CNA ၊ မြတ်သူ။
တိုက်ပွဲ ဖြစ်ပွါးတာ မရှိတဲ့ တောင်ကုတ်မြို့နယ် အတွင်းက ခရိုင်ကျေးရွာကို စစ်ကောင်စီက မနေ့က ဒီဇင်ဘာလ ၁ ရက်နေ့ ညမှာ လေကြောင်း ကဗုံးကြဲတိုက်ခိုက်ခဲ့တာကြောင့် စစ်ဘေးရှောင်ပြည်သူ ၂ ဦးသေဆုံးပြီး ၂၀ ကျော်ဒဏ်ရာ ရရှိခဲ့တယ်လို့ ဒေသခံတွေကပြောပါတယ်။
သေဆုံးသွားတဲ့ သူ ၂ ဦးကတော့ တောင်ကုတ်မြို့ သာယာအေးကျေးရွာက စစ်ဘေးရှောင်နေတဲ့ အသက် ၁၇ နှစ်အရွယ် မောင်ကျော်သက်နိုင် နဲ့ ဆေးရုံကွက်သစ်ရပ်ကွက်က အသက် ၇၀ ကျော်အရွယ် ဒေါ်မသိန်းတို့ဖြစ်ကြတယ်လို့ ဆိုပါတယ်။
နောက်ထပ် ဒဏ်ရာ ရရှိသွားတဲ့ သူ ၂၀ ထဲမှာလည်း ခရိုင်ကျေးရွာ အတွင်းကို စစ်ဘေးရှောင်ရောက်နေသူတွေ အများစုပါဝင်တယ်လို့ တောင်ကုတ် ဒေသခံတစ်ဦးကပြောပါတယ်။
“ကျနော်သိသလောက်ကတော့ စစ်ရှောင် ၂ ဦးက ပွဲချင်းပြီးသေတယ်။ကျန်တဲ့ ၂၀ ကျော်ကတော့ ဒဏ်ရာရတယ် ဒဏ်ရာပြင်းထန်တဲ့ သူတွေထဲမှာလည်း စိုးရိမ်ရတဲ့ လူတွေပါနေတယ်။ရွာထဲကို တည့်တည့်ကျတာလို့သိရတယ်။ဘာကြောင့်ကြဲလဲဆိုတာတော့ မသိဘူး”လို့ သူကပြောပါတယ်။
လက်ရှိမှာ ဒဏ်ရာရ လူနာတွေကို နီးစပ်ရာ ဆေးခန်းတွေမှာ ဆေးဝါးကုသတာတွေ လုပ်ဆောင်ပေးတာတွေ ရှိနေပေမယ့် ဆေးဝါးလုံလောက်မှုတွေ မရှိတဲ့ အတွက် အခက်အခဲတွေ နဲ့ ရင်ဆိုင်နေကြရတယ်လို့ ဆိုပါတယ်။
အာရက္ခတပ်တော် ဟာ တောင်ကုတ်မြို့ အပါအဝင် စစ်ကောင်စီတပ်စခန်းများစွာကို အပြီးသတ် သိမ်းပိုက်ထားပြီးနောက်မှာ ကျန်ရှိနေသေးတဲ့ စစ်ကောင်စီရဲ့ စကခ – ၅ စစ်ဌာနချုပ်ကို ဆက်လက်ထိုးစစ်ဆင်တိုက်ခိုက်နေပြီး စစ်ကောင်စီက မြေပြင် စစ်အင်အား မရှိတော့တဲ့ အတွက်လေကြောင်းကို အသုံးပြုကာ တိုက်ခိုက်တာတွေကို ဆက်တိုက်လုပ်ဆောင်တာတွေ ရှိနေတယ်လို့ ဆိုပါတယ်။
စစ်ကောင်စီဟာ အဲဒီလို လေကြောင်း ပစ်ကူပေး တိုက်ခိုက်တဲ့နေရာမှာလည်း အာရက္ခတပ်တော်ကို ဦးတည်တိုက်ခိုက်တာမဟုတ်ပဲ ရခိုင်ဒေသခံပြည်သူတွေ ကို ဦးတည်တိုက်ခိုက်တာမျိုးကို လုပ်ဆောင်နေတာကြောင့် ပြည်သူတွေ ထိခိုက်သေဆုံးတာ၊နေအိမ်တွေ များစွာ မီးလောင်ပျက်စီးတာတွေ ရှိနေတယ်လို့ တောင်ကုတ်မြို့ စစ်ရေး အခြေအနေကို စောင့်ကြည့်နေသူ တစ်ဦးကပြောပါတယ်။
“စစ်ကောင်စီအခုတိုက်ခိုက်တာက အေအေ ကိုတိုက်ခိုက်တာမျိုးမဟုတ်တော့ဘူး ပြည်သူတွေ နဲ့ ပြည်သူပိုင် ပစ္စည်းတွေကို ဖျက်ဆီးတိုက်ခိုက်နေတာလို့ မြင်တယ်။မနေ့ကလည်း တောင်ကုတ်မြို့ကို လေကြောင်းတိုက်ခိုက်တာတွေ ဆက်တိုက်လုပ်တယ် တောင်ကုတ်မြို့ပေါ်က နေအိမ်တွေ ဟိုတယ်တွေ အကုန်မီးလောင်ပျက်စီးတယ်။တိုက်ပွဲဖြစ်တာက စကခ – ၅ မှာ ဖြစ်နေတာ အဲဒါကို အဲဒီနေရာကို သွားမပစ်ပဲ မြို့ထဲက နေရာတွေကို ဗုံးလိုက်ကြဲနေတယ်။ဒါက စစ်တိုက်တာ မဟုတ်တော့ဘူး မြို့ရွာတွေကို ဖျက်ဆီးနေတာလို့ မြင်တယ်လို့”သူက ပြောပါတယ်။
ဒါ့အပြင် စစ်ကောင်စီဟာ တောင်ကုတ်မြို့နယ် အတွင်းမှာ တိုက်ပွဲ စတင်းမဖြစ်ပွါးခင်ကတည်းကပင် အပြစ်မဲ့ အရပ်သားနေထိုင်ရာ နေရာတွေကို လေကြောင်းဗုံးကြဲတိုက်ခိုက်တာတွေ ဆက်တိုက်လုပ်ဆောင်ခဲ့တာကြောင့် ပြည်သူတွေထိခိုက်သေဆုံးမှုတွေ များစွာရှိခဲ့ရပါတယ်။
အဲဒီလို စစ်ကောင်စီက ပြည်သူတွေကိုလေကြောင်း၊လက်နက်ကြီး၊လက်နက်ငယ်တွေ နဲ့ ဦးတည်တိုက် ခိုက်တာ ဆက်တိုက်လုပ်ဆောင်ခဲ့တဲ့ အတွက် ရခိုင်တကျော့ပြန်တိုက်ပွဲ စတင်ခဲ့တဲ့ ၂၀၂၃ ခုနှစ် နိုဝင်ဘာလ ၁၃ ရက်နေ့ကပင် ၂၀၂၄ ခုနှစ် နိုဝင်ဘာလလ ၁၃ ရက်နေ့အထိ အရပ်သားပြည်သူ ၇၀၀ကျော် သေဆုံးခဲ့ရပြီး ဒဏ်ရာ ရသူ ၁၅၀၀ ကျော် ရှိခဲ့ရတယ်လို့ HDCO ရဲ့ ထုတ်ပြန်ချက် စာရင်းအရ သိရပါတယ်။
