CNA၊မြတ်သူ။
တောင်ကုတ်မြို့မှာ အကြောင်းအမျိုးမျိုးကြောင့်ဖမ်းဆီးခံထားရတဲ့ အချုပ်သား ၂၀၀ ကျော်ကို စစ်ကောင်စီက လူသားဒိုင်းအနေနဲ့ စကခ – ၅ ဌာနချုပ်ထဲကို ပြောင်းရွှေ့ကာ ပိတ်လှောင်ထားတယ်လို့ စစ်ရေးသတင်းအရင်းအမြစ်တွေဆီက သိရပါတယ်။
စစ်ကောင်စီတပ်တွေဟာ အဲဒီအချုပ်သား ၂၀၀ ကျော်ကို အာရက္ခတပ်တော်က တောင်ကုတ်မြို့ မသိမ်းခင်မှာ စကခ – ၅ ထဲကို ပြောင်းရွှေ့သွားတာဖြစ်တယ်လို့ တောင်ကုတ်မြို့ စစ်ရေး သတင်းအရင်းအမြစ်ကပြောပါတယ်။
“သူတို့က တပ်တော်က မြို့သိမ်းတိုက်ပွဲမလုပ်ခင်မှာ အဲဒီအချုပ်သား ၂၀၀ ကျော်ကို စကခ – ၅ ထဲကို ပြောင်းသွားတယ်။အခုက မြို့လည်း သိမ်းထားပြီးပြီ၊ သူတို့ တပ်စခန်းတော်တော်များများကိုလည်း သိမ်းလိုက်ပြီ အဲဒီ စကခ – ၅ တစ်ခုပဲကျန်တော့တာ။အဲဒီထဲမှာကလည်း နေရာတော်တော်များများကို အာရက္ခတပ်တော်က သိမ်းထားတယ်။အခုအချုပ်သားတွေကို လူသားဒိုင်းလုပ်ပြီးတော့ စစ်ကောင်စီက ပြန်ခုခံနေတယ်။ဒါဟာ အချုပ်သားတွေအတွက် တော်တော်စိုးရိမ်စရာကောင်းတဲ့ အနေအထားမှာရှိနေတယ်လို့”သူကပြောပါတယ်။
အာရက္ခတပ်တော်ဟာ တောင်ကုတ်မြို့သိမ်းတိုက်ပွဲကို နိုဝင်ဘာလ ၄ ရက်နေ့မှာ စတင်ထိုးစစ်ဆင်တိုက်ခိုက်ခဲ့ပြီး ၁၇ ရက်အကြာ နိုဝင်ဘာလ ၂၀ ရက်နေ့မှာ တောင်ကုတ်မြို့ အတွင်းက ရဲစခန်းအပါအဝင် မြို့တွင်းနေရာ တော်တော်များများကို အပြီးသတ်သိမ်းယူနိုင်ခဲ့ပါတယ်။
အဲဒီနောက် တောင်ကုတ်မြို့ အတွင်းက စစ်ကောင်စီရဲ့ စကခ – ၅ လက် အောက်ခံတပ်ရင်းတွေ ဖြစ်တဲ့ ခမရ – ၃၄၆၊ ခမရ – ၅၄၄ တပ်ရင်းတွေက စစ်ကောင်စီတပ်ဖွဲ့ဝင် အင်အား ၄၀၀ နီးပါးဟာ နိုဝင်ဘာလ ၂၇ ရက်နေ့မှာ အလံဖြူထောင်ကာ လက်နက်ချ အညံ့ခံခဲ့တာရှိပြီး လက်ရှိမှာ အဲဒီ စကခ – ၅ ဌာနချုပ်တစ်ခုသာ ကျန်ရှိတော့တာလည်း ဖြစ်ပါတယ်။
အဲဒီကျန်နေသေးတဲ့ စကခ – ၅ ကို အပြီးသတ်သိမ်းပိုက်နိုင်ဖို့အတွက် ဆက်လက်ထိုးစစ်ဆင်တိုက်ခိုက်နေပြီး မနေ့က ဒီဇင်ဘာလ ၉ ရက်နေ့မှာတော့ စကခ – ၅ ထဲမှာ ရှိနေတဲ့ စစ်ကောင်စီတပ်ဖွဲ့ဝင်တွေ နဲ့ အာရက္ခတပ်တော် တို့ဟာ နှစ်ဖက်တိုက်ပွဲတွေ အပြင်းအထန်ဖြစ်ပွားခဲ့ပါတယ်။
ဒီလို နှစ်ဖက်တိုက်ပွဲ ဖြစ်ပွားချိန်မှာ စစ်ကောင်စီက လေကြောင်းကနေ ဗုံးကြဲတိုက်ခိုက်မှုလုပ်ဆောင်ခဲ့တာကြောင့် တောင်ကုတ်မြို့ ကံပိုင်ရပ်ကွက် နဲ့ သံတွဲလမ်းခွဆုံအနီးက နေရာတွေကို လေကြောင်းက တိုက်ခိုက်တဲ့ ဗုံးသီးတွေ ကျရောက်ပေါက်ကွဲကာ နေအိမ်တွေ အများအပြားဟာလည်း မီးလောင်ပျက်စီးခဲ့ရပါတယ်။
