CNA
ချင်းညီနောင်စစ်ဆင်ရေး အမည်နဲ့ ဆင်နွှဲနေတဲ့ မင်းတပ်မြို့သိမ်းတိုက်ပွဲမှာ စစ်ကောင်စီတပ်ဖွဲ့ဝင်နဲ့ ရဲစုစုပေါင်း ၁၂၃ဦးနဲ့အတူ ၎င်းတို့ရဲ့မိသားစုဝင်တွေပါ လက်နက်ချအညံ့ခံလာခဲ့တယ်လို့ ချင်းညီနောင်က ထုတ်ပြန်လာပါတယ်။
မင်းတပ်နဲ့ ဖလမ်းမြို့တို့မှာ ၂၀၂၄ခုနှစ်၊ နိုဝင်ဘာ ၉ရက်နေ့မှာ စတင်ခဲ့တဲ့ ချင်းညီနောင် စစ်ဆင်ရေးနဲ့ပတ်သက်ပြီး စစ်ရေးအခြေအနေတွေကို ယခုလိုထုတ်ပြန်လာတာလည်းဖြစ်ပါတယ်။
မင်းတပ်မြို့သိမ်းတိုက်ပွဲနဲ့ပတ်သက်ပြီး စစ်ကောင်စီရဲ့ လေကြောင်း၊ လက်နက်ကြီး ပစ်ခတ်မှုတွေကြားကနေ စစ်ကောင်စီတပ်ဖွဲ့ဝင်တွေ တပ်စွဲထားတဲ့ စံမင်းသီရိ စေတီကုန်း၊ ဝန်ထမ်းအိမ်ရာလိုင်းခန်း(စံပြရပ်ကွက်)၊ ခရိုင်ဆောက်လုပ်ရေးဝင်း၊ တာဝါတိုင်ကုန်း၊ ဟိုတယ်(မင်းတပ်)၊ မြလေးပွင့်စေတီကုန်းနဲ့ ၄ မိုင်ကုန်းတို့ကို တိုက်ခိုက်သိမ်းပိုက်ခဲ့ပြီးဖြစ်တယ်လို့ ချင်းညီနောင်တပ်ဖွဲ့က အသိပေးထားပါတယ်။
မင်းတပ်မြို့ပေါ်က သိမ်းပိုက်ဖို့ကျန်ရှိနေသေးတဲ့ မင်းတပ်ခရိုင်/မြို့နယ် ရဲတပ်ဖွဲ့ဝင်းနဲ့ ခလရ (၂၇၄)တပ်ရင်းတို့ကို ချင်းညီနောင်တပ်ဖွဲ့တွေက ဆက်လက်ထိုးစစ်ဆင်တိုက်ခိုက်ခဲ့ရာ၊ ဒီဇင်ဘာလ ၁၅ ရက်နေ့မှာတော့ မင်းတပ်ခရိုင်/မြို့နယ်ရဲတပ်ဖွဲ့ဝင်းအတွင်းက စစ်ကောင်စီတပ်ဖွဲ့ဝင်တွေ၊ ရဲတွေနဲ့ မိသားစုဝင်တွေ လက်နက်ချအညံ့ခံခဲ့တာဖြစ်တယ်လို့ ဆိုပါတယ်။
ချင်းညီနောင်တပ်ဖွဲ့က ထုတ်ပြန်ထားတဲ့ ဓာတ်ပုံမှတ်တမ်းတွေထဲမှာဆိုရင် လက်နက်ချအညံ့ခံတဲ့ စစ်ကောင်စီတပ်ဖွဲ့ဝင်တွေနဲ့အတူ၊ သူတို့ရဲ့ မိသားစုဝင်နဲ့ ကလေးတွေပါ ပါဝင်တာကိုတွေ့ရပါတယ်။
ဖလမ်းမြို့သိမ်းတိုက်ပွဲနဲ့ ပတ်သက်ပြီးတော့လည်း စစ်ကောင်စီတပ်စွဲထားတဲ့ ဖလမ်းခရိုင်ရဲတပ်ဖွဲ့ရုံး၊ ဖလမ်းမြို့နယ်ရဲတပ်ဖွဲ့ရုံး၊ ဆောက်လုပ်ရေးရုံး၊ အထွေထွေအုပ်ချုပ်ရေးရုံးနဲ့ ဆေးရုံကုန်းတို့ကို သိမ်းပိုက်နိုင်ခဲ့ပြီးဖြစ်တယ်လို့ ဖော်ပြထားပါတယ်။ ဒါ့အပြင် ဖလမ်းမြို့သိမ်းတိုက်ပွဲမှာ ရဲတပ်ဖွဲ့ဝင် ၄၅ဦး လက်နက်ခဲယမ်းတွေနဲ့အတူ ၂၀၂၄ ခုနှစ်၊ နိုဝင်ဘာ ၁၂ရက်နေ့မှာ အလင်းဝင်လာရှိတယ်လို့လည်း ထုတ်ပြန်ထားပါတယ်။
ချင်းညီနောင်အနေနဲ့ မင်းတပ်နဲ့ ဖလမ်းမြို့တို့က နောက်ဆုံးကျန်ရှိနေတဲ့ စစ်ကောင်စီတပ်စခန်းတွေကို သိမ်းပိုက်နိုင်တဲ့အထိ ပြင်းပြင်းထန်ထန်ဆက်လက်ထိုးစစ်ဆင်တိုက်ခိုက်သွားမှာဖြစ်တယ်လို့လည်း အသိပေးထားပါတယ်။ ချင်းပြည်နယ်အတွင်း စစ်ကောင်စီ ကင်းစင်စေရေးနဲ့ အာဏာရှင်ကို မဟာမိတ်တွေနဲ့အတူ ဆက်လက်တိုက်ထုတ်သွားမှာဖြစ်တယ်လို့လည်း ချင်းညီနောင်က ထုတ်ပြန်ထားပါတယ်။
