တောင်ကုတ်မြို့အတွင်းက နောက်ဆုံးသိမ်းပိုက်ဖို့ကျန်ရှိနေတဲ့ စစ်ဆင်ရေးကွပ်ကဲမှုဌာနချုပ် စကခ(၅)ကို အာရက္ခတပ်တော်က သိမ်းပိုက်လိုက်ပြီလို့ စစ်ရေးသတင်းအရင်းအမြစ်တွေက CNAကိုပြောပါတယ်။
ဒီကနေ့ ဒီဇင်ဘာ ၁၄ရက်နေ့မှာ သိမ်းပိုက်လိုက်တာဖြစ်ပြီး စကခ – ၅က တပ်သား ၁၀၀ကျော် လက်နက်ချအညံ့ခံခဲ့သလို ထွက်ပြေးနေတဲ့ စစ်ကောင်စီတပ်သားတွေကိုလည်း အာရက္ခတပ်တော်က လိုက်လံရှင်းလင်းနေတယ်လို့ စစ်ရေးသတင်းအရင်းအမြစ်က ပြောပါတယ်။
“ဒီနေ့ စကခ – ၅ ကို တပ်တော်က သိမ်းလိုက်တယ်။လက်နက်ချအညံ့ခံတဲ့ တပ်သား ၁၀၀ ကျော်ရှိတယ်။ထွက်ပြေးတဲ့ စစ်ကောင်စီတပ်သားတွေကို လိုက်ပြီးတော့ ရှင်းလင်းရေးတွေ လုပ်နေတယ်။အရာရှိတော်တော်များများကလွတ်မြောက်နေတယ်။ထွက်ပြေးနေတဲ့ စစ်ကောင်စီတပ်ဖွဲတွေက ရိုးလမ်းက
ကျောက်တံခါးဖက်ကို ပြေးကြတယ်”လို့ သူကဆိုပါတယ်။
ဒါ့အပြင် စစ်ကောင်စီတပ်သားတွေဟာ ဦးကျောက်တောင်ပိုင်တဲ့ သင်္ဘောဒေါင့်ကျင်းဖက်ကို ထွက်ပြေးတာတွေလည်းရှိနေပြီး၊ ကျောက်တံခါးဘက်မှာဆိုရင် တိုက်ပွဲဖြစ်တာတွေရှိတယ်လို့လည်း သိရပါတယ်။
လက်ရှိမှာတော့ စကခ – ၅မှာ တိုက်ပွဲမရှိတော့ပေမယ့် စစ်ကောင်စီဘက်က လေကြောင်းတိုက်ခိုက်မှုတွေလုပ်နေတယ်လို့ အခြား စစ်ရေးသတင်းအရင်းအမြစ်တစ်ဦးကလည်း ပြောပါတယ်။
“လေကြောင်းတိုက်ခိုက်မှုကတော့ ဆက်တိုက်လုပ်နေတယ်။စကခ -၅ မှာ တိုက်ပွဲမရှိပေမယ့်ထွက်ပြေးနေတဲ့ အကောင်တွေကိုရှင်းလင်းနေတော့ ပစ်ခတ်သံတွေက မြို့ အနီးမှာကြားနေရတယ်”လို့ သူကဆိုပါတယ်။
စကခ – ၅ကို သိမ်းပိုက်တဲ့ဖြစ်စဉ်နဲ့ပတ်သက်ပြီး အာရက္ခတပ်တော်(AA)ဘက်ကတော့ ဒီဇင်ဘာ ၁၄ရက် ညပိုင်းအထိ တစုံတရာထုတ်ပြန်လာတာမျိုးမတွေ့ရသေးပါဘူး။
အလားတူ အမ်းမြို့က စစ်ကောင်စီရဲ့ အနောက်ပိုင်းတိုင်းစစ်ဌာန ချုပ် (နပခ)ကိုလည်း အာရက္ခတပ်တော်က သိမ်းပိုက်လိုက်ပြီလို့ သတင်းတွေထွက်ပေါ်နေပြီး အတည်ပြုနိုင်ခြင်းတော့မရှိသေးပါဘူး။
