မြန်မာစစ်ကောင်စီကို စစ်လေယာဉ်တွေ အဓိကရောင်းချပေးနေတဲ့ တရုတ်ကုမ္ပဏီ Aviation Industry Corporation of China (AVIC)နဲ့ ဆက်ဆံရေးကိုအဆုံးသတ်ဖို့ ပြင်သစ်လေကြောင်းအာကာသကုမ္ပဏီကြီး Airbus SE ရဲ့ စီအီးအို ဂီရွန်ဖောဟိ ဆီကို မြန်မာ့ တော်လှန်ရေး အင်အားစုတွေနဲ့ အရပ်ဘက်အဖွဲ့အစည်း ၃၀၀ ကျော်က အိတ်ဖွင့်ပေးစာ ပေးပို့တောင်းဆိုလိုက်ပါတယ်။
ဒီတောင်းဆိုမှုကို မနေ့ ဒီဇင်ဘာ ၁၀ရက်နေ့တုန်းကတောင်းဆိုလိုက်တာဖြစ်ပြီး ဒီအိတ်ဖွင့်စာထဲမှာ ပြည်တွင်း၊ ပြည်ပကတော်လှန်ရေး အင်အားစုတွေနဲ့ အရပ်ဘက် အဖွဲ့အစည်း (၃၁၁) ဖွဲ့က အိတ်ဖွင့်ပေးစာ ပေးပြီးတော့ တောင်းဆိုလိုက်တာဖြစ်တယ်လို့ သွေးစွန်းငွေ ဖြတ်တောက်ရေး အဖွဲ့ရဲ့ကဆိုထားပါတယ်။
ပြင်သစ်ကုမ္ပဏီ Airbusဟာ တရုတ်ကုမ္ပဏီ AVICရဲ့ အဓိကရင်းနှီးမြှုပ်နှံသူ၊ မိတ်ဖက်ကုမ္ပဏီ ဖြစ်တာကြောင့် စစ်ကောင်စီကို လေယာဉ်နဲ့ လက်နက်တွေရောင်းချပေးနေတဲ့ တရုတ်ကုမ္ပဏီ AVICနဲ့ ပူးပေါင်းဆောက်ရွက်မှုဟာ ပြသနာကြီးဖြစ်တာကို သိရှိရမယ်လို့ အိတ်ဖွင့်ပေးစာက ဆိုပါတယ်။
ဒါပေမယ့် ပြင်သစ်ကုမ္ပဏီ Airbusဟာ တရုတ်ကုမ္ပဏီ AVICနဲ့ ဆက်ပြီးပူးပေါင်းဆောင်ရွက်နေတဲ့အပြင် ဟောင်ကောင် စာရင်းဝင်ကုမ္ပဏီ AviChina Industry & Technology Company Limited ကတဆင့် AVIC ရဲ့ကုမ္ပဏီခွဲတွေမှာ ရင်းနှီးမြှုပ်နှံမှုတွေ ဆက်လက်ထားရှိခဲ့တယ်လို့ ဖော်ပြထားပါတယ်။
ပြင်သစ်ကုမ္ပဏီ Airbusအနေနဲ့ မိမိတို့ကြောင့်ဖြစ်စေ၊ မိမိတို့ ပါဝင်အားဖြည့်မှုကြောင့်ဖြစ်စေ ဖြစ်ပေါ်လာတဲ့ ဒါမှမဟုတ် မိမိတို့ထုတ်ကုန်တွေကို လက်ဝယ်အသုံးပြု
သူတွေ၊ ဘဏ္ဍာရေးရင်းနှီးမြှုပ်နှံမှုတွေ အပါအဝင် မိမိတို့ရဲ့ စီးပွားဆက်ဆံမှုတွေနဲ့ တိုက်ရိုက်ဆက်နွှယ်နေတဲ့ လူ့အခွင့်အရေးအန္တရာယ်တွေ၊ ထိခိုက်နစ်နာမှုတွေကို
ရှာဖွေဖော်ထုတ်ဖို့အတွက် သင့်လျှော်ကောင်းမွန်တဲ့ကြိုတင်စီစစ်မှုတွေကို လုပ်သင့်တယ်လို့လည်း အိတ်ဖွင့်ပေးစာက ဆိုပါတယ်။
မြန်မာနိုင်ငံဟာ အီးယူရဲ့ စစ်လက်နက်ရောင်းချမှု ပိတ်ပင်ရေးပြဌာန်းချက် ချမှတ်ခံထားရတဲ့ နိုင်ငံဖြစ်တဲ့အတွက် ပြင်သစ်ကုမ္ပဏီ Airbusအနေနဲ့ စစ်အုပ်စုရဲ့ လက်နက်ပွဲစားကုမ္ပဏီတွေကို ဘဏ္ဍာရေးဆိုင်ရာ ထောက်ပံမှုတွေ ပေးအပ်တာဟာ အန္တရာယ်ကို ဖိတ်ခေါ်နေတာဖြစ်တယ်လို့ အိတ်ဖွင့်ပေးစာမှာ ရေးသားထားပါတယ်။
တစ်နည်းအားဖြင့် AviChian မှာ ရှယ်ယာတွေပိုင်ဆိုင်ထားတာဟာ Airbus ကုမ္ပဏီအနေနဲ့ စစ်လက်နက်ရောင်းချမှု ပိတ်ပင်ရေး ပြဌာန်းချက်တွေကို ချိုးဖောက်ရာ ရောက်နိုင်တယ်လို့ ဖော်ပြထားပါတယ်။
ဒါကြောင့် ရှယ်ယာတွေပိုင်ဆိုင်ထားတဲ့ ပြင်သစ်ကုမ္ပဏီ Airbusအနေနဲ့ AVIC၊ AviChianတို့ကို မြန်မာစစ်အုပ်စုထံ စစ်လေယာဉ်တွေ၊ စစ်လက်နက်တွေနဲ့ ဆက်စပ်ပစ္စည်းတွေ လက်ရှိရောင်းချနေမှုကို ရပ်တန့်ဖို့ ၊ စစ်ကောင်စီရဲ့ လေတပ်အတွက် လေယာဉ်တွေပေးအပ်တာ ဒါမှမဟုတ်ပေးအပ်ဖို့ ကတိပြုထားတဲ့ ပြုပြင်ထိန်းသိမ်းရေး၊ လေ့ကျင့်သင်ကြားရေးနဲ့ နည်းပညာအကူအညီအားလုံးကို ရပ်ဆိုင်းဖို့အတွက် ဩဇာလွှမ်းမိုးမှုကို အသုံးပြုဖို့ တောင်းဆိုထားပါတယ်။
ပြင်သစ်ကုမ္ပဏီ Airbus အနေနဲ့ တရုတ်ကုမ္ပဏီ AVIC နဲ့ ၎င်းရဲ့ကုမ္ပဏီခွဲတွေအပေါ် လက်ရှိအပါအဝင် အနာဂတ်မိတ်ဖက် ဆောင်ရွက်မှု မှန်သမျှကို ကြိုတင်စီစစ်မှုတွေ တိုးမြှင့်လုပ်ဆောင်သင့်ပြီး အဆိုပါစီစစ်မှုတွေကိုလည်း အများပြည်သူထံကိုထုတ်ပြန်သင့်တယ်လို့လည်း အကြံပြုထားပါတယ်။
ဒါ့အပြင် တရုတ်ကုမ္ပဏီAVIC ဟာ မြန်မာစစ်အုပ်စုနဲ့ စီးပွားရေးလုပ်ငန်းအားလုံးကို ရပ်ဆိုင်းဖို့ ငြင်းဆန်ပါက AviChina မှ ရင်းနှီးမြှုပ်နှံမှုတွေကို ပြင်သစ်ကုမ္ပဏီ Airbus အနေနဲ့ တာဝန်ယူမှုရှိစွာ ရုတ်သိမ်းပြီး ဆက်ဆံရေးကို အဆုံးသတ်ဖို့လည်း တောင်းဆိုထားပါတယ်။
