CNA။
ရက္ခိုင်တစ်ပြည်လုံးမှာ စစ်ကောင်စီတပ်တွေ ကင်းစင်ပပျောက်သွားအောင် ဆက်လက်တိုက်ပွဲဝင်နေတဲ့ အာရက္ခတပ်တော် (AA)ရဲ့ ရဲစွမ်းသတ္တိကို ဂုဏ်ပြုကြောင်း ပအိုဝ်းနဲ့ မွန်အဖွဲ့အစည်း ၄ဖွဲ့က ဒီဇင်ဘာ ၂၅ရက်မှာ ဂုဏ်ပြုသဝဏ်လွှာပေးပို့လာပါတယ်။
ပအိုဝ်းအမျိုးသားလွှတ်မြောက်ရေးအဖွဲ့ချုပ် (PNLO)၊ ပအိုဝ်းအမျိုးသားဖက်ရယ်ကောင်စီ (PNFC) ၊ မွန်ပြည်သစ်ပါတီ-စစ်အာအာရှင်ဆန့်ကျင်ရေး (NMSP-AD)နဲ့ မွန်ပြည်ဖက်ဒရယ်ကောင်စီ (MSFC) တို့က ဂုဏ်ပြုသဝဏ်လွှာ ပူးတွဲပေးပို့လာတာလည်းဖြစ်ပါတယ်။
ရက္ခိုင်အမျိုးသားအဖွဲ့ချုပ် (ULA) ရဲ့ နိုင်ငံရေးဦးဆောင်မှု၊ အာရက္ခတပ်တော်(AA)ရဲ့ ရွပ်ရွပ်ချွံချွံ တိုက်ပွဲ ဝင်မှုတွေကြောင့် အနောက်ပိုင်းတိုင်းစစ်ဌာနချုပ် (နပခ) ကို ၂၀၂၄ ခုနှစ်၊ ဒီဇင်ဘာလ ၂၀ ရက်နေ့မှာ အပြီးသတ် သိမ်းပိုက်နိုင်ခဲ့တဲ့အကြောင်းကိုလည်း သဝဏ်လွှာမှာဖော်ပြထားပါတယ်။
ဘဝတူ စစ်အာဏာရှင်စနစ်အောက်ကနေ ပထမဦးဆုံးလွတ်မြောက်မယ့် ရက္ခိုင်ပြည်ရဲ့ အလားအလာကောင်းတွေနဲ့အတူ၊ ရက္ခိုင်ပြည်လွတ်မြောက်ရေးမှာသာ ရပ်တန့်မနေဘဲ တစ်နိုင်ငံလုံးက ဗမာအပါအဝင် ဘဝတူအဖိနှိပ်ခံ တိုင်ရင်းသားလူမျိုးအသီးသီးရဲ့လွတ်မြောက်ရေးတိုက်ပွဲတွေနဲ့ ပြည်သူ လူထုတစ်ရပ်လုံး အဖိနှိပ်ခံဘဝကနေ လွတ်မြောက်ရေးအတွက် ULA/AA က နိုင်ငံရေးအမြင်ကျယ်စွာ ပူးပေါင်းဆောင်ရွက်နေတာကိုလည်း အထူးပင်ဂုဏ်ယူရတယ်လို့ ဆိုပါတယ်။
မြောက်ပိုင်းညီနောင်မဟာမိတ် ၃ဖွဲ့ရဲ့ ၂၀၂၃ ခုနှစ် ဇန်နဝါရီလ ၁ ရက်နေ့ နှစ်သစ်ကူးကြေညာချက်မှာမြန်မာပြည်သူတစ်ရပ်လုံး မျှော်မှန်းထားတဲ့ဘုံရည်မှန်းချက်တွေ ပြည့်ဝစေဖို့၊ လက်ရှိအခြေအနေကို အကောင်းဆုံး ကျော်လွှားနိုင်ဖို့နဲ့ စစ်အာဏာရှင် စနစ်ကို တိုက်ထုတ်နိုင်ရေးအတွက် လုပ်သင့်လုပ်ထိုက်တာတွေကို ဆက်လက်လုပ်ဆောင်သွားမယ်လို့ ထုတ်ပြန်ဖော်ပြခဲ့ပါတယ်။
အဆိုပါ ဖော်ပြချက်နဲ့အညီ ပြည်ထောင်စုတဝန်းလုံးမှာ ၁၀၂၇ စစ်ဆင်ရေး ပထမလှိုင်း၊ ဒုတိယလှိုင်းလုံးတွေနဲ့အတူ လူထုတော်လှန်ရေးရဲ့အောင်ပွဲအဆင့်ဆင့်ကို ရရှိခဲ့ပြီး စစ်အုပ်စုရဲ့ ရှုံးနှိမ့်မှုတွေကိုလည်း ပီပီပြင်ပြင် တွေ့မြင်နေရပြီး ဖြစ်တယ်လို့ ပအိုဝ်းနဲ့ မွန်အဖွဲ့အစည်းတွေက ဆိုပါတယ်။
မိမိတို့အနေနဲ့လည်း “တစိတ်တပိုင်း လွတ်မြောက်ရုံဖြင့် အားလုံးမလွတ်မြောက်နိုင်၊ အားလုံး လွတ်မြောက်မှသာ လွတ်မြောက်မှုအစစ်အမှန်ကို အပြည့်အဝ ရရှိမည်၊ ယခုအောင်ပွဲသည် ရက္ခိုင်ပြည်သူတို့၏ အောင်ပွဲဖြစ်သကဲ့သို့ တိုင်းရင်းသားလူမျိုးပေါင်းစုံ ပြည်သူလူထု တစ်ရပ်လုံး၏ အောင်ပွဲလည်းဖြစ်သည်”လို့ ခံယူထားတာနဲ့အညီ သူ့အရေး ကိုယ့်အရေး၊ အားလုံးလွတ်မြောက်ရေးအတွက် စုပေါင်း တိုက်ပွဲဝင်နေတယ်လို့ ပအိုဝ်းနဲ့ မွန်အဖွဲ့အစည်းတွေက အသိပေးထားပါတယ်။
ဒါ့အပြင် တိုင်းရင်းသားလူမျိုးပေါင်းစုံ ပြည်သူလူထုအားလုံး လိုလားတဲ့ စစ်အာဏာရှင်စနစ်အပြီးတိုင် ချုပ်ငြိမ်းရေးနဲ့ ဖက်ဒရယ်ဒီမိုကရေစီ ပြည်ထောင်စုတည်ဆောက်ရေး ဘုံလုပ်ငန်းစဉ်တွေမှာ ညီနောင် မဟာမိတ်သုံးဖွဲ့ အပါအဝင် ဘဝတူညီနောင်တော်လှန်ရေးအင်အားစုတွေနဲ့အတူ ခိုင်ခိုင်မာမာ လက်တွဲ တိုက်ပွဲဝင်သွားမယ်လို့လည်း သဝဏ်လွှာမှာ ဖော်ပြထားပါတယ်။
