CNA၊ဒီဇင်ဘာ၊ ၁၈ ။
ရခိုင်ပြည်နယ်မြောက်ပိုင်းက စစ်ကောင်စီ နယ်ခြားစောင့်တပ်တွေထဲက အဆောက်အဦး တစ်ခုထဲမှာWFP အမှတ်အသားပါတဲ့ ရိက္ခာအိတ်တွေကို သတင်းဖော်ပြချက်တွေ အရ သိရပြီး အခုလို လူထုအတွက် အကူအညီတွေ အပေါ် အလွဲသုံးစား လုပ်တာတွေကို လက်မခံဘူးလို့ ဒီနေ့ ဒီဇင်ဘာ ၁၈ ရက်နေ့မှာ ကမ္ဘာ့စားနပ်ရိက္ခာအစီအစဉ်(WFP) က သတင်းထုတ်ပြန်ပြောဆိုလိုက်ပါတယ်။
အဲဒီ WFP ပါ အမှတ်အသားပါ ဆန်ရိက္ခာအိတ်ပေါင်းထောင်ကျော်ကို ကာဗာကျင်းတွေရဲ့ အကာအရံလုပ်ထားတဲ့ မြင်ကွင်းတွေကို အာရက္ခတပ်တော် က မောင်တောမြို့အခြေစိုက် နခခ – ၅ သိမ်းပိုက်ပြီးနောက်မှာ ရခိုင်အခြေစိုက်သတင်း ဌာန ဖြစ်တဲ့ ABN သတင်းဌာနက မြေပြင်ကွင်းဆင်းရိုက်ကူးခဲ့ပြီးနောက် ဒီဇင်ဘာလ ၈ ရက်နေ့မှာဖော်ပြခဲ့ပါတယ်။
စစ်ကောင်စီအနေနဲ့ အခုလိုထိခိုက်အလွယ်ဆုံးဖြစ်တဲ့ရပ်ရွာလူထုအတွက် ရည်ရွယ်ထားတဲ့ လူသားချင်းစာနာထောက်ထားမှု အကူအညီတွေ အပေါ် အလွဲသုံးစားလုပ်သမျှကိုလက်မခံနိုင်သလို ဒီလိုလုပ်ရပ်ဟာအရေးပေါ်လိုအပ်နေသူတွေအတွက်လည်း ထိခိုက်စေတဲ့ လုပ်ရပ်တစ်ခုဖြစ်တယ်လို့ WFP ကဆိုပါတယ်။
မောင်တောမြို့နယ်အတွင်းမှာရှိတဲ့ WFP ရုံးကို ၂၀၂၄ ခုနှစ် ဇွန်လ ၂၂ ရက်နေ့က စစ်ကောင်စီတပ်တွေ နဲ့ အကြမ်းဖက်မွတ်ဆလင်လက်နက်ကိုင်တပ်တွေဟာ၊ WFP သိုလှောင်ရုံကို ဖောက်ထွင်းလုယက်တာ နဲ့ မီးရှို့ဖျက်ဆီးတာတွေကို လုပ်ဆောင်ခဲ့ မှုကို အာရက္ခတပ်တော်က ရုပ်သံ နဲ့ တကွ သတင်းထုတ်ပြန်ပြသခဲ့ပါတယ်။
ပဋိပက္ခမှာ ပါဝင်ပတ်သက်နေတဲ့ အဖွဲ့တွေအားလုံးအနေနဲ့လည်း အပြည်ပြည်ဆိုင်ရာ လူသားချင်းစာနာမှုဆိုင်ရာ ဥပဒေပါ တာဝန်ဝတ္တရားတွေကို လိုက်နာကြဖို့၊ လူသားချင်းစာနာမှုဆိုင်ရာဝန်ထမ်းတွေနဲ့ အထောက်အပံ့ပစ္စည်းတွေကို လေးစားပြီး ကာကွယ်စောင့်ရှောက်ကြဖို့လည်း WFP က တောင်းဆိုထားပါတယ်။
လက်ရှိဖြစ်ပွားနေတဲ့ ပဋိပက္ခတွေအပြင် မကြာသေးမီက ဖြစ်ပေါ်ခဲ့တဲ့ ရာ သီဥတုဖောက်ပြန်မှုတွေနဲ့ စီးပွားရေးကျဆင်းမှုတွေကြောင့် နိုင်ငံအနှံ့အပြားမှာ ဆာလောင်မွတ်သိပ်မှု၊ အာဟာရချို့တဲ့မှု အခြေအနေတွေ ဆိုးရွားလာပြီးမြန်မာနိုင်ငံရဲ့ စားနပ်ရိက္ခာဖူလုံမှု အခြေအနေဟာ တစ်နေ့တခြား ပိုမိုဆိုးရွားလာလျက်ရှိတယ်လို့လည်း WFP က အသိပေးထားပါတယ်။
ကမ္ဘာ့စားနပ်ရိက္ခာအစီအစဉ်(WFP)ရဲ့ ထုတ်ပြန်ချက်နဲ့ ပတ်သက်ပြီး စစ်ကောင်စီဘက်ကတော့ ဒီကနေ့ ဒီဇင်ဘာ ၁၈ရက် ညပိုင်းအထိ တစုံတစ်ရာ ထုတ်ပြန်လာတာမျိုးမတွေ့ရသေးပါဘူး။
WFP ဟာ ကုလသမဂ္ဂ ကမ္ဘာ့စားနပ်ရိက္ခာအစီအစဉ်ရဲ့ ကမ္ဘာ့အကြီးမားဆုံး လူသားချင်းစာနာထောက်ထားမှုအကူအညီပေးအပ်ရေး အဖွဲ့အစည်းဖြစ်ပါတယ်။
