ရခိုင်ပြည်နယ်၊ ဂွမြို့သိမ်းတိုက်ပွဲအတွင်းမှာ စစ်ကောင်စီဘက်က အနည်းဆုံး ၇၀၀ ထက်မနည်းသေဆုံးနိုင်တယ်လို့ အာရက္ခတပ်တော်(AA)က ထုတ်ပြန်လာပါတယ်။
ဂွမြို့မှာရှိတဲ့ စစ်ကောင်စီရဲ့ တပ်ရင်း နှစ်ရင်းဖြစ်တဲ့ ခမရ (၅၆၂)၊ ခမရ (၅၆၃) တပ်ရင်းတို့ကို ဒီဇင်ဘာလ (၁၅) ရက်နေ့က စတင်ပြီး အာရက္ခတပ်တော်က ထိုးစစ်ဆင်တိုက်ခိုက်ခဲ့တာပါ။
ဒီဇင်ဘာလ (၂၉) ရက်၊ မွန်းတည့် (၁၂) နာရီအချိန်ခန့်မှာတော့ အဆိုပါ ဂွအခြေစိုက်တပ်ရင်းနှစ်ရင်းစလုံးကို အာရက္ခတပ်တော်က ရှေ့ဆင့် နောက်ဆင့် တစ်ရက်တည်း သိမ်းပိုက်ရရှိခဲ့တာဖြစ်ပြီး ဂွမြို့ကို သိမ်းပိုက်နိုင်ခဲ့တာလည်းဖြစ်ပါတယ်။
အဆိုပါတပ်ရင်း နှစ်ခုအပြင် ဂွမြို့ကို စစ်ကူလာတဲ့ တပ်မ (၆၆) လက်အောက်ခံ၊ ခမရ (၄) တပ်ရင်း၊ တပ်မ (၁၁) လက်အောက်ခံ တပ်ရင်းတွေဖြစ်တဲ့ ခမရ (၂၁၄) တပ်ရင်း၊ ခမရ (၂၁၅) တပ်ရင်း၊ ခမရ (၂၁၇) တပ်ရင်း၊ အနောက်တောင်တိုင်းစစ်ဌာနချုပ်-နတခ လက်အောက်ခံ ခလရ (၃၆) တပ်ရင်း၊ ခလရ (၃၈) တပ်ရင်း၊ ခလရ (၉၃) တပ်ရင်း၊ ခလရ (၂၇၁) တပ်ရင်းနဲ့ ခမရ (၃၀၈) တပ်ရင်းတို့ကို လည်း မရပ်မနား ထိုးစစ်ဆင်တိုက်ခိုက်ခဲ့ရတဲ့အကြောင်းကိုလည်း အာရက္ခတပ်တော်က အသိပေးထားပါတယ်။
ဂွမြို့သိမ်းတိုက်ပွဲ ထိုးစစ် အစကနေ အဆုံးအထိတိုက်ပွဲတွေအတွင်း မြေပြင်အလောင်းတွေ၊ ဖမ်းဆီးရမိတဲ့ သုံ့ပန်းတွေရဲ့ ထွက်ဆိုချက်တွေ၊ သိမ်းဆည်းရမိတဲ့ စာရွက်စာတမ်းတွေအရ စစ်ကောင်စီဘက်က အနည်းဆုံး ၇၀၀ထက်မနည်း သေဆုံးတယ်လို့ အာရက္ခတပ်တော်က ခန့်မှန်းထားပါတယ်။
ဒါ့အပြင် ဖမ်းဆီးရမိတဲ့ စစ်သုံ့ပန်းတွေကို စစ်ဆေးချက်အရ တပ်မ (၁၁) တပ်မမှူး ဗိုလ်မှူးကြီး သန်းစိုးဝင်း ဦးဆောင်ပြီး ဗျူဟာမှူး နှစ်ဦးဖြစ်တဲ့ ဗိုလ်မှူးကြီး မျိုးညွန့်ဦး နဲ့ ဗိုလ်မှူးကြီး ကျော်ဇင်ထိုက် တို့က အာရက္ခတပ်တော်ရဲ့ ထိုးစစ်ကို ပုံစံအမျိုးမျိုး၊ နည်လမ်းအသွယ်သွယ်၊ သံချပ်ကာပစ်ကူ၊ လေကြောင်း၊ ရေကြောင်းပစ်ကူတို့အပြင် သံချပ်ကာ (၁၀) စီး၊ စစ်ကူ အမြောက်အမြားတို့နဲ့ အသည်းအသန် ခုခံကာကွယ်ကွယ်ခဲ့တယ်လို့ ဆိုပါတယ်။
အင်အား (၁၂၀၀) ကျော်နဲ့ ခုခံကာကွယ်ခဲ့ပေမယ့် နောက်ဆုံးမှာတော့ အာရက္ခတပ်တော်ရဲ့ ထိုးစစ်ကို မည်သို့မျှ ယှဉ်မရဘဲ လက်လွှတ်ဆုံးရှုံးခဲ့ရပြီး တပ်မ (၁၁) တပ်မမှူး ဗိုလ်မှူးကြီး သန်းစိုးဝင်း အပါအဝင် တပ်ရင်းမှူးအချို့နဲ့ အခြားအဆင့်အမြောက်အမြားသေဆုံးခဲ့တယ်လို့လည်း အာရက္ခတပ်တော်က အသိပေးထားပါတယ်။
ဂွမြို့သိမ်းတိုက်ပွဲအတွင်း သတ္တိပြောင်မြောက်စွာတိုက်ပွဲဝင်ခဲ့ကြတဲ့ အာရက္ခစစ်သည်တော်တွေနဲ့ အသက်၊ ခန္ဓာပေးဆပ်စွန့်လွှတ်ခဲ့ကြတဲ့ အာရက္ခစစ်သည်တော်တွေကို လေးနက်စွာမှတ်တမ်းတင် ဂုဏ်ပြုအပ်ပါတယ်လို့လည်း အာရက္ခတပ်တော်က ထုတ်ပြန်ထားပါတယ်။
ဂွမြို့ဟာ ၂၀၂၄ခုနှစ်ခုအတွင်း အာရက္ခတပ်တော်ရဲ့ နောက်ဆုံးသိမ်းပိုက်ရရှိတဲ့မြို့ဖြစ်ပြီး၊ ရခိုင်ပြည်နယ်အတွင်းက မြို့ ၁၄ မြို့နဲ့ ပလက်ဝဒေသတစ်ခုလုံးကို အာရက္ခတပ်တော်က သိမ်းပိုက်ရရှိထားပြီးဖြစ်ပါတယ်။
ဂွမြို့ကို မသိမ်းပိုက်မီ နာရီပိုင်းအလိုမှာဘဲ အာရက္ခတပ်တော်ဟာအဖိနှိပ်ခံ မြန်မာပြည်သူလူထုဘက်က မားမားမတ်မတ်ရပ်တည်ပြီး၊ မြန်မာနိုင်ငံရဲ့ ပြည်တွင်းရေးကို နိုင်ငံရေးနည်းလမ်းနဲ့ ဖြေရှင်းဖို့ အသင့်ရှိတယ်လို့ အာရက္ခတပ်တော်ကထုတ်ပြန်ချက် တစ်စောင် ထုတ်ပြန်ထားပါသေးတယ်။
