မြောက်ပိုင်းအဖွဲ့တွေလက်နက်ချဖို့ ရခိုင်ပြည်နယ်နေ့မှာ မင်းအောင်လှိုင်ပြောဆို

CNA၊ဒီဇင်ဘာ၊ ၁၅။

မြောက်ပိုင်းညီနောင်မဟာမိတ် ၃ဖွဲ့ဖြစ်တဲ့ MNDAA၊ TNLA၊ AAတို့အနေနဲ့ လက်နက်ကိုင်လမ်းစဉ်ကိုစွန့်လွှတ်ပြီး လမ်းကြောင်းမှန်ပေါ်ကိုရောက်ရှိဖို့ မင်းအောင်လှိုင်က ပြောဆိုလာပါတယ်။

ဒီကနေ့ ဒီဇင်ဘာ ၁၅ရက်နေ့မှာကျရောက်တဲ့ နှစ် ၅၀ပြည့် ရွှေရတု အထိမ်းအမှတ်အဖြစ် ရခိုင်ပြည်နယ်နေ့အခမ်းအနားကို ပေးပို့တဲ့ သဝဏ်လွှာမှာ အခုလိုတောင်းဆိုလိုက်တာဖြစ်ပါတယ်။

လက်နက်ကိုင်အကြမ်းဖက်နည်းလမ်းနဲ့ မိမိတို့လိုလားချက်ကို တောင်းဆိုလို့မရနိုင်တဲ့အတွက် နိုင်ငံရေးစားပွဲဝိုင်းကိုလာပြီး ငြိမ်းချမ်းစွာဖြေ‌ရှင်းတဲ့ နည်းနဲ့သာ ပဋိပက္ခတွေကို ပြေလည်စေမယ်ဆိုတာကို သိရှိကြဖို့လိုတယ်လို့ စစ်ရှုံးနေတဲ့ မင်းအောင်လှိုင်က ပြောဆိုလာတာပါ။

၂၀၂၃ ခုနှစ်၊ အောက်တိုဘာလက စခဲ့တဲ့ MNDAA ၊ TNLA ၊ AA တို့ရဲ့ လုပ်ဆောင်ချက်တွေဟာ တိုင်းရင်းသားပြည်သူတွေရဲ့ လူမှုစီးပွားအခြေအနေတွေကို ပိုမိုဆိုးရွားစေခဲ့ပြီး လက်နက်ကိုင် သောင်းကျန်းသူတွေရဲ့ အဖျက်အမှောက်လုပ်ရပ်တွေကြောင့် အပြစ်မဲ့ပြည်သူပေါင်းများစွာ ဆင်းရဲဒုက္ခ ရောက်ခဲ့ကြရတယ်လို့လည်း သဝဏ်လွှာမှာ မင်းအောင်လှိုင်က ပြောဆိုထားပါတယ်။

ပြည်ထောင်စုကြီး ငြိမ်းချမ်းဖို့အတွက်ဆိုရင် NCA လမ်းကြောင်းကိုလျှောက်လှမ်းခြင်းကသာ မိမိတို့အားလုံး မျှော်လင့်ထားတဲ့ အေးချမ်းသာယာတဲ့ နိုင်ငံတော်ကြီးကို တည်ဆောက်နိုင်မှာဖြစ်ပြီး၊ နိုင်ငံတော်အနေနဲ့လည်း ဆွေးနွေးမှုတွေကို ဖိတ်ခေါ်သလို ငြိမ်းချမ်းရေးတံခါးကိုလည်း အမြဲဖွင့်ကြိုဆိုလျက်ရှိတယ်လို့ မင်းအောင်လှိုင်ကဆိုပါတယ်။

“ပြည့်အင်အားသည် ပြည်တွင်းမှာသာရှိသည်” ဆိုတဲ့အတိုင်း တိုင်းရင်းသားပြည်သူအားလုံး စည်းလုံးညီညွတ်တဲ့ စုပေါင်းအားနဲ့ နိုင်ငံ့အကျိုးကို တက်ညီလက်ညီ ဆောင်ရွက်သွားကြဖို့ကိုလည်း မင်းအောင်လှိုင်က ပြောဆိုထားပါတယ်။

လက်ရှိကာလမှာတော့ ရခိုင်ပြည်နယ်အပါအဝင် နိုင်ငံအတွင်းမှာ တည်ငြိမ်အေးချမ်းမှုမရှိတာကို အခွင့်ကောင်းယူပြီး အင်အားကြီးနိုင်ငံတချို့က ဩဇာလွှမ်းမိုးချုပ်ကိုင်လိုတဲ့အတွက် ပြည်တွင်းမတည်မငြိမ်ဖြစ်အောင် ဖန်တီးပုံဖော်နေတာကိုတွေ့ရတယ်လို့လည်း မင်းအောင်လှိုင်က ဆိုထားပါတယ်။

ရခိုင်ပြည်နယ်အတွင်းမှာ ၂၀၂၃ခုနှစ် နိုဝင်ဘာလ ၁၃ရက်နေ့ကစတင်ခဲ့တဲ့ တကျော့ပြန်တိုက်ပွဲတွေကြောင့် တစ်နှစ်ကျော်ကာလအတွင်းမှာ စစ်ကောင်စီဟာ မြို့နယ် ၁၃ခုကိုထိကို လက်လွှတ်ထားရချိန်မှာ အခုလို ပြောဆိုလာတာလည်းဖြစ်ပါတယ်။