၂၀၂၄ခုနှစ်၊ ဧပြီလ ၁၀ရက်နေ့မှာ ကျရောက်တဲ့ အာရက္ခတပ်တော်(AA)ရဲ့ ၁၅နှစ်မြောက် နှစ်ပတ်လည်နေ့မှာ လက်ဆောင်ဆိုပြီး လက်နက်ကြီးနဲ့ ပစ်ခတ်ခဲ့တဲ့ စစ်ကောင်စီတပ်ကြပ်ကြီး တစ်ဦးဟာ လက်ရှိမှာတော့ အာရက္ခတပ်တော်ရဲ့ ဖမ်းဆီးခြင်းကို ခံထားရပါပြီ။
အမှတ် – ၃၇၄ အမြောက်တပ်ရင်းက တပ်ကြပ်ကြီး မျိုးမင်းထွန်းဟာ ဧပြီလ ၁၀ရက်နေ့မှာ “၁၅နှစ်မြှောက် ရခိုင့်တပ်တော်နေ့ အထိမ်းအမှတ် လက်ဆောင်”ဆိုပြီး ဟောင်ဝှစ်ဇာအမြောက်ကျည်ပေါ်မှာ ဆော့ပင်နဲ့ရေးသားပြီး ပစ်ခတ်ခဲ့တာပါ။
အဆိုပါ ပစ်ခတ်မှု ရုပ်သံမှတ်တမ်းကိုလည်း လူမှုကွန်ရက်ပေါ်မှာ ဖော်ပြခဲ့ပြီး တပ်ထောက်ခံသူတွေအကြား ရေပန်းစားခဲ့ပါသေးတယ်။
အမ်းမြို့က အနောက်ပိုင်းတိုင်း စစ်ဌာနချုပ်ကို အာရက္ခတပ်တော်က အပြီးသတ်တိုက်ခိုက်သိမ်းပိုက်လိုက်ချိန်မှာတော့ တပ်ကြပ်ကြီးမျိုးမင်းထွန်းပါ လက်နက်ချ အညံ့ခံခဲ့တာဖြစ်ပါတယ်။
လက်ရှိမှာတော့ တပ်ကြပ်ကြီးမျိုးမင်းထွန်းဟာ သူအဖမ်းခံထားရကြောင်းနဲ့ ဟောင်ဝှစ်ဇာကျည်ပေါ်မှာ လက်ကမြင်းကြောထပြီး ရေးသားပစ်ခတ်ခဲ့မိတာဖြစ်ကြောင်း ရုပ်သံမှတ်တမ်းနဲ့ တကွ ဝန်ခံထွက်ဆိုလာပါတယ်။
“ဧပြီလ ၁၀ရက် အာရက္ခတပ်တော် တပ်မွေးနေ့မှာ ဟောင်ဝှစ်ဇာကျည်ပေါ်မှာ ၁၅နှစ်မြောက် ရခိုင့်တပ်တော်နေ့ အထိမ်းအမှတ်လက်ဆောင်ဟု လက်ကမြင်းကြောထ ရေးသားပစ်ခတ်ခဲ့သူဖြစ်ပါတယ်။အခုဆိုရင် အာရက္ခတပ်တော်ထံမှာ လက်နက်ချ အညံ့ခံပြီး ဖမ်းဆီးခံထားရပါတယ်”လို့ တပ်ကြပ်ကြီးမျိုးမင်းထွန်း ဆိုပါတယ်။
အလားတူ အမ်းမြို့သိမ်းတိုက်ပွဲနဲ့ပတ်သက်ပြီး အာရက္ခတပ်တော်ကို ယူနီဖောင်းအဆုတ်ကို အရင်လာသိမ်းဖို့ စိန်ခေါ်ခဲ့တဲ့ စစ်ကောင်စီတပ်သားတစ်ဦးဟာလည်း အမ်းတိုက်ပွဲမှာ သေဆုံးသွားခဲ့ပြီး လက်ကမြင်းကြောထ အာချောင်သွားတာဖြစ်တယ်လို့ တပ်ကြပ်ကြီးမျိုးမင်းထွန်းက ပြောပါတယ်။
စစ်ကောင်စီရဲ့ အနောက်ပိုင်းတိုင်း စစ်ဌာနချုပ်ကို အာရက္ခတပ်တော်ဟာ ဒီဇင်ဘာလ ၂၀ရက်နေ့မှာ လေကြောင်း၊ လက်နက်ကြီးနဲ့ စစ်ကူ စစ်ကြောင်းတွေကြားကနေ အောင်မြင်စွာသိမ်းပိုက်နိုင်ခဲ့တာလည်းဖြစ်ပါတယ်။
ယခုအောင်မြင်မှုဟာ ရက္ခိုင်ပြည်သူတစ်ရပ်လုံးရဲ့ အောင်မြင်မှုသာမဟုတ်ဘဲ ဖက်ဆစ်အကြမ်းဖက်စစ်ကောင်စီကို တော်လှန်နေတဲ့ တော်လှန်ရေးအဖွဲ့အစည်းတွေ၊ တော်လှန်ပြည်သူတွေရဲ့ အောင်မြင်မှုအဖြစ် မျှဝေဂုဏ်ပြုတယ်လို့လည်း အာရက္ခတပ်တော်က ထုတ်ပြန်ထားပါတယ်။
အာရက္ခတပ်တော်ဟာ ရခိုင်ပြည်နယ်အတွင်ကပလက်ဝမြို့၊ ပေါက်တောမြို့၊ မင်းပြားမြို့၊ မြောက်ဦးမြို့၊ ကျောက်တော်မြို့၊ မြေပုံမြို့၊ ပုဏ္ဏားကျွန်းမြို့၊ ရမ်းဗြဲမြို့၊ ရသေ့တောင်မြို့၊ ဘူးသီးတောင်မြို့၊ သံတွဲမြို့၊ တောင်ကုတ်မြို့၊မောင်တောမြို့နဲ့ အမ်းမြို့ စုစုပေါင်း မြို့ ၁၄မြို့ကို သိမ်းပိုက်ထားနိုင်ပြီးဖြစ်ပါတယ်။
လက်ရှိမှာလည်း အာရက္ခတပ်တော်ဟာ ဂွမြို့ကို ဆက်လက်ထိုးစစ်ဆင်တိုက်ခိုက်နေပြီး ဂွမြို့ရဲ့ သုံးပုံ နှစ်ပုံခန့်ကို သိမ်းပိုက်ရရှိထားပြီးဖြစ်တယ်လို့ ထုတ်ပြန်ထားပါတယ်။
