အမ်းကို စစ်ကူလာတဲ့ စစ်ကောင်စီစစ်ကြောင်း ကို အာရက္ခတပ်တော် နဲ့ ပူးပေါင်းတပ်တွေက ကြားဖြတ်တိုက်ခိုက်တာကြောင့် အမ်းမြို့ နဲ့ ၂ မိုင်ခန့်အကွာ လဒ်ကိုရိုး ( ဒေသအခေါ်) ဆိုတဲ့ နေရာမှာ ဒီနေ့မနက်ပိုင်းကတည်းကပင် နှစ်ဖက်တိုက်ပွဲတွေ ဖြစ်ပွားနေတယ်လို့ စစ်ရေးသတင်းအရင်းအမြစ်တွေဆီက သိရပါတယ်။
အဲဒီစစ်ကြောင်းဟာ ပြီးခဲ့တဲ့ ရက်ပိုင်းအတွင်းကပင် မကွေးကနေ အမ်းမြို့ နယ် ကို စစ်ကူလာနေတဲ့ စစ်ကြောင်းတစ်ကြောင်းဖြစ်ပြီး အဲဒီစစ်ကြောင်းမှာ စစ် အင်အား ၄၀၀ ဝန်းကျင်ပါတယ်လို့ ဆိုပါတယ်။
“တိုက်ပွဲဖြစ်နေတဲ့နေရာနဲ့ အမ်းနဲ့က ၂မိုင်လောက်ပဲကွာတယ်။တိုက်ပွဲဖြစ်တာကတော့ ဒီနေ့မနက်ပိုင်းမှစဖြစ်တာ။တိုင်းဌာနချုပ်ကို အာရက္ခတပ်တော်က လက်နက်ကြီး လက်နက်ငယ်တွေနဲ့ ပစ်ခတ်တိုက်ခိုက်နေတာကတော့ ခုထိပါပဲ”လို့ အမ်းမြို့နယ်အတွင်းက စစ်ရေးလေ့လာစောင့်ကြည့်သူတစ်ဦးက ပြောပါတယ်။
လက်ရှိမှာ အာရက္ခတပ်တော်ဟာ အမ်းမြို့ကို ၉၀ ရာခိုင်နူန်းသိမ်းပိုက်ထားပြီးနောက် အနောက်ပိုင်းတိုင်း စစ်ဌာနချုပ်(နပခ)ကိုအပြင်းအထန် ထိုးစစ်ဆင်တိုက်ခိုက်နေချိန်မှာ လေကြောင်းက စစ်ကူပို့မရတော့တာကြောင့် ကုန်း ကြောင်းကနေ နပခ ဌာနချုပ်ကိုကာကွယ်ဖို့အတွက် စစ်ကူပို့လာတာလည်း ဖြစ်ပါတယ်။
ဒီမနက်မှာလည်း အာရက္ခတပ်တော်ဟာ အမ်းနပခ ဌာနချုပ်ကို အပြင်းအထန် တိုက်ခိုက်နေတာရှိနေပြီး စစ်ကောင်စီကလည်း လက်နက်ကြီးတွေ နဲ့ ပြန်လည် ခုခံတိုက်ခိုက်နေတာကြောင့် နှစ်ဖက်တိုက်ပွဲ ဖြစ်ပွားနေတာရှိတယ်လို့ ဆိုပါတယ်။
“ဒီနေ့လည်း နပခကို အဖက်ဖက်က ထိုးစစ်ဆင်တိုက်ခိုက်နေတယ်။စစ်ကောင်စီကလည်း ပြန်ပစ်ခတ်နေတယ်။ စစ်ကောင်စီဘက်က လေကြောင်း ပစ်ကူခေါ်တာကိုမတွေ့ရဘူး ဒီနေ့ အရင်ရက်တွေက လေကြောင်းပစ်ကူ ပေးတဲ့ နေရာမှာ လေကြောင်းတိုက်ခိုက်မှုလုပ်တိုင်း စကစက သူ့လူသူသတ်နေသလိုဖြစ်နေတယ်။ သူလူတွေကိုထိနေတာရှိလို့ ဒီနေ့ လေကြောင်းပစ်ကူ မခေါ်တော့တာလို့ သိရတယ်လို့” စစ်ရေးလေ့လာစောင့်ကြည့်သူက ပြောပါတယ်။
မနေ့ နိုဝင်ဘာ ၂၃ရက်နေ့တုန်းကလည်း အမ်းရိုးပေါက်က ဆင်းလာတဲ့ စစ်ကောင်စီရဲ့ အဆိုပါ စစ်ကူစစ်ကြောင်းကို ပူးပေါင်းတပ်တွေကမိုင်းဆွဲတိုက်ခိုက်ခဲ့သေးတယ်လို့ သိရပါတယ်။
လက်ရှိအမ်းမြို့သိမ်းတိုက်ပွဲမှာတော့ မြို့ရဲ့ ၉၀ရာခိုင်နှုန်းလောက်ကို အာရက္ခတပ်တော်က သိမ်းပိုက်ထိန်းချုပ်ထားတယ်လို့သိရပြီး၊ အနောက်ပိုင်းတိုင်း စစ်ဌာနချုပ်(နပခ)ကိုတော့ လက်နက်ကြီး၊ လက်နက်ငယ်တွေနဲ့ ဝိုင်းဝန်းပိတ်ဆို့ပစ်ခတ်နေဆဲဖြစ်တယ်လို့ သတင်းအရင်းအမြစ်တွေက ဆိုပါတယ်။
အမ်းမြို့တွင်းမှာ ပိတ်မိနေတဲ့ အရပ်သားပြည်သူတွေကို မြို့ထဲကထွက်ဖို့နဲ့ အာရက္ခတပ်တော်ကကယ်ထုတ်တာတွေလုပ်နေတယ်လို့လည်း သိရပါတယ်။
