CNA၊ဂူးဂူး။
အာရက္ခတပ်တော် နဲ့ စစ်ကောင်စီတို့ ထိတွေ့တိုက်ပွဲ တစ်ကြိမ်တစ်ခါမှ ဖြစ် ပွားခြင်းမရှိတဲ့ မာန်အောင်မြို့နယ်အတွင်းမှာ စစ်ကောင်စီက ဒီရက်ပိုင်း လုံ ခြုံရေးတင်းကြပ်တာတွေကို ပိုမိုလုပ်ဆောင်လာနေတယ်လို့ ဒေသခံတွေကပြောပါတယ်။
စစ်ကောင်စီတပ်တွေဟာ မာန်အောင်မြို့နယ်အတွင်းက ပင်လယ်ကမ်းစပ်နေရာတွေမှာ ကင်းပုန်းဝပ်တာ နဲ့ ပြည်သူတွေနေထိုင်တဲ့ နေအိမ်တွေမှာ ဝင်ရောက်ပြီး ကင်းပုန်းဝပ်တာတွေကို ဒီရက်ပိုင်း ဆက်တိုက်လုပ်ဆောင်လာနေတာဖြစ်တယ်လို့ မာန်အောင်ဒေသခံ တစ်ဦးကပြောပါတယ်။
“အရင်ကနဲ့ မတူတာကတော့ အခုလုံခြုံရေးတင်းကြပ်လာတာကိုတွေ့ရတယ်။သစ်ပုံရွာက ငှက်ပျောတောရပ်ကွက်မှာဆိုရင် လူနေအိမ်တွေမှာ ၅ ယောက်တစ်ဖွဲ့စီနေနေတာရှိတယ်။သိမ္ဗလကမ်းချေမှာလည်း ညဖက်ကင်းပုန်းဝပ်တာ တွေရှိတယ်။ဆိပ်ကမ်းတော်တော်များများမှာ ကင်းပုန်းဝပ်တယ်။ပြီးတော့ညဖက်ကားတွေ နဲ့ ကင်းလှည့်တာတွေလည်းရှိတယ်လို့”သူကပြောပါတယ်။
မာန်အောင်မြို့ဟာ သီးခြားတည်ရှိတဲ့ ကျွန်းတစ်ခုဖြစ်ပေမယ့် စစ်ကောင်စီဟာ ရခိုင်တကျော့ပြန်တိုက်ပွဲစတင်ချိန်ကတည်းကပင် မာန်အောင်မြို့ကို စစ်ရေးအတွက် စစ်ကူပို့တာ စစ်ရေးလှုပ်ရှားတာ နဲ့ စားနပ်ရိက္ခာသယ်ယူတာတွေကိုပါ တားမြစ်ပိတ်ပင်ခံခဲ့ထားရတဲ့မြို့နယ်တစ်ခုလည်းဖြစ်ပါတယ်။
အဲဒီလို စစ်ကောင်စီက အဖက်ဖက်က ပိတ်ဆို့မှုတွေလုပ်ဆောင်ထားတာကြောင့် မာန်အောင်ဒေသခံပြည်သူတွေဟာ အခြေခံစားသောက်ကုန်တွေ ပြတ်လပ်တာ ကုန်းစျေးနူန်းအဆမတန်မြင့်တက်တဲ့ ဒဏ်တွေကိုလည်း ရင်ဆိုင်ကြုံတွေနေရပါတယ်။
လက်ရှိမှာလည်း စစ်ကောင်စီက တည်ငြိမ်အေးချမ်းနေတဲ့ မာန်အောင်ဒေသမှာ စစ်အင်အားဖြည့်တင်းပြီး အရင်နဲ့ မတူတဲ့ လုပ်ဆောင်မှုတွေ လုပ်လာတဲ့ အပေါ်မှာ ဒေသခံတွေ အနေ နဲ့ စိုးရိမ်မှုတွေရှိနေတယ်လို့ မာန်အောင်ဒေသခံ တစ်ဦးကပြောပါတယ်။
“စိုးရိမ်ရင်လည်း ဒိီကိစ္စကတော့ တနေ့နေ့ဖြစ်လာမယ်ဆိုတာတော့ သိတယ်။ဒါပေမယ့် ကျနော်တို့နေရာက တခြားနေရာတွေ နဲ့မတူတော့ စိုးရိမ်တယ်။ကျနော်တို့က ကန်ထဲမှာလွတ်ထားတဲ့ ငါးတွေလိုဖြစ်နေတာ။ဘယ်ကိုမှလည်းထွက်မရ။အခုသူတို့ကလည်း စစ်ရေး လှုပ်ရှားမှုတွေလုပ်ပြနေတယ်။ အေအေ ကလုပ်တာတော့မတွေ့ဘူး သူတို့ကသာ လုပ်နေတာ ဒီအပေါ်မှာစိုးရိမ်မိတာဖြစ်တယ်လို့”သူကပြောပါတယ်။
ရခိုင်မှာ အာရက္ခတပ်တော် နဲ့ စစ်ကောင်စီတပ်တို့ရဲ့ တကျော့ပြန်တိုက်ပွဲဟာ ပြီးခဲ့တဲ့ ၂၀၂၃ ခုနှစ် နိုဝင်ဘာလ ၁၃ ရက်နေ့ကတည်းကပင် စတင်တိုက်ပွဲဖြစ်ပွားခဲ့တာဖြစ်ပြီး အာရက္ခတပ်တော်က ရခိုင်ကမြို့နယ် ၁၄ ခု နဲ့ ပလက်ဝဒေသတစ်ခုလုံးကိုသိမ်းပိုက်ရရှိထားပြီးဖြစ်ပါတယ်။
အဲဒီနောက် ကျန်ရှိနေသေးတဲ့ မာန်အောင်၊ကျောက်ဖြူ နဲ့ စစ်တွေမြို့တွေကိုလည်း အပြီးသတ်သိမ်းပိုက်နိုင်ဖို့ အာရက္ခတပ်တော်က ဆက်လက်ထိုးစစ်ဆင်တိုက်ခိုက်သွားမယ်လို့ ထုတ်ပြန်ပြောဆိုထားပါတယ်။
ပုံ၊ မာန်အောင်မြို့မစျေးမြင်ကွင်း။ပုံဟောင်း။
