ကျားဖြန့်နဲ့ပတ်သက်ပြီး ပူးပေါင်းဆောင်ရွက်ဖို့နိုင်ငံတကာကို KNU အနေ နဲ့ ဖိတ်ခေါ်ထားပေမယ့် ဘယ်အဖွဲ့အစည်း၊ ဘယ်နိုင်ငံကမှ တရားဝင်ဆက်သွယ်လာတာမျိူးမရှိသေးဘူးလို့ ကရင်အမျိုးသားအစည်းအရုံး(KNU)ရဲ့ ပြောခွင့်ရ ပဒိုစောတောနီးက CNA ကိုပြောပါတယ်။
၂၀၂၅ခုနှစ် နှစ်အစပိုင်းမှာဘဲ တရုတ်နိုင်ငံရဲ့ ရုပ်ရှင်သရုပ်ဆောင် ဝမ်ရှင်းဟာ ထိုင်း-မြန်မာနယ်စပ် မြဝတီမြို့အနီးက ရွှေကုက္ကိုလ်မြို့ဘက်ကို လူကုန်ကူးခံရပြီးနောက်ပိုင်း၊ ကရင်ပြည်နယ်အတွင်းက ကျားဖြန့်လုပ်ငန်းတွေကို တရုတ်အပါအဝင် အိမ်နီးချင်းနိုင်ငံတွေက အာရုံစိုက်လာကြပါတယ်။
ဇန်နဝါရီလ ၂၁ရက်နေ့မှာဆိုရင် မြန်မာနိုင်ငံဆိုင်ရာ တရုတ်သံရုံးက တရုတ်၊ ထိုင်း၊ ကမ္ဘောဒီးယား၊ လာအို၊ မြန်မာနဲ့ ဗီယက်နမ် နိုင်ငံတွေကပါဝင်တဲ့ “ဇင်ယော်” ပူးပေါင်းလှုပ်ရှားမှု ဒုတိယပိုင်းကို စတင်သွားမယ်လို့ ထုတ်ပြန်ခဲ့ပါတယ်။
“ဇင်ယော်” လှုပ်ရှားမှုဟာ ဒေသဆိုင်ရာ ဆက်သွယ်ရေးလိမ်လည်မှု၊ ကွင်းဆက်ရာဇ၀တ်မှုတွေနဲ့ လက်နက်ခဲယမ်းမှောင်ခိုမှုတို့ကို တိုက်ဖျက်တဲ့ လှုပ်ရှားမှုဖြစ်ပါတယ်။
“ဒီလုပ်ငန်းနဲ့ပတ်သက်လို့ ဖိတ်ခေါ်ထားတာတော့ မှန်တယ်။ ဒါပေမဲ့ ကျွန်တော် စောစောကပြောသလိုပဲ ဘယ်သူ တဦးတယောက်၊ ဘယ်အဖွဲ့အစည်း၊ ဘယ်နိုင်ငံကမှ ကျွန်တော်တို့ကို ဒီတရားဝင်ဆက်သွယ်အကြောင်းကြားလာတာမရှိတဲ့အပေါ်မှာ ဘာမှပြောလို့မရဘူး။ ကျွန်တော်တို့ သေချာပြောလို့ရတာကတော့ တကယ်လို့များ အဲ့လိုမျိုး ဆက်သွယ်အကြောင်းကြားလာမယ်ဆိုရင် လက်တွဲဖို့စိတ်ပါမယ်ဆိုရင်ပေါ့လေဗျာ။ ဒါကတော့ ကျွန်တော်တို့ ဆွေးနွေးရမဲ့အပိုင်းရှိမယ်ပေါ့” လို့ KNU ပြောခွင့်ရ ပဒိုစောတောနီးက ဆိုပါတယ်။
အာဏာသိမ်းပြီးနောက်ပိုင်းမှာ ကျားဖြန့်လုပ်ငန်းတွေဟာ ပိုပြီးကြီးထွားလာတာဖြစ်လို့ ကျားဖြန့်လုပ်ငန်းတွေနဲ့ပတ်သက်ပြီး စစ်ကောင်စီဟာ တာဝန်အရှိဆုံးသူဖြစ်တယ်လို့လည်း ပဒိုစောတောနီးကပြောပါတယ်။
“အာဏာသိမ်းပြီးတော့ ဒီလုပ်ငန်း ဟာ တော်တော်လေးကိုတဟုန်ထိုးတိုးလာတဲ့အပိုင်းမှာတော့ အများကြီးရှိတယ်ပေါ့လေ။ ကျွန်တော်တို့က ပြောပြီးသားပါ တာဝန်အရှိဆုံး အစိုးတရပ်အနေနဲ့ တာဝန်ယူမှု တာဝန်ခံမှုတော့ ရှိဖို့တော့လိုတယ်။ တချိန်တည်း မှာပဲ အထူးသဖြင့် ဒီလုပ်ငန်းကိုလုပ်ဆောင်နေတဲ့လူတွေအပေါ်မှာ တိုက်ရိုက်ကွပ်ကဲမှုရှိတဲ့ စစ်တပ်ပေါ့နော် လက်ရှိစစ်အာဏာသိမ်းထားတဲ့ စစ်ကောင်စီက တာဝန်အရှိဆုံးပေါ့” လို့ သူကဆိုပါတယ်။
တရုတ်မင်းသားဝမ်ရှင်း လူကုန်ကူးခံရပြီးနောက်ပိုင်း တရုတ်လုပ်ငန်းရှင်တွေနဲ့ BGF ခေါင်းဆောင်တွေ၊ DKBA ခေါင်းဆောင်တွေဟာ ယခုဇန်နဝါရီလအတွင်းမှာ တွေ့ဆုံဆွေးနွေးခဲ့ကြပါသေးတယ်။
ဒီတွေ့ဆုံပွဲနဲ့ပတ်သက်ပြီး KNUအနေနဲ့ သတင်းမီဒီယာတွေရဲ့ဖော်ပြချက်အရဘဲသိရပြီး နောက်ကွယ်မှာ ဘာတွေပါလဲဆိုတာ ပြောရခက်တယ်လို့လည်း ပဒိုစောတောနီးက ပြောပါတယ်။
လက်ရှိမှာတော့ ထိုင်း – မြန်မာနယ်စပ် ထိုင်းဘက်ခြမ်းမှာ ထိုင်းအစိုးရက ကျားဖြန့်လုပ်ငန်းတွေကို နှိမ်နှင်းသွားမယ့် ကွာလန်းစီမံချက်ကို ဖော်ဆောင်နေပြီး နယ်စပ်လုံခြုံရေးလည်း တိုးမြင့်ထားပါတယ်။
မြန်မာဘက်ခြမ်းက ကျားဖြန့်လုပ်ငန်းတွေနဲ့ နာမည်ကြီးတဲ့ ရွှေကုက္ကိုလ်မြို့သစ်မှာတော့ တရုတ်နှစ်သစ်ကူးပွဲစည်ကားသိုက်မြိုက်စွာ ကျင်းပနိုင်ရေးအတွက် ပြင်ဆင်မှုတွေပြုလုပ်နေတယ်လို့ ဒေသတွင်းသတင်းတွေရဲ့ဖော်ပြချက်တွေအရ သိရပါတယ်။
