ရခိုင်ရိုးမ နဲ့ ထိစပ်နေတဲ့ တိုင်း ၃ တိုင်းရဲ့ နေရာ ၄ နေရာမှာ အာရက္ခတပ်တော် နဲ့ စစ်ကောင်စီတပ်တွေဟာ နှစ်ဖက်တိုက်ပွဲတွေ ဖြစ်ပွါးနေတာတွေ ရှိနေတယ်လို့ အာရက္ခတပ်တော်က ဇန်နဝါရီလ ၂၀ ရက်နေ့မှာ ထုတ်ပြန်ပြောဆိုလာပါတယ်။
စစ်ကောင်စီဟာ အနောက်ပိုင်းတိုင်း စစ်ဌာနချုပ် နဲ့ အမ်း၊ တောင်ကုတ်၊ ဂွမြို့တွေက တပ်စခန်းအားလုံးကို လက်လွှတ်လိုက်ရပြီးနောက်မှာ ရခိုင်ရိုးမ နဲ့ နယ်နိမိတ် ထိစပ်နေတဲ့ ရိုးမတောင်တန်း နဲ့ ရခိုင် – ပဲခူးအစပ်၊ ရခိုင် – မကွေးအစပ်၊ ရခိုင် -ဧရာဝတီတိုင်း အစပ် နဲ့ ရခိုင်ရိုးမ – ဧရာဝတီတိုင်းအစပ်တွေမှာ ဆက်လက်တိုက်ပွဲ ဖြစ်ပွါးနေတာ ဖြစ်တယ်လို့ ဆိုပါတယ်။
အဲဒီထဲက အမ်းမြိုနယ်အတွင်း က မြင်းကန် (ကံမြင်ကန်)၊ ပိန်းရေစမ်း၊ ကြက်ရေစမ်း ကျေးရွာ အနီးပတ်ဝန်းကျင် ရှိအမ်း-ပဒါန်း ကားလမ်းမအနီးမှာ စစ်ကောင်စီ နဲ့ အာရက္ခတပ်တော်တို့ဟာ အပြန်အလှန် ထိုးစစ်၊ ခံစစ်တွေ နဲ့ အတူ တိုက်ပွဲ ဖြစ်ပွါးနေတာ တစ်ပတ်ကျော်ခန့် ကြာမြင့်နေပြီးဖြစ်တယ်လို့လည်း ဖော်ပြထားပါတယ်။
ဒါ့အပြင် မိတ္ထီလာမြို့အခြေစိုက် အမှတ် (၉၉) ခြေမြန်တပ်မဌာနချုပ် (တပ်မ ၉၉) နှင့် မကွေးမြို့အခြေစိုက် အမှတ် (၈၈) ခြေမြန်တပ်မဌာနချုပ် (တပ်မ ၈၈) လက်အောက်ခံတပ်ရင်းများ၊ မကွေးမြို့အခြေစိုက် ကာကွယ်ရေးပစ္စည်းစက်ရုံ (ကပစ) တပ်ဖွဲ့ဝင်များပါဝင်သည့် စစ်ကောင်စီ တပ်ရင်းတွေ နဲ့လည်း ဇန်နဝါရီလ ၁၁ ရက်နေ့ကတည်းကပင် တိုက်ပွဲစတင်ဖြစ်ပွားတာတွေ ရှိနေတယ်လို့ဆိုပါတယ်။
စစ်ကောင်စီဟာ အာရက္ခတပ်တော် တပ်ဖွဲ့ဝင်တွေ ရှိတဲ့နေရာကို အကြိမ်ကြိမ် ထိုးစစ်ဆင်တိုက်ခိုက်ခဲ့ပေမယ့်လည်းစစ်ကောင်စီတပ်သားတွေဟာ အထိအခိုက် အကျအဆုံးများစွာ နဲ့ တပ်တွေဆုတ်ခွာထွက်ပြေးရတာလည်း အကြိမ်ကြိမ် ရှိနေပြီးဖြစ်တယ်လို့ ဆိုထားပါတယ်။
ဒါ့အပြင် တစ်ပတ်ကျော် ကြာတိုက်ပွဲအတွင်းမှာလည်း စစ်ကောင်စီရဲ့ အလောင်းအမြောက်အများကိုလည်း သိမ်းဆည်း ရမိခဲ့သလို လက်နက်ခဲယမ်း၊ စစ်အသုံးအဆောင်ပစ္စည်းအများအပြားတိုကိုလည်း သိမ်းဆည်းရမိခဲ့ပြီး ရန်သူသုံပန်းတချိုကိုလည်း ဖမ်းဆီးရမိခဲ့တယ်လို့ အာရက္ခတပ်တော်က ပုံနဲ့တကွ ထုတ်ပြန်ပြောဆိုထားပါသေးတယ်။
တစ်ဖက်မှာလည်း ရခိုင် နဲ့ ဧရာဝတီတိုင်း အစပ်က နေရာတချို့၊ ပွိုင့် (၃၆၉) ကုန်း နဲ့ ဧရာဝတီတိုင်း၊ ရေကြည်မြို့၊ ချင်းစုကျေးရွာအနီးမှာလည်း အာရက္ခတပ်တော် နဲ့ စစ်ကောင်စီတို့ဟာ နှစ်ဖက်တိုက်ပွဲတွေ ဖြစ်ပွါးနေတာတွေ ရှိနေဆဲဖြစ်တယ်လို့ ဆိုထားပါတယ်။
ဒီရခိုင် နဲ့ ဧရာဝတီတိုင်းအစပ်မှာ ဖြစ်ပွါးနေတဲ့ တိုက်ပွဲအခြေအနေအသေးစိတ်ကို အေအေ ထုတ်ပြန်ချက်ထဲမှာ ဖော်ပြထားတာ မတွေ့ရပါဘူး။
