မောင်တော၊နခခ – ၅ က လက်နက်ချအညံ့မခံဘဲ ထွက်ပြေးလွတ်မြောက်နေတဲ့တပ်မမှူးတစ်ဦးဖြစ်တဲ့ အမှတ် (၂၂) ခြေမြန်တပ်မဌာနချုပ် (တမခ-၂၂) တပ်မမှူး ဗိုလ်မှူးကြီးအောင်နေမျိုးကို အာရက္ခတပ်တော်က ရွှေတုံးတချို့ အပါအဝင် ငွေသားတွေ နဲ့ အတူ အသေဖမ်းဆီးရမိခဲ့တယ်လို့ အာရက္ခတပ်တော်က ဒီဇင်ဘာလ ၁၈ ရက်နေ့ ညမှာသတင်းထုတ်ပြန်လာပါတယ်။
အသေဖမ်းဆီးရမိခဲ့တဲ့ ဗိုလ်မှူးကြီး အောင်နေမျိုးဟာ အမှတ် (၅) နယ်ခြားစောင့် ရဲတပ်ဖွဲ့ခွဲ (နခခ-၅)ကို အာရက္ခတပ်တော်ကအပြီးသတ်သိမ်းပိုက်ပြီး နောက်မှာလက်နက်ချအညံ့မခံဘဲ ထွက်ပြေးလွတ်မြောက်နေသူတွေထဲကအမှတ် (၂၂) ခြေမြန်တပ်မဌာနချုပ် (တမခ-၂၂) တပ်မမှူး ဗိုလ်မှူးကြီး တစ်ဦးလည်းဖြစ်ပါတယ်။
ဒါ့အပြင် တပ်မမှူး ဗိုလ်မှူးကြီး အောင်နေမျိုးဟာ စစ်ကောင်စီတပ်နဲ့ ခေတ်အဆက်ဆက်က ပူးပေါင်းလာခဲ့ကြတဲ့ ဒေသခံမူဆလင်တွေရဲ့ အကူအညီ နဲ့ဘင်္ဂလားဒေ့ရှ်နိုင်ငံအတွင်းကို ထွက်ပြေးလွတ်မြောက်ဖို့ ကြိုးစားခဲ့ပေမယ့် အာရက္ခတပ်တော် လုံခြုံရေးတပ်ဖွဲ့ဝင်တွေနဲ့ ကမ်းခြေစောင့်တပ်တွေရဲ့ ဝိုင်းရံပိတ်ဆို့ ရှာဖွေမှုကြောင့် ဒီဇင်ဘာလ ၁၇ ရက်နေ့ နေ့လယ် ၁၂ နာရီလောက်မှာအခေါက်ရွှေတုံးတချို့၊ ရွှေထည်အချို့အပါအဝင် ငွေသားသိန်း (၈၀၀) နဲ့အတူမောင်တောမြို့နယ်၊ ရွှေဇားကပ္ပကောင်းချောင်းနား ပုစွန်ကန် တဲထဲမှာအသေဖမ်းဆီးရမိခဲ့တယ်လို့ ဖော်ပြထားပါတယ်။
ဗိုလ်မှူးကြီး အောင်နေမျိုးသေဆုံးရတာဟာ သူတို့ထောင်ထားတဲ့ မိုင်းကို သူကိုယ်တိုင်နင်းမိပြီး ဆေးကုသမှုမလုပ်ဆောင်နိုင်ခဲ့တာကြောင့်သွေးထွက်လွန်ကာ သေဆုံးခဲ့ရတာဖြစ်တယ်လို့လည်း ဆိုပါတယ်။
မောင်မြို့အတွင်းက လက်ကျန်တပ်စခန်းတစ်ခုဖြစ်တဲ့ အမှတ်( ၅)နယ်ခြား စောင့်ရဲတပ်ဖွဲ့ခွဲဖြစ်တဲ့ နခခ -၅ စခန်းကြီးကို ၂၀၂၄ ခုနှစ်၊ ဒီဇင်ဘာလ (၈) ရက်နေ့၊ မနက် (၉) နာရီ (၃၀) မိနစ်မှာ အာရက္ခတပ်တော်က အပြီးသတ်သိမ်းပိုက်နိုင်ခဲ့ပါတယ်။
အဲဒီနောက်မှာ စစ်ကောင်စီတပ်ဖွဲ့ ဝင်တွေ နဲ့ စစ်ကောင်စီတပ်ဖွဲ့တွေ ရဲ့ လက်အောက်ခံအစ္စလာမ်မစ် အစွန်းရောက် စစ်သွေးကြွ လက်နက်ကိုင်တပ်ဖွဲ့ဝင်တွေဟာလက်နက်ချအညံ့မခံဘဲ ကစဥ့်ကလျားထွက်ပြေးတာတွေရှိခဲ့ပြီး အဲဒီလိုထွက်ပြေးနေတဲ့ စစ်ကောင်စီတပ်ဖွဲ့ဝင်တွေ နဲ့အပေါင်းအပါတွေကို အာရက္ခတပ်တော် ကလိုက်လံရှင်းလင်းခဲ့ရာ ဘူးသီးတောင်မြို့၊ အမှတ် (၁၅) စစ်ဆင်ရေးကွပ်ကဲမှုဌာနချုပ် (စကခ-၁၅) စကခမှူး ဗိုလ်မှူးချုပ် သူရိန်ထွန်းနဲ့အဖွဲ့ကို ၂၀၂၄ ခုနှစ်၊ ဒီဇင်ဘာလ (၈) ရက်နေ့ မောင်တော၊ ရွှေတောင်ကျေးရွာ အနောက်ဘက်မှာ အာရက္ခတပ်တော်က အရှင် လက်ရဖမ်းဆီးရမိခဲ့ပါတယ်။
