ့ နိုဝင်ဘာလ ၂၀ ရက်နေ့က အသစ်ဖွဲ့စည်းလိုက်တဲ့ မြန်မာနိုင်ငံ သတင်းမီဒီယာကောင်စီ ဖွဲ့စည်းလိုက်တာကိုကန့်ကွက်တယ်လို့ လွတ်လပ်သော မြန်မာသတင်းစာဆရာများ အစည်းအရုံး (IMJA) နဲ့ လွတ်လပ်သော မြန်မာသတင်းမီဒီယာ ကောင်စီ (IPCM) က နိုဝင်ဘာလ ၂၂ ရက်နေ့မှာ ထုတ်ပြန်ပြောဆိုလာပါတယ်။
အခုစစ်ကောင်စီက ဖွဲ့စည်းလိုက်တဲ့ သတင်းမီဒီယာကောင်စီဟာ သတင်းမီဒီယာတွေ နဲ့ သတင်းသမားတွေ အပေါ်မှာ ဖိနှိပ်ဖို့ နဲ့ သတင်းလွတ် လပ်ခွင့်ကိုချုပ်ချယ်ဖို့အတွက် စစ်ကောင်စီအလိုကျ ဖွဲ့စည်းလိုက်ခြင်းသာဖြစ်ပြီး ဒီစစ်ကောင်စီက ဖွဲ့စည်းလို့တဲ့ သတင်းမီဒီယာကောင်စီဟာသတင်းလွတ်လပ်ခွင့်ကို တန်ဖိုးထားမှာ မဟုတ်သလို စစ်ကောင်စီရဲ့ ဝါဒဖြန့် ယန္တရားလည်ပတ်စေရေးအတွက်သာ လုပ်ဆောင်မှာဖြစ်တယ်လို့ IMJA ရဲ့ ထုတ်ပြန်ချက်က ဆိုပါတယ်။
လွတ်လပ်သော မြန်မာသတင်းမီဒီယာ ကောင်စီ (IPCM) ကလည် ဒီအဖွဲ့အစည်းဟာ လွတ်လပ်သော မြန်မာသတင်းမီဒီယာသမားတွေကို ကိုယ်စားမပြုဘဲ စစ်ကောင်စီ သက်ဆိုးရှည်ရေး နဲ့ ဝါဒဖြန့်ချိရေး ယန္တရားကိုသာ ပိုမိုခိုင်မာစေဖို့ နဲ့ နိုင်ငံတကာကို သတင်းမှား ဖြန့်ချိရေးလုပ်ဆောင်ဖို့အတွက်သာ ဆောင်ရွက်တာဖြစ်တဲ့ အတွက် အပြင်းအထန် ကန့်ကွက်တယ်လို့ဆိုပါတယ်။
ဒါ့အပြင် လက်ရှိ စစ်ကောင်စီလက်အောက်မှာ ဖွဲ့စည်းလိုက်တဲ့ သတင်းမီဒီယာကောင်စီ ဥက္ကဋ္ဌ ဒေါက်တာ ဦးတင်ထွန်းဦးဟာ စစ်တပ်ရဲ့လက်ဝေခံဖြစ်တဲ့ ပြည်ထောင်စုကြံ့ခိုင်ရေးနှင့် ဖွံ့ဖြိုးရေးပါတီက ရွေးကောက်ခံကိုယ်စားလှယ်လောင်း တစ်ဦးဖြစ်ပြီး အတွင်းရေးမှူး ဦးအေးချမ်းဟာလည်း ရေတပ်ဦးစီးချုပ်ဟောင်းရဲ့ သားဖြစ်တာကို ထောက်ရှုခြင်းအားဖြင့် စစ်ကောင်စီအကျိုးစီးပွားကိုသာ ကာကွယ်ပေးပြီး သတင်းမီဒီယာလွတ်လပ်ခွင့် နဲ့ သတင်းသမားတွေ လုံခြုံရေးအတွက် ဘယ်လိုမှ ရပ်တည်နိုင်မှာ မဟုတ်ဘူးဆိုတာကို ယုံကြည်တယ်လို့လည်း IPCM က ဆိုပါတယ်။
စစ်ကောင်စီက ၂၀၂၁ ခုနှစ် အာဏာသိမ်းပြီးနောက်မှာ စစ်ကောင်စီလက်အောက်ခံ ပြန်ကြားရေးဝန်ကြီးဌာနက သတင်းမီဒီယာတွေကို အာဏာသိမ်းအစိုးရလို့ မသုံးနှုန်းဖို့ ဖိအားပေးပြီးခဲ့ပြီးနောက်မှာ သတင်းမီဒီယာကောင်စီ အဖွဲ့ဝင် (၂၆) ဦးထဲက (၂၄) ဦးဟာ နှုတ်ထွက်ခဲ့တာကိုလုပ်ဆောင်ခဲ့ပါတယ်။
