(တိုက်ပွဲအတွင်းသေဆုံးတဲ့ အရာရှိတွေကို ဂွမြို့ပေါ်မှာ သင်္ဂြိုပေးနေရ)
အာရက္ခတပ်တော်(AA)ရဲ့ထိုးစစ်ဟာ ယခုရက်ပိုင်းအတွင်းမှာ ဂွမြို့ နဲ့ ၆ မိုင်ခန့်အကွာမှာရှိတဲ့ အလယ်ချောင်းကျေးရွာ အနီးကိုရောက်ရှိလာပြီဖြစ်တယ်လို့
ဂွမြို့ဒေသခံတွေက ဒီနေ့မှာ CNAသတင်းဌာနကို ပြောပါတယ်။
အာရက္ခတပ်တော်ရဲ့ ထိုးစစ်ဟာ ဂွမြို့နဲ့နီးကပ်လာတဲ့အတွက် စစ်ကောင်စီဘက်ကလည်း ဂွမြို့နယ်အတွင်းမှာရှိတဲ့ စစ်စခန်းတွေကို အခိုင်အမာတည်ဆောက်တာ၊လက်နက်အသစ်တွေ ထပ်မံတိုးချဲ့တပ်ဆင်တာနဲ့ တိုက်ပွဲဖြစ်နေတဲ့ အလယ်ချောင်းရွာအနီးကို ဒီကနေ့မှာ လက်နက်ကြီးပစ်ကူပေးတာတွေ ဆက်တိုက်လုပ်ဆောင်နေတယ်လို့ ဆိုပါတယ်။
“လက်နက်ကြီးတွေအသစ်တပ်ဆင်တာတွေ စစ်အင်အားဖြည့်တာတွေကတော့ ဆက်တိုက်ရှိနေတယ်။ဒီနေ့ ညနေမှာလည်း လက်နက်ကြီးတွေ အလယ်ချောင်းဖက်က တိုက်ပွဲဖြစ်နေတဲ့ နေရာကို ဆက်တိုက်ပစ်ကူပေးနေတာတော့ရှိတယ်။ တိုက်ပွဲကတော့ ကမ်းသာယာက စပြီးတော့ အလယ်ချောင်းထိကြားမှာဖြစ်နေတာတွေရှိနေတယ်လို့” ဂွမြို့ ဒေသခံကပြောပါတယ်။
ဒါ့အပြင် စစ်ကောင်စီက ဂွမြို့အတွင်းမှာနေတဲ့ ဒေသခံပြည်သူတွေရဲ့ နေအိမ်ကို ညအချိန်ဝင်ရောက်စစ်ဆေးတာတွေလုပ်ဆောင်နေပြီး စစ်ဘေးရှောင်ထွက်ခွင့်ကိုလည်း တားမြစ်ကန့်သတ်တာတွေ လုပ်ဆောင်နေတယ်လို့ သိရပါတယ်။
“အခုက ညဖက်တွေမှာ စစ်ကြောင်းတွေဝင်ပြီး လူနေအိမ်တွေကို စစ်ဆေးတာတွေရှိတယ် ပြီးတော့ စစ်ဘေးရှောင်ဖို့ထွက်တဲ့သူတွေကိုလည်းတင်း တင်းကြပ်ကြပ်စစ်ဆေးတာတွေရှိတယ်။ပြီးတော့ စစ်ပွဲအတွင်းမှာ သေသွားတဲ့ အရာရှိတွေကိုလည်း ဂွမြို့မှာ မီးသင်္ဂြိုပေးတာတွေရှိနေတယ်လို့”သူကဆိုပါတယ်။
နိုဝင်ဘာလ ၂၅ ရက်နေ့တုန်းက အာရက္ခတပ်တော်ဟာ ဂွမြို့နယ်၊ ကင်းပုံကျေးရွာမှာတပ်စွဲထားတဲ့ စစ်ကောင်စီတပ်စခန်းကို သိမ်းပိုက်ရရှိခဲ့ပါတယ်။
အဲဒီနောက် ကင်းပုံကျေးရွာအတွင်းက ထွက်ပြေးလာတဲ့စစ်ကောင်စီတပ်သားတွေဟာ နိုဝင်ဘာလ ၂၅ ရက်နေ့ညမှာပဲ ကင်းပုံတံတားကို မိုင်းခွဲဖျက်ဆီးခဲ့လို့ ကင်းပုံတံတားပျက်စီးခဲ့ရပါသေးတယ်။
CNA၊ဂူးဂူး။
