CNA၊မြတ်သူ။
ဂွ နဲ့ ငသိုင်းချောင်ကြားမှာ ရှိတဲ့ စစ်ကောင်စီရဲ့ ဗေဒါစစ်ဆေးရေးဂိတ်ကို အာရက္ခတပ်တော်က ဝင်ရောက်ထိုးစစ်ဆင်တိုက်ခိုက်နေတယ်လို့ ဒေသ သတင်းအရင်းမြစ်တွေက CNAကိုပြောပါတယ်။
“အရင်ကတော့ အဲတာက လဝက ဂိတ်ပေါ့။ဒီနောက်ပိုင်းစစ်ကောင်စီက အဲဒီဂိတ်နေရာမှာ တပ်စခန်းချပြီးတော့ နေတော့ အဲဒီကို အာရက္ခတပ်တော်က ထိုးစစ်ဆင်တိုက်ခိုက်နေတာ ။တိုက်ပွဲကတော့ တော်တော် ပြင်းပြင်းထန်ထန်ဖြစ်နေတယ်လို့” အဲဒီဒေသ သတင်းအရင်းမြစ်က ပြောပါတယ်။
အာရက္ခတပ်တော် ဟာဂွမြို့တစ်ခုလုံးကို ပြီးခဲ့တဲ့ ဒီဇင်ဘာလ ၂၉ ရက်နေ့ နေ့လယ်ပိုင်းက အပြီးသတ်သိမ်းပိုက် ရရှိထားခဲ့ပြီးဖြစ်ပါတယ်။
အဲဒီနောက် စစ်ကောင်စီကလည်းဂွမြို့နယ် အတွင်းကို ပြန်လည်ဝင်ရောက်နိုင်ဖို့အတွက် စစ်အင်အားဖြည့်တာ စစ်စခန်းအသစ်တွေတည်ဆောက်တာတွေကို ဆက်တိုက်လုပ်ဆောင်နေတာတွေ ရှိနေတယ်လို့ ဂွစစ်ရေး အခြေအနေကို စောင့်ကြည့်နေသူ တစ်ဦးကပြောပါတယ်။
“အခုက စစ်ကောင်စီက ဧရာဝတီထဲက တပ်တွေကို မကျီးဇင်ဘက်ကို စစ်ကူပို့နေတာတွေတော့ ရှိတယ်။နေတိုင်းလိုလိုက ကားတွေ နဲ့ ပို့နေတယ် အဓိကတော့ သူတို့ဂွကို ပြန်သိမ်းဖို့ဆိုတဲ့ ရည်ရွယ်ချက်တွေ နဲ့ လုပ်နေတယ်။ဒီအခြေအနေက ဂွဒေသအတွက် မလုံခြုံလို့ ပြောလို့ရတယ်။ဒီဖက်က နေရာတော်တော်များများကို တပ်တော်က ထိန်းချုပ်နိုင်ဖို့ လိုသေးတယ်။အဲဒါကြောင့် အခုဆိုရင်လို့”သူကပြောပါတယ်။
ရခိုင်မှာ တကျော့ပြန်တိုက်ပွဲစတင်ပြီးနောက် တစ်နှစ်ကျော်ကာလအတွင်းမှာ အာရက္ခတပ်တော်ဟာ ရခိုင်က မြို့ကြီး ၁၄ မြို့နဲ့ ပလက်ဝဒေသကိုအပြီးသတ်သိမ်းပိုက်ရရှိထားပြီးနောက်မှာ လက်ရှိဖြစ်နေတဲ့ စစ်ရေးအခြေအနေတွေကို အဆုံးသတ်နိုင်ဖို့အတွက် နိုင်ငံရေး နည်းလမ်း နဲ့ ဖြေရှင်းဖို့ အသင့်ရှိတယ်လို့ အာရက္ခတပ်တော်က ထုတ်ပြန်ပြောဆိုထားပါတယ်။
