Home လေကြောင်းတိုက်ခိုက်မှု လေကြောင်းတိုက်ခိုက်မှု တောင်ကုတ် စကခ -၅ ထဲမှာ နှစ်ဖက်တိုက်ပွဲပြင်းထန်နေပြီး စစ်ကောင်စီလေကြောင်းတိုက်ခိုက်မှုကြောင့် မြို့တွင်းနေအိမ်တွေ မီးလောင်ပျက်စီးမှုရှိနေ

တောင်ကုတ် စကခ -၅ ထဲမှာ နှစ်ဖက်တိုက်ပွဲပြင်းထန်နေပြီး စစ်ကောင်စီလေကြောင်းတိုက်ခိုက်မှုကြောင့် မြို့တွင်းနေအိမ်တွေ မီးလောင်ပျက်စီးမှုရှိနေ

59
0
ပုံ ၊ဒီဇင်ဘာလ ၉ ရက်နေ့က စစ်ကောင်စီလေကြောင်းတိုက်ခိုက်ခဲ့တာကြောင့် မီးလောင်ပျက်စီးခဲ့ရတဲ့ တောင်ကုတ်မြို၊ ကံပိုင်ရပ်ကွက်က ဒေသခံပြည်သူများနေအိမ်မြင်တွေ့ ရမှု။ APM

CNA၊ဟိန်းထက်။

တောင်ကုတ်မြို့နယ် အတွင်းက စစ်ကောင်စီရဲ့ လက်ကျန်တမ်းစခန်းတစ်ခုဖြစ်တဲ့ စကခ – ၅ ထဲမှာ စစ်ကောင်စီတပ်တွေ နဲ့အာရက္ခတပ်တော် တို့ ဟာ မနေ့က ဒီဇင်ဘာလ ၉ ရက်နေ့မှာ နှစ်ဖက်တိုက်ပွဲပြင်းထန်နေပြီး စစ်ကောင်စီလေကြောင်းက ဗုံးကြဲတိုက်ခိုက်မှုကြောင့် မြို့တွင်းက နေအိမ်တွေမီးလောင်ပျက်စီးခဲ့ရတယ်လို့ စစ်ရေး သတင်းအရင်းအမြစ်တွေက ပြောပါတယ်။

“မနေ့က စကခ ဌာနချုပ်ထဲမှာ တိုက်ပွဲတွေ ပြင်းပြင်းထန်ထန်ဖြစ်ခဲ့တယ်။ နှစ်ဖက် အနီးကပ်ဖြစ်တာ တပ်တော်က အဲဒီအထဲကို ရောက်သွားပြီး နယ်မြေရှင်းလင်းရေး ပုံစံမျိုး နဲ့ ဝင်နေတာ။အဲဒီမှာ တွေ့ပြီးတော့ နှစ်ဖက် အနီးကပ်တိုက်ပွဲတွေဖြစ်ကြတာ။ စစ်ကောင်စီကတော့ စစ်ကူပို့လို့တော့မရတော့ဘူး။လေကြောင်း ပစ်ကူပေးတာတွေကိုတော့ ဆက်တိုက်လုပ်ခဲ့တယ်လို့” စစ်ရေး သတင်းအရင်းအမြစ်ကပြောပါတယ်။

အဲဒီလို စစ်ကောင်စီက လေကြောင်းပစ်ကူဆက်တိုက်လုပ်တဲ့ နေရာမှာ မြို့တွင်းက အရပ်သားပြည်သူတွေရဲ့ နေအိမ်တွေ ရှိတဲ့ နေရာတွေကိုမှာ ပြစ်မှတ်ထား ဗုံးကြဲတိုက်ခိုက်တာကို လုပ်ဆောင်ခဲ့တဲ့ အတွက် မြို့တွင်းက နေအိမ်တွေလည်း အများအပြား မီးလောင်ပျက်စီးတာတွေ ရှိခဲ့ရတယ်လို့ အဲဒီ စစ်ရေး သတင်းအရင်းအမြစ်က ပြောပါတယ်။

အာရက္ခတပ်တော်ဟာ တောင်ကုတ်မြို့သိမ်းတိုက်ပွဲကို နိုဝင်ဘာလ ၄ ရက်နေ့မှာ စတင်ထိုးစစ်ဆင်တိုက်ခိုက်ခဲ့ပြီး ၁၇ ရက်အကြာ နိုဝင်ဘာလ ၂၀ ရက်နေမှာ တောင်ကုတ်မြို့ အတွင်းက ရဲစခန်းအပါအဝင် မြို့တွင်းနေရာ တော်တော်များများကို အပြီးသတ်သိမ်းယူနိုင်ခဲ့ပါတယ်။

အဲဒီနောက်မှာ စစ်ကောင်စီဟာ တောင်ကုတ်မြို့တစ်ခုလုံး ပျက်စီးစေရေရည်ရွယ်ချက် နဲ့ မြို့တွင်းမှာ ရှိတဲ့ အဆောက်အဦးများစွာကို နေ့စဉ်ရက်ဆက် လေကြောင်းက ဗုံးကြဲတိုက်ခိုက်ဖျက်ဆီးတာတွေကို လုပ်ဆောင်နေတာတွေ ရှိနေတယ်လို့လည်း ဆိုပါတယ်။

ပြီးခဲ့တဲ့ ဒီဇင်ဘာလ ၃ ရက်နေ့ကလည်း စစ်ကောင်စီဟာ တောင်ကုတ်မြို့မဈေးအပါအဝင် မြို့တွင်းက ဦးအောင်ဇေယျလမ်း၊ညောင်ပင်ကြီးအနားကအိမ်တွေ၊ အင်းခုံတောင်ဖက်ခြမ်း၊ ဆေးရုံကွက်သစ်၊ ကြိုးကြာကွင်းရွာ၊ နေရာတော်တော်များများလေကြောင်းက ဗုံးကြဲဖျက်ဆီးခဲ့တာကြောင့် ဈေး အတွင်းက ဆိုင်ခန်းတွေ နဲ့ ရပ်ကွက် အတွင်းက လူနေအိမ်များစွာဟာ မီးလောက်ပျက်စီးသွားခဲ့ရပါတယ်။

LEAVE A REPLY

Please enter your comment!
Please enter your name here