CNA၊ဟိန်းထက်။
အမ်းမြို့နယ်အတွင်းမှာ ရှိတဲ့ စစ်ကောင်စီရဲ့ အနောက်ပိုင်းတိုင်းစစ်ဌာနချုပ် နပခ ထဲမှာ ရှိနေတဲ့ စစ်ကောင်စီတပ်တွေ ဟာ အာရက္ခတပ်တော် ရဲ့ ဝိုင်းဝန်းပိတ်ဆို့တိုက်ခိုက်မှုကြောင့် မြေအောက်ခန်း အထဲမှာ ပိတ်မိနေကြရတယ်လို့ စစ်ရေး သတင်းအရင်းအမြစ်တွေဆီက သိရပါတယ်။
အာရက္ခတပ်တော်ဟာ အမ်းမြို့နယ် အတွင်းမှာ ရှိနေတဲ့ စစ်ကောင်စီရဲ့ ဗျူဟာဌာနချုပ်၊ ကာကင်းစခန်းကြီး၊ စခန်းငယ်၊ တပ်ရင်းဌာနချုပ်၊ တပ်ခွဲအသီးသီးအပါအဝင် တခြားသောနေရာတွေမှာ တပ်စွဲစခန်းချ၊ ခုခံစစ်ဆင်နွဲှနေကြတဲ့ စခန်းနေရာ (၃၀) ကျော်ထဲက စခန်းအားလုံးကို အပြီး သတ်သိမ်းပိုက်ရရှိထားပြီး လက်ရှိမှာ စစ်ကောင်စီရဲ့ နပခဌာနချုပ် ဂွင်တစ်ခုသာ သိမ်းပိုက်ဖို့အတွက်ကျန်ရှိတော့တာလည်း ဖြစ်ပါတယ်။
အဲဒီသိမ်းပိုက်ဖို့ကျန်နေသေးတဲ့ စစ်ကောင်စီရဲ့ နပခ တိုင်းစစ်ဌာနချုပ်ကိုလည်း အာရက္ခတပ်တော်ဟာ အပြီးသတ်သိမ်း ပိုက်ရရှိနိုင်ဖို့အတွက် ဆက်လက်ထိုးစစ်ဆင်တိုက်ခိုက်နေတဲ့ အတွက် အဲဒီ နပခ အထဲမှာ ရှိနေတဲ့ စစ်ကောင်စီတပ်တွေ ဟာ နပခ ထဲမှာ ရှိနေတဲ့ မြေအောက်ခန်းထဲမှာ ပိတ်မိနေတာဖြစ်တယ်လို့ စစ်ရေး သတင်းအရင်းအမြစ်ကပြောပါတယ်။
“နပခ ဂွင်ထဲက စခန်းတော်တော်များများကိုလည်း အာရက္ခတပ်တော်က ထိန်းချုပ်ထားလိုက်ပြီး အခုက နပခရဲ့ မြေအောက်ခန်းထဲမှာ ရှိနေတဲ့ စစ်ကောင်စီတပ်ဖွဲ့ အနည်းငယ်လောက်သာ ရှိတော့တယ်။သူတို့ တွေ က အဲဒီအထဲမှာ ပိတ်မိနေတာ ဖြစ်တယ်။လေကြောင်းက ပစ်ခတ်တာတွေပဲ ရှိတော့တယ်။ပြီးတော့ အသေခံဒရုန်းတွေ နဲ့ တိုက်ခိုက်တာတော့ ရံဖန်ရံခါရှိတယ်လို့”သူကပြောပါတယ်။
စစ်ကောင်စီဟာ အမ်းနပခကို လက်မလွတ်ရရေးအတွင် မြေပြင်စစ်ကူပေးပို့တာတွေ ကို လုပ်ဆောင်ခဲ့ပေမယ့် အာရက္ခတပ်တော် ရဲ့ ကြားဖြတ်တိုက်ခိုက်ခဲ့တာကြောင့် စစ်ကူပို့လိုက်တဲ့ စစ်ကြောင်းဟာ အမ်းကို မရောက်ရှိလိုက်ပဲ လမ်း မှာပဲ အဲဒီစစ်ကောင်စီတပ်သားတွေဟာ သေဆုံးခဲ့ကြရပါတယ်။
ဒါကြောင့် စစ်ကောင်စီဟာ လက်ရှိမှာ အမ်း နပခ အတွင်းမှာ ကျန်ရှိနေတဲ့ စစ်ကောင်စီတပ်ဖွဲ့ဝင်တချို့ဟာ မြေအောက်ခန်းမှာ ပိတ်မိနေရတဲ့ အတွက် စစ်ကောင်စီက လေကြောင်း ပစ်ကူ နဲ့ အသေခံဒရုန်းတွေကို အသုံး ပြုပြီးတော့တိုက်ခိုက်နေရတာလည်း ဖြစ်ပါတယ်။
