CNA ၊ ဖီးနစ်။
မနေ့က ဒီဇင်ဘာလ ၃ ရက်နေ့ ညနေ ၈ နာရီလောက်က တောင်ကုတ်မြို့မဈေးအပါအဝင် တောင်ကုတ်မြို့တစ်ခုလုံးကိုစစ်ကောင်စီက လေကြောင်းက ဗုံးကြဲဖျက်ဆီးတာကိုလုပ်ဆောင်ခဲ့တယ်လို့ ဒေသခံသတင်းအရင်းအမြစ်တွေကပြောပါတယ်။
အဲဒီလို လေကြောင်းဗုံးကြဲတိုက်ခိုက်မှုကြောင့် တောင်ကုတ် မြို့မဈေးက ဆိုင်ခန်းပေါင်း ၅၀ကျော်ပျက်စီးခဲ့ရသလို အဲဒီအနီးဝန်းကျင်က နေအိမ်တွေ လည်း များစွာပျက်စီးခဲ့ရတယ်လို့ တောင်ကုတ်ဒေသခံ တစ်ဦးက CNAကိုပြောပါတယ်။
“လေကြောင်းဗုံးကြဲလို့ မြို့မဈေးဆိုင်ခန်း ၅၀ ကျော်ပျက်စီးတယ် ဈေးအနားကအိမ်တွေလည်းပျက်စီးတယ် ပြီးတော့ တောင်ကုတ်ညဈေးမှာလည်း ဆိုင်ခန်း၂၀လောက် ပျက်စီးသွားတယ် ပြီးတော့ ဦးအောင်ဇေယျလမ်း၊ညောင်ပင်ကြီးအနားကအိမ်တွေ၊ အင်းခုံတောင်ဖက်ခြမ်း၊ ဆေးရုံကွက်သစ်၊ ကြိုးကြာကွင်းရွာ၊ နေရာတော်တော်များများကအိမ်တွေ အဆောက်အဦးတွေထိခိုက်ပျက်စီးတယ်။အဲဒီနေရာတွေ အကုန်လုံးက တပြိုင်နက်တည်း ဗုံးကြဲဖျက်ဆီးခံရတာ ဖြစ်တယ်”လို့သူကပြောပါတယ်။
အာရက္ခတပ်တော်ဟာ တောင်ကုတ်မြို့သိမ်းတိုက်ပွဲကို နိုဝင်ဘာလ ၄ ရက်နေ့မှာ စတင်ထိုးစစ်ဆင်တိုက်ခိုက်ခဲ့ပြီး ၁၇ ရက်အကြာ နိုဝင်ဘာလ ၂၀ ရက်နေမှာ တောင်ကုတ်မြို့ အတွင်းက ရဲစခန်းအပါအဝင် မြို့တွင်းနေရာ တော်တော်များများကို အပြီးသတ်သိမ်းယူနိုင်ခဲ့ပါတယ်။
အဲဒီနောက်မှာတော့စစ်ကောင်စီဟာ သူတို့ လက်လွတ်ဆုံရှုံးလိုက်ရတဲ့ မြို့တစ်ခုလုံးကို လေကြောင်းက ဗုံးကြဲဖျက်ဆီးတာကို လုပ်ဆောင်တော့တာ ဖြစ်တယ်လို့ တောင်ကုတ်မြို့ဒေသခံ တစ်ဦးက ဆိုပါတယ်။
“တောင်ကုတ်ကို အာရက္ခတပ်တော်က သိမ်းပိုက်ပြီးကတည်းကပင်တော့ စစ်ကောင်စီက မြို့တစ်ခုလုံးကို နေ့စဉ် ဗုံးကြဲဖျက်စီးနေတာပါ။မြို့တစ်ခုလုံးလည်း ဘာမှမကျန်တော့ဘူး။ပြည်သူတွေကို အာရက္ခတပ်တော်က ကယ်ထုတ်ထားလို့ ဘေးလွတ်ရာမှာ ရှိနေကြလို့ တော်သေးတယ်လို့”သူကပြောပါတယ်။
လက်ရှိမှာလည်း အာရက္ခတပ်တော်ဟာ တောင်ကုတ်မြို့နယ်အတွင်းက သိမ်းပိုက်ဖို့ ကျန်ရှိနေသေးတဲ့ စကခ – ၅ စစ်ကောင်စီတပ်စခန်းကိုဆက်လက်ထိုးစစ်ဆင် တိုက်ခိုက်နေပြီး စစ်ကောင်စီတပ်တွေ နဲ့ အာရက္ခတပ်တော်တို့ ဟာ နှစ်ဖက်တိုက်ပွဲတွေ ဆက်လက်ဖြစ်ပွါးနေဆဲ ဖြစ်တယ်လို့ ဆိုပါတယ်။
ပြီးခဲ့တဲ့ဒီဇင်ဘာလ ၁ ရက်နေ့ကလည်း ခရိုင်ကျေးရွာကို စစ်ကောင်စီကလေကြောင်းဗုံးကြဲတိုက်ခိုက်တာကို လုပ်ဆောင်ခဲ့တာကြောင့် စစ်ဘေးရှောင်ပြည်သူ ၂ ဦးသေဆုံးပြီး ၂၀ ကျော်ဒဏ်ရာ ရရှိခဲ့ပါတယ်။
