CNA၊ ဒီဇင်ဘာ၊ ၂၉။
အဖိနှိပ်ခံ မြန်မာပြည်သူလူထုဘက်က မားမားမတ်မတ်ရပ်တည်ပြီး နိုင်ငံရေးနည်းလမ်းနဲ့ ဖြေရှင်းဖို့ အသင့်ရှိတယ်လို့ ရက္ခိုင်အမျိုးသားအဖွဲ့ချုပ်/အာရက္ခတပ်တော် (ULA/AA)က ဒီကနေ့မှာ ထုတ်ပြန်လာပါတယ်။
မြန်မာပြည်သူလူထုတစ်ရပ်လုံး လိုလား တောင့်တနေတဲ့ နိုင်ငံရေးမျှော်မှန်းချက်တွေကို တစ်လုံးတစ်ဝတည်း ရရှိစေရေးအတွက် မားမားမတ်မတ် ဆက်လက် ရပ်တည်မှာဖြစ်ပြီး၊ မြန်မာပြည်အတွင်းက တိုင်းရင်းသားညီအစ်ကိုတွေရဲ့ အကောင်းဆုံးသော ညီအစ်ကို မိတ်ဆွေအဖြစ် ဆက်လက်ရပ်တည်သွားမယ်လို့ အာရက္ခတပ်တော်က ဆိုပါတယ်။
ရက္ခိုင်အမျိုးသားအဖွဲ့ချုပ်/အာရက္ခတပ်တော် (ULA/AA)ဟာ အာရက္ခပြည်သူလူထုတစ်ရပ်လုံးရဲ့ ထောက်ခံမှုနှင့်အတူ အာရက္ခဒေသအတွင်းမှာနေတဲ့ လူမျိုးပေါင်းစုံရဲ့အမျိုးသားတန်းတူရေး၊ ဒေသတစ်ခုလုံး ဖိနှိပ်အုပ်ချုပ်သူတို့လက်အောက်မှ လွတ်မြောက်ရေးတို့အတွက် တစိုက်မတ်မတ် ကြိုးပမ်းဆောင်ရွက်လျက်ရှိ
တဲ့၊ အဓိက ရှေ့ဆောင်လက်နက်ကိုင်တော်လှန်ရေး ဆင်နွှဲနေတဲ့ နိုင်ငံရေးအဖွဲ့အစည်းတစ်ခုဖြစ်တယ်လို့လည်း ထုတ်ပြန်ချက်မှာဖော်ပြထားပါတယ်။
၂၀၂၃ ခုနှစ်၊ နိုဝင်ဘာလ (၁၃) ရက်နေ့က စတင်ခဲ့တဲ့အာရက္ခဒေသအတွင်းက အာရက္ခတပ်တော်ရဲ့ ထိုးစစ်တွေဟာ အာရက္ခဒေသအတွင်းမှာနေတဲ့ ပြည်သူလူထုတစ်ရပ်လုံးရဲ့ လိုလားသောဆန္ဒနဲ့ အာရက္ခ ဒေသနေ လူမျိုးပေါင်းစုံ လွတ်မြောက်ရေးကို အဓိကရည်ရွယ်ပြီးဆင်နွှဲခဲ့တာဖြစ်တယ်လို့လည်း အသိပေးထားပါတယ်။
ဒါ့အပြင် အဆိုပါထိုးစစ်တွေကနေ အဖိနှိပ်ခံမြန်မာပြည်သူလူထုတစ်ရပ်လုံး စစ်အာဏာရှင်စနစ်အောက်က လွတ်မြောက်ရေးအတွက်လည်း တိုက်ရိုက် အထောက်အကူပြုမယ်ဆိုတာကို အကြွင်းမဲ့ ယုံကြည်တယ်လို့လည်း အာရက္ခတပ်တော်က ဆိုပါတယ်။
လက်ရှိမှာလည်း အာရက္ခတပ်တော်အနေနဲ့ မြန်မာနိုင်ငံရဲ့ ပြည်တွင်းရေး အခင်းအကျင်း၊ အဖြစ်အပျက်တွေကို စစ်ရေးနဲ့ ဖြေရှင်းတာထက် နိုင်ငံရေးနည်းလမ်းတွေနဲ့ ဖြေရှင်းဖို့ အမြဲတမ်း အသင့်ရှိတယ်လို့ ထုတ်ပြန်ချက်မှာ ဖော်ပြထားပါတယ်။
လွန်ခဲ့တဲ့နှစ်ကာလတွေမှာ တရုတ်ပြည်သူ့သမ္မတနိုင်ငံရဲ့ တက်ကြွတဲ့ ဦးဆောင်မှုအောက်မှာတရုတ်-မြန်မာ နယ်စပ်ဒေသတည်ငြိမ်ရေး၊ အကြမ်းဖက်မှုများပပျောက်ရေး၊ အွန်လိုင်းလောင်းကစား (ကျားဖျင်) တိုက်ဖျက်ရေး စတဲ့ကဏ္ဍရပ်တွေမှာ အာရက္ခတပ်တော် သာမက ကိုးကန့်၊ တအာင်း အဖွဲ့အစည်းတွေဟာ “ဟိုင်ဂင်သဘောတူညီချက်” ရရှိတဲ့အထိ စိတ်အားထက်သန်စွာ တက်တက်ကြွကြွ ပူးပေါင်း ပါဝင်ခဲ့တဲ့အကြောင်းကိုလည်း အသိပေးထားပါသေးတယ်။
အာရက္ခပြည်သူ့တော်လှန်ရေးအစိုးရဟာ အာရက္ခဒေသအတွက် အကျိုးစီးပွားဖြစ်ထွန်းတဲ့၊ ဒေသဖွံ့ဖြိုးတိုးတက်ရေးကို အထောက်အကူပြုတဲ့ မည်သည့်နိုင်ငံခြားရင်နှီးမြှုပ်နှံမှုမျိုးကိုမဆို အသိအမှတ်ပြု ကြိုဆိုပြီး ရင်းနှီးမြှုပ်နှံရေးလုပ်ငန်းတွေ စီမံကိန်းတွေနဲ့ရင်းနှီးမြှုပ်နှံလုပ်ကိုင်ကြနေကြသူတွေရဲ့ လုံခြုံရေး၊ အသက်အန္တရာယ်တို့ကို အထူးဂရုစိုက် ကာကွယ်စောင့်ရှောက်သွားမယ်လို့လည်း ထုတ်ပြန်ချက်မှာ ဖော်ပြထားပါတယ်။
ဒါကြောင့် လာရောက် ရင်းနှီးမြှုပ်နှံကြတဲ့ နိုင်ငံခြားရင်းနှီးမြှုပ်နှံမှု၊ စီမံကိန်းတွေ ဆက်လက်လည်ပတ်နိုင်ရေးအတွက် အာရက္ခတပ်တော်ဟာ အဆိုပါ ကုမ္ပဏီတွေနဲ့ ပူးပေါင်းဆောင်ရွက်သွားမယ့်အပြင် အကျိုးတူပူးပေါင်းဆောင်ရွက်ဖို့ လိုလားတယ်လို့လည်း ဖိတ်ခေါ်ထားပါသေးတယ်။
ရခိုင်မှာ အာရက္ခတပ်တော်နဲ့ စစ်ကောင်စီတပ်တို့ရဲ့ပြီးခဲ့တဲ့ ၂၀၂၃ ခုနှစ်က စတင်ခဲ့တဲ့ တကျော့ပြန်တိုက်ပွဲအတွေအတွင်း ရခိုင်ကမြို့နယ် ၁၄ ခု နဲ့ ပလက်ဝဒေသတစ်ခုလုံးကို အာရက္ခတပ်တော်က သိမ်းပိုက်ရရှိပြီးဖြစ်ပါတယ်။
ISP Myanmar ရဲ့ ဒီဇင်ဘာလ ၂၄ရက်နေ့အထိ ရရှိထားတဲ့ အချက်အလက်တွေအရဆိုရင်လည်း ရခိုင်ပြည်နယ်အတွင်းမှာ တရုတ်ရင်းနှီးမြှုပ်နှံမှုစီမံကိန်း စုစုပေါင်း ၁၁ခုရှိတဲ့အထဲက စီမံကိန်း ၁၀ခုကို အာရက္ခတပ်တော် (AA) က ထိန်းချုပ်ထားတယ်လို့ ဖော်ပြထားပါတယ်။
