မောင်တောကို အကြမ်းဖက် မွတ်ဆလင်လက်နက်ကိုင်အဖွဲ့တွေက နည်းဗျူဟာ ကျကျ ထိုးဖောက်ဝင်ရောက်တာတွေ ရှိလာနေ

ရခိုင်ပြည်တွင်းက မောင်တောမြို့နယ်မှာ အကြမ်းဖက်မွတ်ဆလင်လင်နက်ကိုင်အဖွဲ့တွေ ဖြစ်ကြတဲ့ RSO၊ ARSA၊ ARA နဲ့ Rohingya Islami Mahaaz (Arakan) အဖွဲ့တွေဟာ ဒေသအတွင်းကို နည်းဗျူဟာ ကျကျ နဲ့ ထိုးဖောက်ဝင်ရောက်လာနေတာတွေ ရှိနေတယ်လို့ မောင်တောဒေသခံတွေက CNA ကိုပြောပါတယ်။

လုံခြုံရေး အခြေအနေအရ အမည်မဖော်လိုတဲ့ မောင်တောမြို့ ဒေသခံတစ်ဦးက “မောင်တော တောင်ပြိုဖက်မှာ က ARSA တွေရဲ့ထိုးဖောက်ဝင်ရောက်မှုက ရှိပါတယ်။ အခုဝင်ရောက်လာမှုကတော့ ဖွဲ့စည်းပုံကောင်းကောင်း မဟာဗျူဟာကောင်းကောင်းနဲ့ ထိုးဖောက်ဝင်ရောက်လာနေတာရှိနေတယ်။အခုသူတို့မှာလည်း တပ်တော်ရဲ့ ဗျူဟာလို နယ်မြေမှူးတွေ ဘာတွေ ခန့်ပြီးတော့ ထိုးဖောက်ဝင်ရောက်နေတာတွေကို မြင်တွေ့နေရတယ်”လို့ သူကပြောပါတယ်။

ARSA ၊ RSO ၊ ARAအပါအဝင် Rohingya Islami Mahaaz (Arakan) အဖွဲ့တွေ နဲ့ စစ်ကောင်စီက သင်တန်းပေးပြီး လက်နက်တပ်ဆင်ပေးထားတဲ့ အစ္စာလာမ်မစ် စစ်သွေးကြွ လက်နက်ကိုင်တွေဟာ မောင်တောမြို့ကို အာရက္ခတပ်တော်က ထိုးစစ်ဆင်ချိန်မှာလည်း စစ်ကောင်စီဘက်ကနေ တိုက်ခိုက်ပေးတာတွေရှိခဲ့တယ်လို့လည်း မောင်တောဒေသခံတွေက ဆိုပါတယ်။

မောင်တောကို အာရက္ခတပ်တော် အေအေက ၂၀၂၄ ခုနှစ်၊ ဒီဇင်ဘာလ (၈) နေ့မှာစစ်ကောင်စီလက်ကနေ အပြီးသတ်သိမ်းပိုက်ရရှိခဲ့သလို ရာချီတဲ့ စစ်သုံးပန်း အပါအဝင် စစ်ကောင်စီ အရဲ့ အရာရှိတချို့ကိုပါ လက်ရအရှင်ဖမ်းဆီးရမိခဲ့တာတွေ ရှိခဲ့ပါတယ်။

အဲဒီနောက်မှာ မောင်တောအထဲမှာ ရှိနေတဲ့ အကြမ်းဖက် မွတ်ဆလင်လက်နက်ကိုင်တွေဟာ အာရက္ခတပ်တော်ရဲ့ လုံခြုံရေးတပ်ဖွဲ့ဝင်တွေ နဲ့ အရပ်သားပြည်သူတွေကို ခြုံခိုတိုက်ခိုက်တာ ပြန်ပေးဆွေးတာတွေကိုလည်း ဆက်တိုက်လုပ်ဆောင်တာတွေ ရှိတာကြောင့် မောင်တော – တောင်ပြိုဘက်ခြမ်းက လမ်းကြောင်းတွေကို အာရက္ခတပ်တော်က ပိတ်ထားတဲ့ အနေအထားထိရှိခဲ့တယ်လို့ မောင်တော ဒေသခံက ဆိုပါတယ်။

“တပ်တော်ဖက်ကလည်း အဲဒီဖက်လမ်းကြောင်းတွေကို ပိတ်ထားတယ်။ ထိတွေ့ တိုက်ပွဲဖြစ်တာတော့မရှိဘူး ဒါပေမယ့် တပ်တော်က လုံခြုံရေးအဖွဲ့တွေကိုတော့ ခြုံခိုတိုက်ခိုက်တာတွေတော့ ရှိတယ်”လို့ မောင်တော ဒေသခံက ပြောပါတယ်။

ARSAအဖွဲ့ဟာ ပြီးခဲ့တဲ့ ၂၀၂၄ခုနှစ်၊ ဒီဇင်ဘာလ ၂၄ရက်နေ့တုန်းကလည်း မောင်တောမြို့၊ ကြိမ်ချောင်းဘက်ကနေ တောင်ပြိုဘက်ကို ဈေးသွားဝယ်တဲ့ အရပ်ဘက်ခရီးသည်ကား ၁စီးကို ခြိုခိုက်တိုက်ခိုက်ခဲ့ပါသေးတယ်။ အဲ့ဒီတိုက်ခိုက်မှုကြောင့် ကားပေါ်ပါ အမျိုးသမီးတွေထဲက ၁ ဦးသေဆုံးခဲ့ပြီး အများအပြား‌ဒဏ်ရာရခဲ့တယ်လို့ သိရပါတယ်။

လက်ရှိ မောင်တော ဒေသမှာ RSO၊ ARSA၊ ARA နဲ့ Rohingya Islami Mahaaz (Arakan) အဖွဲ့တွေဟာ ထိန်းချုပ်နယ်မြေမရှိပေမယ့် သူတို့ကို ထောက်ခံတဲ့ မွတ်ဆလင်(ဘင်္ဂလီ)တွေကြားကနေ လှုပ်ရှားနေတာဖြစ်ပြီး၊ မောင်တော – တောင်ပြိုဘက်ခြမ်းမှာ အများဆုံးလှုပ်ရှားတာတွေ့ရတယ်လို့လည်း မောင်တောဒေသခံတွေက ပြောပါတယ်။

ဒီအရက်ပိုင်းအတွင်းမှာလည်း အကြမ်းဖက်လက်နက်ကိုင် အစ္စာလာမ်မစ် စစ်သွေးကြွ အဖွဲ့တွေ ဖြစ်ကြတဲ့ RSO၊ ARSA၊ ARA နဲ့ Rohingya Islami Mahaaz (Arakan) အဖွဲ့တွေဟာ အာရက္ခတပ်တော်(AA)ကို တိုက်ခိုက်ဖို့အတွက် Four Brothers Alliance အဖြစ် အဖွဲ့ ၄ ဖွဲ့ ပူးပေါင်းလိုက်ပြီဖြစ်တယ်လို့လည်း ထုတ်ပြန် ကြေညာခဲ့ပါသေးတယ်။

အကြမ်းဖက်လက်နက်ကိုင် အစ္စာလာမ်မစ် စစ်သွေးကြွ အဖွဲ့တွေ ဖြစ်ကြတဲ့ RSO၊ ARSA၊ ARA နဲ့ Rohingya Islami Mahaaz (Arakan) အဖွဲ့တွေဟာ အရင်တုန်းက စစ်ကောင်စီတပ်တွေကို တိုက်ခိုက်ဖို့ ရည်ရွယ်ချက်ထားခဲ့ပေမယ့် လက်ရှိ မောင်တော နဲ့ ဘူးသီးတောင်မြို့တွေမှာ စစ်ကောင်စီတပ်ဖွဲ့ဝင်တွေ မရှိတော့တဲ့ အတွက် အာရက္ခတပ်တော်ကို ဦးတည်တိုက်ခိုက်လာနေတာလည်း ဖြစ်ပါတယ်။

CNA၊လင်းလင်း