CNA၊ဟိန်းထက်။
အမ်းမြို့ အနောက်ပိုင်းတိုင်းစစ်ဌာနချုပ် နပခ လက်အောက်ခံ တစ်မိုင်ကုန်း စခန်းက တပ်ဆုတ်ထွက်ပြေးလာတဲ့ ဗိုလ်မှူး ဇော်ထက်နောင် အပါအဝင် စစ်ကောင်စီတပ်သား ၁၄ ဦးကို အရှင်ဖမ်းဆီးရမိခဲ့ပြီး နောက်ထပ် ၂ ဦးကို လည်း အသေဖမ်းဆီးရမိခဲ့တယ်လို့ ကျောင်းသားလက်ရုံးတပ်က ဒီနေ့မှာ သတင်းထုတ်ပြန်လာပါတယ်။
ထုတ်ပြန်ချက်ထဲမှာ” ၂၀၂၄ ခုနှစ်၊ နိုဝင်ဘာ (၂၃) ရက်နေ့က အနောက်ပိုင်းစစ်ဌာနချုပ် (အမ်း) ကွပ်ကဲမှု လက်အောက်မှာရှိတဲ့ တစ်မိုင်ကုန်းစခန်းကဆုတ်ခွာလာတဲ့ ဗိုလ်မှူး ဇော်ထက်နောင် (ကြည်း ၅၆၁၇၈) ဦးစီးတဲ့ ရန်သူစစ်ကြောင်းကို ကျွန်ုပ်တို့ ကျောင်းသားလက်ရုံးတပ်တော်နဲ့ မဟာမိတ်ပူးပေါင်းစစ်ကြောင်းက အမ်း-ပဒါန်း လမ်းတစ်နေရာတွင် စောင့်ကြိုပြီး
ပိတ်ဆို့တိုက်ခိုက်ခဲ့ရာ ရန်သူနဲ့ ထိတွေ့တိုက်ပွဲ ဖြစ်ပွားခဲ့တာကြောင့် ရန်သူ (၂ ) ဦးကျဆုံးပြီး သုံ့ပန်း (၁၄)ဦး နဲ့ လက်နက်ငယ် (၂) လက် နှင့် ခဲယမ်း တို့အား တိုက်ပွဲတွင်း သိမ်းဆည်းရမိခဲ့တယ်လို့”ဖော်ပြထားပါတယ်။
အဲဒီထွက်ပြေးလာတဲ့ စစ်ကောင်စီစစ်ကြောင်းကို ကျောင်းသားလက်ရုံးတပ်တော် (SAF) နဲ့ အတူ အရှိုချင်းကာကွယ်ရေးတပ်ဖွဲ့ (ACDF)၊ မင်းဘူးခရိုင် အမှတ် (၂) တပ်ရင်းတို့ကပူးပေါင်းပါဝင် တိုက်ခိုက်ခဲ့တာဖြစ်တယ်လို့ ဆိုပါတယ်။
ဒါ့အပြင်ဖမ်းဆီးရမိထားတဲ့စစ်သုံ့ပန်းတွေကိုလည်းလိုအပ်တဲ့ဆေးဝါးကုသမှုတွေ ဆောင်ရွက်ပေးထားပြီး စစ်သုံ့ပန်းမူဝါဒနဲ့အညီ ထိန်းသိမ်းစောင့်ရှောက်ထားတယ်လို့ဆိုပါတယ်။
စစ်ကောင်စီစစ်ကြောင်းဟာလက်ရှိမှာ တိုက်ပွဲတွင်း မှာဖွဲ့စည်းပုံပျက်ပြီး တကွဲတပြားစီ ထွက်ပြေးနေတာတွေရှိနေကြပြီး အဲဒီလို ထွက်ပြေးနေတဲ့ သူတွေကိုလည်း ကျောင်းသားလက်ရုံးတပ်တွေက နယ်မြေရှင်းလင်းရေးတွေ လုပ်နေတယ်လို့လည်းဆိုပါတယ်။
