အမ်းနပခ မှာရှိတဲ့ ဒဏ်ရာရ စစ်ကောင်စီတပ်သားတချို့ကို အာရက္ခတပ်တော်ကကယ်ထုတ်ပေးနေ

အမ်းနပခ အထဲမှာရှိတဲ့ ဒဏ်ရာရ စစ်ကောင်စီတပ်သားတွေကို ကယ်ထုတ် ပေးနေတဲ့ ရုပ်သံဖိုင်တစ်ခုကို ဒီဇင်ဘာလ ၁၉ ရက်နေ့မှာ အာရက္ခတပ်တော်က သတင်းထုတ်ပြန်ခဲ့ပါတယ်။

ရုပ်သံထဲမှာတော့ စစ်ကောင်စီဟာ နပခ အထဲမှာရှိတဲ့နေရာတွေကို လေ ကြောင်းတိုက်ခိုက်တာ၊လက်နက်ကြီးတွေ နဲ့ ပစ်ခတ်တာတွေကို လုပ်ဆောင်နေတာတွေကို တွေ့ရပြီး အဲဒီကြားကနေ လက်နက်ချအညံ့ခံတဲ့ စစ်ကောင်စီတပ်ဖွဲ့တွေ နဲ့ ဒဏ်ရာရ စစ်ကောင်စီတပ်သားတွေကို အာရက္ခတပ်တော်က ကယ်ထုတ်ပေးနေတာတွေ့ရပါတယ်။

အလင်းဝင်လာသူအများစုဟာ လူငယ်လူရွယ်တွေ နဲ့ လူလတ်ပိုင်းတွေပါဝင်တာကိုလည်းတွေ့ရပြီး အဲဒီထဲမှာ ပြင်းထန်ဒဏ် ရာရထားသူတွေ အစာရေစာပြတ်လပ်ပြီး အားနည်းနေတဲ့ သူတွေ ပါဝင်တာကိုလည်းတွေ့ရပါတယ်။

စစ်ကောင်စီတပ်ဖွဲ့ဝင်တွေဟာ အာရက္ခတပ်တော်ရဲ့ အရာရှိတွေဆီမှာ သောက်ရေ နည်းနည်းတိုက်ဖို့ တောင်းဆိုတာတွေကိုလည်းတွေ့ရပါတယ်။

အာရက္ခတပ်တော် အရာရှိတစ်ဦးက ‘ရေမသောက်ရတာ လေးငါးရက်ရှိပြီးလား မေးမြန်းတဲ့ အခါမှာ”ဟုတ်ပါတယ်ရေမ သောက်ရတာ လေးငါးရက်ရှိပြီ”အထဲမှာ ရေမရှိဘူးလားလို့ အာရက္ခတပ်တော်ရဲ့အရာရှိက ထပ်မံမေးမြန်းတဲ့ အခါမှာ “မရှိဘူး ဆရာ”လို့ ပြောဆိုထားသလို “နပခ မှူးရောရေသောက်ရသလားလို့ အာရက္ခတပ်တော် အရာရှိ မေးမြန်းတဲ့ အခါမှာ “သူတို့ကတော့သောက်ရတယ် သူတို့အခန်းထဲမှာ ရေတွေ အပြည့်ရှိတယ် ကျနော်တို့ မသောက်ရဘူးလို့”စစ်ကောင်စီတပ်သားတွေက ဆိုပါတယ်။

အဲဒီပြောဆိုချက်ကိုကြည့်ခြင်းအားဖြင့် စစ်ကောင်စီအရာရှိတွေဟာ ရဲဘော် ရဲဘက် တွေအပေါ်မှာ ကိုယ်ချင်း စာတရားမရှိဘူးဆိုတာကို သိသာထင်ရှားတာတွေကို မြင်တွေ့ရပါတယ်။

ဒါ့အပြင် စစ်ကောင်စီအရာရှိတွေဟာ ဒဏ်ရာရတဲ့ တပ်ဖွဲ့ဝင်တွေကို ရဲဘော်ရဲ ဘက်စိတ်မထားဘဲ ကိုယ်လွတ်ရုန်းကာ မိမိတပ်ဖွဲ့တွေကို မခေါ်ယူဘဲထွက် ပြေးသွားတာတွေလည်း ရှိတယ်လို့ စစ်ကောင်စီတပ်ဖွဲ့ဝင်တွေက ပြောဆိုတာတွေကို လည်းတွေ့ရပါတယ်။

အဲဒီအခြေအနေကို အာရက္ခတပ်တော်အရာရှိတစ်ဦးက “လူကြီးတွေက ပစ်ထားခဲ့တာလား” လို့မေးမြန်းတဲ့အခါမှာ “ကျွန်တော်တို့ကို ပစ်ထားခဲ့တယ်၊ လမ်းမလျှောက်နိုင်လို့”ဟု စစ်ကောင်စီတပ်ဖွဲ့ဝင်တစ်ဦးက ပြောဆိုထားသလို နောက်တစ်ဦးက လည်း “သူတို့ ဖြတ်ကူးတယ်လေ၊ လူကြီးတွေအကုန်ဖြတ်ကူးသွားတယ်၊ အကုန်ပါသွားတယ်” လို့ ပြောဆိုထားတာတွေ့ ရပါတယ်။

နောက်ထပ် စစ်ကောင်စီတပ်ဖွဲ့ဝင်တစ်ဦးကလည်း “ပါတာပေါ့၊ ကျွန်တော်တို့ မသွားနိုင်သူတွေကို အခန်းထဲမှာ ထားခဲ့တယ်။ ကျွန်တော်တို့က ဒဏ်ရာတွေနဲ့ဆိုတော့ လမ်းမှ မလျှောက်နိုင်တာ။ သူတို့ လဲ ပြန်ဝင်လာကြတယ်၊ အကိုတို့ ဘေးနားက လိုက်ပစ်လို့လေ” “သူတို့က ပြေးလို့မလွတ်လို့ ပြန်ပြီးအထဲဝင်လာတာလား” ဟု AA စစ်သားက မေးမြန်းသည့်အခါ စစ်ကောင်စီတပ်သားက “ဟုတ်တယ်၊ ပြီးတော့ လေယာဉ်နဲ့ လာကြဲသွားတယ်။ ကျွန်တော်တို့လဲ ကိုယ့်လေယာဉ်ဆိုတော့ နားမလည်ဘူးလေ” လို့အာရက္ခတပ်တော် အရာရှိမေးမြန်းမှုတွေကို ဖြေဆိုထားတာတွေကိုလည်း တွေ့ရပါတယ်။

အာရက္ခတပ်တော်ဟာ အမ်းမြို့နယ် အတွင်းက နပခ ဌာနချုပ်ကို အပြီးသတ်သိမ်းပိုက်ရရှိနိုင်ဖို့အတွက် ဆက်လက်ထိုးစစ်ဆင်တိုက်ခိုက်နေပြီး စစ်ကောင်စီတပ်ဖွဲ့ဝင်တွေ အနေ နဲ့လည်း အလံဖြူထောင် အညံ့ခံကြဖို့ကို အာရက္ခတပ်တော်က ဆက်တိုက်တိုက်တွန်းပြောဆိုနေတာ ရှိသလို လက်နက်ချအညံ့ခံလာသူတွေ ရဲ့ အသက်ကို လည်း အာမခံချက်ပေးမှာဖြစ်တယ်လို့ အာရက္ခတပ်တော်က ပြောဆိုထားပါတယ်။