စကခ – ၅ ကိုပြောင်းရွှေ့လိုက်တဲ့ အချုပ်သား ၂၀၀ ကျော်ထဲက ၁၀ ဦးကျော်ကို စစ်ကောင်စီက ပစ်သတ်

CNA၊မြတ်သူ။

တောင်ကုတ်မြို့မှာ အကြောင်းအမျိုးမျိုးကြောင့်ဖမ်းဆီးခံထားရပြီး စစ်ကောင်စီက လူသားဒိုင်းအနေနဲ့ စကခ – ၅ ဌာနချုပ်ထဲကို ပြောင်းရွှေ့သွားတဲ့ အချုပ်သား ၂၀၀ ကျော်ထဲက ၁၀ ဦးကျော်ကို စစ်ကောင်စီက မနေ့က ပစ်ခတ်သတ်ဖြတ်လိုက်တယ်လို့ ဒေသတွင်း သတင်းအရင်းအမြစ်တွေဆီက သိရပါတယ်။

အာရက္ခတပ်တော်က တောင်ကုတ်မြို့ကို မသိမ်းခင်မှာ

စစ်ကောင်စီတပ်တွေဟာ အဲဒီအချုပ်သား ၂၀၀ ကျော်ကို စကခ – ၅ ထဲကို ပြောင်းရွှေ့သွားတာဖြစ်ပါတယ်။

အဲဒီနောက် မနေ့က နေ့လယ်လောက်မှာတော့ အဲဒီအချုပ်သား ၂၀၀ ကျော်ထဲက ၁၀ဦးကျော်ကို စစ်ကောင်စီတပ်သားတွေက ပစ်သတ်လိုက်တာဖြစ်တယ်လို့ ဒေသတွင်း သတင်းအရင်းအမြစ်တစ်ဦးကပြောပါတယ်။

“သတ်ခံရတာကတော့ သေချာပါတယ်။ထွက်ပြေးလို့ ပစ်သတ်တယ်လို့ဆိုပြီး သတင်းတွေထွက်နေတယ်။ပစ်သတ်ခံရတဲ့ လူနာမည်တွေကိုတော့ မသိရသေးဘူးလို့”သူက ပြောပါတယ်။

စစ်ကောင်စီဟာ အခုလိုအချုပ်သားတွေကို သတ်ဖြတ်တဲ့ လုပ်ရပ်တွေကို မြောက်ဦးမြို့နယ်အတွင်းမှာလည်း လုပ်ဆောင်ခဲ့တာရှိခဲ့ပါတယ်။

အဲဒါကြောင့် လက်ရှိမှာလည်း ကျန်ရှိနေသေးတဲ့ အချုပ်သားတွေ နောက်ထပ်သတ်ဖြတ်ခံရမှာကို စိုးရိမ်ရတဲ့ အနေအထားမှာ ရှိနေတယ်လို့ တောင်ကုတ်ဒေသခံ တစ်ဦးကပြောပါတယ်။

“အဲဒီလိုတော့ ပြောသံကြားနေတယ်။ဘာပဲဖြစ်ဖြစ် အခုက အဲဒီထဲမှာ တိုက်ပွဲတွေဖြစ်နေတယ် အချုပ်သားတွေကလည်း အဲဒီအထဲမှာရှိနေတယ်။စစ်ကောင်စီကတော့ သူတို့ကို ဓားစာခံ အနေ နဲ့ လုပ်ပြီးတော့ သတ်ဖြတ်တာကို လုပ်မှာတော့ စိုးရိမ်တာတော့ တကယ်ပါလို့”သူကဆိုပါတယ်။

အာရက္ခတပ်တော်ဟာ တောင်ကုတ်မြို့သိမ်းတိုက်ပွဲကို နိုဝင်ဘာလ ၄ ရက်နေ့မှာ စတင်ထိုးစစ်ဆင်တိုက်ခိုက်ခဲ့ပြီး ၁၇ ရက်အကြာ နိုဝင်ဘာလ ၂၀ ရက်နေ့မှာ တောင်ကုတ်မြို့ အတွင်းက ရဲစခန်းအပါအဝင် မြို့တွင်းနေရာ တော်တော်များများကို အပြီးသတ်သိမ်းယူနိုင်ခဲ့ပါတယ်။

အဲဒီနောက် တောင်ကုတ်မြို့ အတွင်းက စစ်ကောင်စီရဲ့ စကခ – ၅ လက် အောက်ခံတပ်ရင်းတွေ ဖြစ်တဲ့ ခမရ – ၃၄၆၊ ခမရ – ၅၄၄ တပ်ရင်းတွေကိုလည်း နိုဝင်ဘာလ ၂၇ ရက်နေ့မှာ သိမ်းပိုက်နိုင်ခဲ့ပြီး လက်ရှိမှာ စကခ – ၅ ဌာနချုပ်တစ်ခုသာ ကျန်ရှိတော့တာလည်း ဖြစ်ပါတယ်။

အဲဒီကျန်နေသေးတဲ့ စကခ – ၅ ကို အပြီးသတ်သိမ်းပိုက်နိုင်ဖို့အတွက် ဆက်လက်ထိုးစစ်ဆင်တိုက်ခိုက်နေပြီး စစ်ကောင်စီတပ်တွေ နဲ့ အာရက္ခတပ်တော်တို့ဟာ စကခ – ၅ ထဲမှာ တိုက်ပွဲတွေ ဆက်လက်ဖြစ်ပွားနေပါတယ်။