CNA၊မြတ်သူ။
ဂွမြိုနယ့်အတွင်းက သိမ်းပိုက်ဖို့ကျန်ရှိနေသေးတဲ့ စစ်ကောင်စီရဲ့အခြေစိုက်တပ်စခန်းဖြစ်တဲ့ ခမရ – ၅၆၂ တပ်ရင်းကို အာရက္ခတပ်တော်က မနေ့က ညနေ ၅ နာရီလောက်မှာ အပြီးသတ်သိမ်းပိုက်လိုက်ပြီးဖြစ်တယ်လို့ အာရက္ခတပ်တော်ရဲ့ ခိုင်လုံတဲ့ သတင်းအရင်းမြစ်က ပြောပါတယ်။
“မနေ့က ညနေ ၅ နာရီလောက်မှာ အကုန်ပြီးတယ်။ဒီနေ့မှာတော့ထုတ်ပြန်ချက်ထွက်လာမယ်ထင်တယ်။စစ်ကောင်စီကတော့ လေကြောင်းတိုက်ခိုက်တာ ကို ညလုံးပေါက်လုပ်တာတွေတော့ရှိနေတယ်။မြို့ထဲမှာတော ဘယ်စစ်ကောင်စီတပ်သားမှမရှိတော့ဘူး”လို့သူကပြောပါတယ်။
အဲဒီလက်ကျန်တပ်ရင်းဖြစ်တဲ့ခမရ -၅၆၂ စခန်းသိမ်းတိုက်ပွဲအတွင်းမှာ အာရက္ခတပ်တော်က စစ်သုံးပန်းရာနဲ့ချီဖမ်းဆီးရမိထားသလို သံချပ်ကာ ကားအပါအဝင်လက်နက်ခဲယမ်းတွေကိုလည်း အများအပြားသိမ်းဆည်းရမိတယ်လို့လည်းဆိုပါတယ်။
အဲဒီနောက်လက်နက်ချအညံ့မခံဘဲ ထွက်ပြေးလွတ်မြောက်သွားတဲ့ စစ်ကောင် စီအရာရှိတချို့ နဲ့ စစ်ကောင်စီတပ်ဖွဲ့ဝင်တွေဟာလည်း ဂွ နဲ့ ၅ မိုင်ခန်အကွာမှာရှိတဲ့ ဗောဓိကုန်း တံတားကို မိုင်းခွဲဖျက်ဆီးတာတွေကို လုပ်ဆောင်တာရှိတယ်လို့ ဒေသသတင်းအရင်းမြစ် တစ်ဦးကပြောပါတယ်။
“မြို့ကိုတော့တပ်တော်က သိမ်းလိုက်ပြီလို့သိရတယ်။မနေ့က ၇ နာရီလောက်မှာတော့ ဗောဓိကုန်းတံတားကို အဲဒီထွက်ပြေးလာတဲ့ စစ်ကောင်စီတပ်တွေက မိုင်းခွဲဖျက်ဆီးလိုက်လို့ တံတားပျက်သွားပြီလို့သိရတယ်။မြို့ကိုလည်းလေကြောင်းတိုက်ခိုက်လို့ မီးတော်တော်လောင်နေတယ်လို့ သိရတယ်လို့”သူကပြောပါတယ်။
ဒါပေမယ့် မြို့သိမ်းပိုက်မှုအခြေအနေနဲ့ ပတ်သက်ပြီးတော့ အာရက္ခတပ်တော်ကတော့ ခုတ်ပြန်တာ တစုံတစ်ရာမရှိသေးပါဘူး။
ရခိုင်မှာ အာရက္ခတပ်တော် နဲ့ စစ်ကောင်စီတပ်တို့ရဲ့ တကျော့ပြန်တိုက်ပွဲဟာ ပြီးခဲ့တဲ့ ၂၀၂၃ ခုနှစ် နိုဝင်ဘာလ ၁၃ ရက်နေ့ကတည်းကပင် စတင်တိုက်ပွဲဖြစ်ပွားခဲ့တာဖြစ်ပြီး အာရက္ခတပ်တော်က ရခိုင်ကမြို့နယ် ၁၄ ခု နဲ့ ပလက်ဝဒေသတစ်ခုလုံးကိုသိမ်းပိုက်ရရှိထားပြီးဖြစ်ပါတယ်။
အဲဒီနောက် ကျန်ရှိနေသေးတဲ့ မာန်အောင်၊ကျောက်ဖြူ နဲ့ စစ်တွေမြို့တွေကိုလည်း အပြီးသတ်သိမ်းပိုက်နိုင်ဖို့ အာရက္ခတပ်တော်က ဆက်လက်ထိုးစစ်ဆင်တိုက်ခိုက်တာတွေလည်းရှိနေပါတယ်။
