CNA။
အာရက္ခတပ်တော်က သိမ်းပိုက်ဖို့ကျန်ရှိနေသေးတဲ့ စစ်တွေ၊ မာန်အောင်၊ ကျောက်ဖြူမြို့တို့က စစ်ကောင်စီတပ်ဖွဲ့ဝင်တွေအနေနဲ့ ခေါင်းဆောင်မပီသသူတွေရဲ့ လက်အောက်မှာ အသေခံပြီးတာဝန်မထမ်းဆောင်ကြဖို့ နခပ တိုင်းဦးစီးချုပ် ဗိုလ်မှူးချုပ် ကျော်ကျော်သန်းက တိုက်တွန်းပြောဆိုလာပါတယ်။
အနောက်ပိုင်းတိုင်းစစ်ဌာနချုပ် (နပခ)ကို တိုက်ခိုက်သိမ်းပိုက်တဲ့ ရုပ်သံမှတ်တမ်းနဲ့အတူ စစ်သုံ့ပန်း ဗိုလ်မှူးချုပ် ကျော်ကျော်သန်းရဲ့ တိုက်တွန်းပြောဆိုချက်ကိုပါ အာရက္ခတပ်တော်က ပူးတွဲထုတ်ပြန်လာတာဖြစ်ပါတယ်။
ရခိုင်ပြည်ရဲ့ ပထဝီဝင်အနေအထားအရ စစ်ကူတွေရောက်ရှိဖို့ ခက်ခဲတယ်ဆိုတာကို တိုက်ပွဲစဉ်တွေအရသိရပြီး၊ ခေါင်းဆောင်မှုမပီသသူတွေရဲ့ လက်အောက်မှာ တာဝန်မထမ်းဆောင်ကြဖို့နဲ့ အာရက္ခတပ်တော်ဆီဆက်သွယ်ပြီး လက်နက်ချအလင်းဝင်ကြဖို့ တိုင်းဦးစီးချုပ် ဗိုလ်မှူးချုပ် ကျော်ကျော်သန်းက တိုက်တွန်းထားပါတယ်။
တိုက်ပွဲတွေမှာဆိုရင်လည်း အမြန်ဆုံးအလံဖြူထောင် လက်နက်ချဖို့လည်း သူကအသိပေးထားပါတယ်။
အာရက္ခတပ်တော်ဟာ လက်လွှတ်စပယ်မလုပ်ဘဲ ဖမ်းဆီးရမိတဲ့ စစ်သုံ့ပန်းတွေကို သုံ့ပန်းဉပဒေနဲ့အညီထိန်းသိမ်းထားရှိသလို၊ သူတို့မှာရှိတဲ့ ဆေးဝါး၊ ရိက္ခာတွေနဲ့ အစွမ်းကုန်ပြုစု စောင့်ရှောက်ပေးတယ်လို့လည်းဗိုလ်မှူးချုပ် ကျော်ကျော်သန်းက ဆိုပါတယ်။
နပခ တိုင်းစစ်ဌာနချုပ် ကျဆုံးရတာဟာ စစ်ကူစစ်ကြောင်းအချိန်မှီမရောက်ရှိတာ၊ ရောက်ရှိလာတဲ့ စစ်ကူစစ်ကြောင်းအချို့ဟာလည်း အာရက္ခတပ်တော်ရဲ့ ချေမှုန်းခြင်းကို ခံခဲ့ရတာ၊ ရိက္ခာ၊ ဆေးဝါး၊ ခဲယမ်း၊ ရေလုံလောက်မှုမရှိတော့ဘဲ အရာရှိစစ်သည်တွေ ထိခိုက်ဒဏ်ရာရရမှုများပြားတာ၊ သောက်စရာရေမရှိတော့တဲ့အထိ အစွမ်းကုန်ခုခံကာကွယ်ခဲ့ပေမယ့် အာရက္ခတပ်တော်ရဲ့ တိုက်စွမ်းရည်တွေကြောင့် နပခ ကျဆုံးခဲ့ရတာဖြစ်တယ်လို့လည်း ဗိုလ်မှူးချုပ် ကျော်ကျော်သန်းက သုံးသပ်ပြောဆိုပါတယ်။
ဒါ့အပြင် နေပြည်တော်မှာရှိတဲ့ ခေါင်းဆောင်တွေအနေနဲ့လည်း လက်အောက်ငယ်သားတွေရဲ့ ဘဝကို ငဲ့ညာသောအားဖြင့် ရခိုင်ပြည်နယ်မှာ စစ်ရှုံးနေတယ်ဆိုတာကို လက်ခံပေးဖို့နဲ့ ပြည်သူလူထုကို ဗုံးကြဲတာ၊ အကြမ်းဖက်နေတာတွေ ရပ်တန့်ပေးဖို့ တောင်းဆိုထားပါတယ်။
ဆက်လက်လုပ်ဆောင်နေမယ်ဆိုရင် ပြည်သူလူထုနဲ့ တပ်မိသားစုတွေရဲ့ အမုန်းတရားတွေ၊ နာကြည်းမှုတွေကို မျိုးဆက်အလိုက်ရရှိ ခံစားရမယ်ဆိုတာကို သိစေခြင်တယ်လို့လည်း နခပ တိုင်းဦးစီးချုပ် ဗိုလ်မှူးချုပ် ကျော်ကျော်သန်းက ပြောဆိုထားပါတယ်။
