CNA၊ဂူးဂူး။
မနေ့က နိုဝင်ဘာလ ၂၇ ရက်နေ့ မနက် ၁၁ နာရီလောက်မှာ သံတွဲမြို့ နန်းချောင်းကျေးရွာကို စစ်ကောင်စီက လေကြောင်းက ဗုံးကြဲတိုက်ခိုက်ခဲ့တာကြောင့် အရပ်သားပြည်သူ ၈ ဦးဒဏ်ရာ ရရှိခဲ့တယ်လို့ သိရပါတယ်။
ဒဏ်ရာ ရရှိသွားတဲ့ ဒေသခံ တွေကတော့ နန်းချောင်းကျေးရွာဒေသခံတွေ ဖြစ်ကြတဲ့ အသက် ၄၀ အရွယ် ဦးကျော်လင်းသူ ၊ အသက် ၁၇ နှစ်အရွယ် မအေးသန္တာထွေး နဲ့ အဲဒီကျေးရွာအတွင်းမှာ စစ်ဘေးရှောင်ရောက်နေကြတဲ့ ဂျိတ္တောရွာက အသက် ၇၁ နှစ်အရွယ် ဒေါ်ခင်ဝင်း ၊ အသက် ၂၄ နှစ်အရွယ် ကိုအောင်ခန့်ကျော် ၊ အသက် ၅၈ နှစ်အရွယ် ဦးမောင်ရင်သိန်း နဲ့ လင်းသာကျေးရွာက စစ်ဘေးရှောင်ရောက်နေကြတဲ့ အသက် ၁၇ နှစ်အရွယ် မောင်ခန့်ပိုင်စိုး ၊အသက် ၁၇ နှစ်အရွယ် မအိမြင့်မြတ်ဖြိုး နဲ့ အသက် ၅၀ အရွယ် ဒေါ်ငယ်ရီ တို့ဖြစ်ကြတယ်လို့ဆိုပါတယ်။
စစ်ကောင်စီ ဂျက်ဖိုက်တာက ကြဲချလိုက်တဲ့ ဗုံးသီးတွေဟာ နန်းချောင်းကျေးရွာ အထဲကို ကျရောက်ပေါက်ကွဲတဲ့အပြင် နန်းချောင်းလျှပ်စစ်ဓာတ်အားခွဲရုံးထဲကို ပါကျရောက်ပေါက်ကွဲ ခဲ့တာကြောင့် အဆောက်အဦးတွေလည်း ပျက်စီးသွားတာ ရှိခဲ့ရတယ်လို့ ဒေသခံ တစ်ဦးက CNA ကိုပြောပါတယ်။
“ဟုတ်ပါတယ် ရွာကိုလည်းကျတယ် ပြီးတော့ လျှပ်စစ်ဓာတ်အားခွဲရုံးကိုလည်း ကျတယ် ။သွားတော့ မကြည့်ဖြစ်ဘူး ကျနော်ကတော့ လျှပ်စစ်ရုံးမှာလည်း ပျက်စီးသွားတာတွေ ရှိတယ်လို့ ပြောကြတယ်။တာဝန်ရှိသူတွေကတော့ ဒဏ်ရာရ လူနာတွေကို ဆေးကုသပေးတာတွေ ရှိနေတယ်လို့သိရတယ်လို့”သူကဆိုပါတယ်။
သံတွဲမြို့ဟာ အာရက္ခတပ်တော် က သိမ်းပိုက်ထားတာ ၅ လဝန်းကျင်အထိကြာမြင့်နေပြီး ဖြစ်ပေမယ့် စစ်ကောင်စီက လေကြောင်းတိုက်ခိုက်မှု မကြာခဏဆိုသလို လုပ်ဆောင်ခံနေရတဲ့ မြို့နယ် တစ်ခုလည်းဖြစ်ပါတယ်။
ပြီးခဲ့တဲ့ နိုဝင်ဘာလ ၂၄ ရက်နေ့ကလည်း သံတွဲမြို့နယ် အတွင်းက သစ်ငုတ်တိုကျေးရွာကို စစ်ကောင်စီက လေကြောင်းက ဗုံးကြဲတိုက်ခိုက်တာ လုပ်ဆောင်ခဲ့တာကြောင့် ဒေသခံပြည်သူကလေးငယ် ၁ ဦးသေဆုံးတာ ရှိခဲ့သလို ဒဏ်ရာ ရသူ ၃ ဦးရှိခဲ့ပါတယ်။
ရခိုင်မှာ စစ်ကောင်စီဟာ ဇွန်လ ကနေ စက်တင်ဘာလ အထိ လေကြောင်းတိုက်ခိုက်မှု အကြိမ်ရေ ၁၈၉ ကြိမ် ပြုလုပ်ခဲ့တာ ရှိခဲ့ပြီး အဲဒီတိုက်ခိုက်မှု အတွင်းမှာ ကလေးငယ် ၇ ဦး နဲ့ အမျိုးသမီး ၂၃ ဦးအပါအဝင် စုစုပေါင်း အရပ်သားပြည်သူ ၁၇၃ ဦးသေဆုံးခဲ့ရသလို ဒဏ်ရာ ရသူစုစုပေါင်းဟာလည်း ၁၉၄ ဦးရှိခဲ့တယ်လို့ သွေးစွန်းငွေ ဖြတ်တောက်ရေး လှုပ် ရှားမှုအဖွဲ့ ရဲ့ အစီခံစာရဲ့ ဖော်ပြချက်အရသိရပါတယ်။
