လက်နက်ကိုင်အဖွဲ့ခေါင်းဆောင်အချို့ဟာ ခေါင်းစဉ်အမျိုးမျိုးပြပြီး ဒီမိုကရေစီစနစ်ကို လိုလားတယ်လို့ ပြောနေပေမယ့် လက်တွေ့မှာတော့ ကိုယ်ကျိုး အတ္တကိုအခြေခံတဲ့ လိုအင်ဆန္ဒနဲ့ လက်နက်ကိုင် ပဋိပက္ခကိုဖန်းတီးနေတာတွေ့ရတယ်လို့ စစ်ခေါင်းဆောင်မင်းအောင်လှိုင်က ပြောဆိုလာပါတယ်။
ဒီပြောဆိုမှုကို၂၀၂၅ ခုနှစ် နှစ်သစ်ကူးနှုတ်ခွန်းဆက်စကားပြောကြားရာမှာ အခုလိုပြောဆိုခဲ့တာဖြစ်ပါတယ်။
တချို့သောတိုင်းရင်းသားခေါင်းဆောင်တွေဟာ ဖက်ဒရယ်အခွင့်အရေး၊ တိုင်းရင်းသားအခွင့်အရေးလို့ပြောနေကြပေမယ့် ဒီမိုကရေစီရဲ့ သဘောသဘာဝကို မျက်ကွယ်ပြုပြီး ပြည်ထောင်စုပြိုကွဲအောင် ဦးတည်ဆောင်ရွက်နေကြတယ်လို့လည်း စစ်ခေါင်းဆောင်က ဆိုပါတယ်။
ဖြစ်ချင်တာ၊ ဖြစ်သင့်တာတွေကို ချင့်ချိန်စဉ်းစားပြီး ဖြစ်နိုင်တာကို ပြည်ထောင်စုအကျိုးအတွက် ဒီမိုကရေစီနည်းလမ်းတကျ ဆောင်ရွက်သင့်တယ်လို့လည်း စစ်ခေါင်းဆောင်က တိုက်တွန်းထားပါသေးတယ်။
ပြည်သူတွေအနေနဲ့လည်း လက်နက်ကိုင်အဖွဲ့တွေကို ဒီမိုကရေစီလမ်းကြောင်းပေါ်ရောက်အောင် တွန်းအားပေးကြဖို့ လိုတယ်လို့လည်း စစ်ခေါင်းဆောင်က ပြောဆိုထားပါတယ်။
စစ်ခေါင်းဆောင် မင်းအောင်လှိုင်ဟာ သူ့အနေနဲ့လည်း နိုင်ငံတော်အကျိူးအတွက်၊ ပြည်သူတွေရဲ့ အကျိုးအတွက်၊ လက်နက်ကိုင် ပဋိပက္ခချုပ်ငြိမ်းပြီး တည်ငြိမ်အေးချမ်းတဲ့ ပတ်ဝန်းကျင် ကောင်းကိုဖော်ဆောင်လိုတဲ့ ရည်ရွယ်ချက်သာရှိတယ်လို့လည်း ဆိုပါတယ်။
တည်ငြိမ်အေးချမ်းတဲ့ ပတ်ဝန်းကျင်ကိုဖော်ဆောင်ဖို့ဆိုရင် နိုင်ငံရေးနည်း၊ တွေ့ဆုံဆွေးနွေးခြင်းနည်းတွေနဲ့သာ ဖော်ဆောင်ရမှာဖြစ်တယ်လို့လည်း စစ်ခေါင်ဆောင်က ဖိတ်ခေါ်ထားပါသေးတယ်။
ဒါ့အပြင် လွတ်လပ်ပြီးတရားမျှတမှုရှိတဲ့ ရွေးကောက်ပွဲကို အောင်မြင်စွာဆောင်ရွက်နိုင်ဖို့ စီမံ ဆောင်ရွက်လျှက်ရှိပြီး၊ နိုင်ငံတော်ကို ဒီမိုကရေစီလမ်းကြောင်းပေါ်ပြန်လည်ရောက်ရှိအောင် ဆောင်ရွက်ပေးမှာဖြစ်တယ်လို့လည်း စစ်ခေါင်းဆောင်က ပြောဆိုသွားပါတယ်။
