CNA၊မြတ်သူ။
ပြီးခဲ့တဲ့ ဒီဇင်ဘာလ ၁၉ ရက်နေ့ ည ၁၁ နာရီကျော်က သံတွဲမြို့ကို စစ်ကော င်စီက လေကြောင်းက ဗုံးကြဲတိုက်ခိုက်ခဲ့တာကြောင့် အရပ်သားပြည်သူ ၃ ဦးထိခိုက်ဒဏ်ရာ ရရှိခဲ့တယ်လို့ ဒေသသတင်းအရင်းမြစ်တွေကပြောပါတယ်။
စစ်ကောင်စီဟာ ဒီဇင်ဘာလ ၁၉ ရက်နေ့ ည ၁၁ နာရီကျော်လောက်မှာ သံတွဲမြို့နယ်အတွင်းကအမှတ် (၁) ရပ်ကွက် နဲ့ အမှတ် (၄) ရပ်ကွက်၊ ဗိုလ်ကုန်းမှာရှိတဲ့မြေစာရင်းရုံးတွေကို ဂျက်ဖိုက်တာ ၂ စီး နဲ့ ဗုံးကြဲတိုက်ခိုက်ခဲ့တာလည်းဖြစ်ပါတယ်။
“ဂျက်ဖိုက်တာ ၂ စီးနဲ့ လာပြီးကြဲသွားတာ အမှတ် ၁ ရပ်ကွက်က ဘုရင့်နောင် လမ်း နဲ့ စံပယ်လမ်းထိပ်မှာ တစ်လုံးကျတယ်။လူ ၃ ယောက်ဒဏ်ရာရတယ်။နေအိမ် ၂ လုံးပျက်သွားတယ်။ နောက်ကအမှတ် ၄ က မြေစာရင်းရုံးကိုကျတယ် အဆောက်အဦးတွေပျက်စီးသွားတယ်လို့” သံတွဲ ဒေသခံ တစ်ဦးကပြောပါတယ်။
အမှတ် ၁ ရပ်ကွက်က ဒဏ်ရာ ရရှိသွားတဲ့ သူ ၃ ဦးကတော့ ဒေါ်အုန်းမြင့် ၊ဒေါ်တင်တင်ချို နဲ့ ဦးရဲအောင်တို့ဖြစ်ကြပြီး လက်ရှိမှာ သူတို့ကို လုံခြုံတဲ့နေရာကို ပြောင်းရွှေ့ပြီးတော့ ဆေးကုသပေးတာတွေ လုပ်ဆောင်ထားတယ်လို့ ဆိုပါတယ်။
စစ်ကောင်စီဟာ ပြီးခဲ့တဲ့ ဒီဇင်ဘာလ ၁၇ ရက်နေ့ နေ့လယ်ကလည်း သံတွဲမြို့နယ် အတွင်းက အမှတ် ၇ ရပ်ကွက်ကိုလေကြောင်းဗုံးကြဲတိုက်ခိုက်ခဲ့တာကြောင့် အသက် ၇၀ အရွယ် သူနာပြုဆရာမကြီးတစ်ဦး သေဆုံးခဲ့ရသလို နေအိမ်တွေပျက်စီသွားတာလည်း ရှိခဲ့ရပါတယ်။
သံတွဲမြို့နယ် အတွင်းမှာ ဒီရက်ပိုင်း ဖုန်းလိုင်းတချို့ ပြန်ရတာရှိပြီး အဲဒီနောက်မှာ စစ်ကောင်စီက လေကြောင်းတိုက်ခိုက်တာကို ခပ်စိတ်စိတ်ပြန်လည်လုပ်ဆောင်ခံလာရတာဖြစ်ပါတယ်။
အခုလို စစ်ကောင်စီက လေကြောင်းတိုက်ခိုက်မှု ခပ်စိတ်စိတ်ပြန်လုပ်လာတာဟာ ဒေသအတွင်းမှာ စစ်ကောင်စီသတင်းပေးတွေ ရှိနေတဲ့ အတွက် လေကြောင်းတိုက်ခိုက်မှုကို လုပ်လာတာဖြစ်တယ်လို့လည်း ဒေသခံတွေကို သုံးသပ်ပြောဆိုမှုတွေရှိပါတယ်။
“အဲဒီအမှတ် ၇ ဖြစ်စဥ် မစခင် ၂ ရက်လောက်ကပင် သံတွဲက ဖုန်းလိုင်းပြန်ရတယ်။အဲဒီနောက်မှာ အမှတ် ၇ ကို လေကြောင်းတိုက်ခိုက်တာလုပ်ခဲ့တယ်။အဓိက အဲဒီနေရာမှာ အာရက္ခပြည့်သူ့အစိုးရရုံးကိုဆိုပြီး လာချတာ ဖြစ်တယ်။အခုထပ်ပြီးတော့ ကြဲတယ်ဆိုတော့ သတင်းပေးက အထဲမှာရှိနေလို့ အခုလို လာကြဲနေတာဖြစ်တယ်။တပ်တော်က ဒီကိစ္စကို သတိထားဖို့လိုတယ်လို့”သူကပြောပါတယ်။
သံတွဲမြို့ဟာ အာရက္ခတပ်တော် အပြီးသတ်သိမ်းပိုက် ရရှိပြီးနောက်ပိုင်းမှာ စစ်ကောင်စီရဲ လေကြောင်းတိုက်ခိုက်မှု ရန်ကိုမကြာခဏဆိုသလိုခံနေရတဲ့ မြို့တစ်မြို့ ဖြစ်ပါတယ်။
