CNA၊မြတ်သူ။
မောင်တောက နခခ – ၅ စခန်းသိမ်းတိုက်ပွဲ အတွင်းမှာ စစ်ကောင်စီတပ်သား ၄၅၀အထက်သေဆုံးခဲ့ရပြီး ဘူးသီးတောင်မြို၊ အမှတ် (၁၅) စစ်ဆင်ရေးကွပ်ကဲမှုဌာနချုပ် (စကခ-၁၅) စကခမှူး ဗိုလ်မှူးချုပ် သူရိန်ထွန်းအပါအဝင် စစ်ကောင်စီလက်အောက်ခံတပ်ဖွဲ့ဝင် အများအပြားကို ဖမ်းဆီးရမိခဲ့တယ်လို့ အာရက္ခတပ်တော်က မနေ့က သတင်းထုတ်ပြန်ပါတယ်။
အာရက္ခတပ်တော်ရဲ့ ထုတ်ပြန်ချက်ထဲမှာ “ထိုးစစ်အတွင်း မှတ်တမ်းနှင့် သိမ်းဆည်းရမိသော အလောင်း များစာရင်းအရ ရန်သူ (၄၅၀) အထက် သေဆုံးနိုင်ခဲ့ပြီး ဘူးသီးတောင်မြို့၊ အမှတ် (၁၅) စစ်ဆင်ရေးကွပ်ကဲမှုဌာနချုပ် (စကခ-၁၅) စကခမှူး ဗိုလ်မှူးချုပ် သူရိန်ထွန်း၊ ကြည်း/ ၂၆၈၉ရ ၊ စကခမှူး ကိုယ်ရေးအရာရှိ ဗိုလ်ကြီး ဝေလင်းအောင်၊ ကြည်း/၆၁၃၃၅ (တတိယတန်း ဦးစီးအရာရှိ) အပါအဝင် အရာရှိ၊ အကြပ်၊ စစ်သည်အမြောက်အများတို့ နှင့် RSO၊ ARSA၊ ARA နှင့် အကြမ်းဖက် ဖက်ဆစ် စစ်ကောင်စီမှ သင်တန်းပေးထားသည့် အစ္စလာမ်မစ် အစွန်းရောက် စစ်သွေးကြွ လက်နက်ကိုင်တပ်ဖွဲဝင်များအား သုံပန်းများအဖြစ် ဖမ်းဆီးရမိခဲ့သည်။ ထိုအပြင် လက်နက်ခဲယမ်းများနှင့် စစ်အသုံးအဆောင်ပစ္စည်းများကိုလည်း သိမ်းဆည်းရမိခဲ့သည်လို့”အာရက္ခတပ်တော်ရဲ့ ထုတ်ပြန်ချက်ထဲမှာ ဖော်ပြထားသည်။
အာရက္ခတပ်တော်ဟာ အဲဒီ နခခ (၅) စခန်းကို ပြီးခဲ့တဲ့ နှစ်လခန့်ကတည်းကပင် ဝိုင်းရံပိတ်ဆို့ထားခဲ့ပြီးနောက် ၂၀၂၄ ခုနှစ်၊ အောက်တိုဘာလ (၁၄) ရက်နေ့မှာ စတင်ထိုးစစ်ဆင်တိုက်ခိုက်ခဲ့တာဖြစ်ပြီး ထိုးစစ်ရက်ပေါင်း (၅၅) ရက် ခန့်ကြာမြင့်ခဲ့ ပြီးနောက်မှာ သိမ်းပိုက်ရရှိနိုင်ခဲ့တာလည်း ဖြစ်ပါတယ်။
ထိုးစစ်ကာလအတွင်း အာရက္ခစစ်သည်တော် တွေဟာနည်းဗျူဟာ မြောက်စွာ ထိုးစစ်ဆင်နိုင်ခဲ့တဲံ အပြင် တပ်မဟာအချင်းချင်း ဟန်ချက်ညီညီ ပူးပေါင်းထိုးစစ် ဆင်နိုင်ခဲ့တယ်လို့လည်း ဆိုထားပါတယ်။
အဲဒါကြောင့် အာရက္ခတပ်တော်ဟာ မောင်တောမြို့က နောက်ဆုံးလက်ကျန်စခန်းတစ်ခု အဖြစ် ကျန်ရှိနေသေး တဲ့ အမှတ် (၅) နယ်ခြားစောင့် ရဲတပ်ဖွဲခွဲ (နခခ-၅) စခန်းကို ၂၀၂၄ ခုနှစ်၊ ဒီဇင်ဘာလ (၈) ရက်နေ့၊ နံနက် (၉) နာရီ (၃၀) မိနစ်အချိန်မှာ အပြီးသတ်ချေမှုန်းတိုက်ခိုက်နိုင်ခဲ့ပြီး အခုဆိုရင် မောင်တော ဒေသတစ်ခုလုံးကို အပြီးသတ်ထိန်းချုပ်နိုင်ခဲ့ပြီးဖြစ်တယ်လို့ ဆိုပါတယ်။
ဒါ့အပြင် တစ်ဖက်မှာလည်း နခခ (၅) ထဲက လက်နက်ချ အညံ့မခံဘဲ ထွက်ပြေး လွတ်မြောက်နေတဲ့ စစ်ကောင်စီတပ်ဖွဲ့ဝင်တွေ နဲ့ စစ်ကောင်စီလက်အောက်ခံ အဖွဲ့တွေကို အာရက္ခတပ်တော်က လိုက်လံရှာဖွေ ရှင်းလင်းမှုတွေ လုပ်ဆောင်နေတယ်လို့ ဆိုထားပါတယ်။
