ကုလားတန်မြစ်ဆုံစီမံကိန်းအတွက် အိန္ဒိယအဆင့်မြင့်လုံခြုံရေးအရာရှိတွေ အာရက္ခတပ်တော်နဲ့ တွေ့ဆုံ

ကုလားတန်မြစ်ဆုံစီမံကိန်းကို အကာကွယ်ပေးဖို့အတွက် အိန္ဒိယအဆင့်မြင့်လုံခြုံရေးအရာရှိတွေဟာ အာရက္ခတပ်တော်(AA)နဲ့ တွေ့ဆုံခဲ့တယ်လို့ အိန္ဒိယသတင်းဌာနတွေရဲ့ ဖော်ပြချက်တွေအရ သိရပါတယ်။

မြန်မာနိုင်ငံအတွင်းက အိန္ဒိယရဲ့ အကျိုးစီးပွားတွေကို လုံခြုံစေဖို့အတွက် ULA/AAနဲ့ ဆက်ဆံရေး ပြန်လည်တည်ဆောက်နိုင်ဖို့ ရည်ရွယ်ပြီးတွေ့ဆုံခဲ့တာဖြစ်သလို၊ အိန္ဒိယ နဲ့ မြန်မာနိုင်ငံအကြား ချိတ်ဆက်လုပ်ဆောင်မယ့် အရေးကြီးတဲ့ ကုလားတန်ဘက်စုံ သယ်ယူပို့ဆောင်ရေး စီမံကိန်း (KMMTTP) အတွက်တွေ့ဆုံခဲ့ကြတာ ဖြစ်တယ်လို့ ဆိုပါတယ်။

အိန္ဒိယဟာ ဘင်္ဂလားဒေ့ရှ်၊ မြန်မာ၊ တရုတ်၊ ကမ္ဘောဒီးယား၊ လာအိုနဲ့ ထိုင်းနိုင်ငံတို့က ကိုယ်စားလှယ်တွေနဲ့ တွေ့ဆုံပြီးနောက်ပိုင်း ရက် သတ္တပတ်အကြာမှာဘဲ အာရက္ခတပ်တော်နဲ့ တွေ့ဆုံတာတွေရှိခဲ့တယ်လို့ လည်း Northeast News သတင်းဌာနမှာ ဖော်ပြထားပါတယ်။

အာရက္ခတပ်တော်နဲ့ တွေ့ဆုံမှုဟာ အိန္ဒိယရဲ့ ကုလားတန်စီမံကိန်း အောင်မြင်နိုင်ဖို့အတွက် ဆက်လက်ကြိုးပမ်းမှုကို ထင်ဟတ်စေပြီး၊ အဲ့ဒီစီမံကိန်းကနေ အိန္ဒိယနဲ့ မြန်မာကြား ကုန်သွယ်မှုနဲ့ဒေသတွင်း ပူးပေါင်းဆောင်ရွက်မှုတွေ လွယ်ကူချောမွေ့စေဖို့ ရည်ရွယ်ထားတယ်လို့ ဆိုပါတယ်။

ရခိုင်ပြည်နယ်အတွင်းက မောင်တောအပါအဝင် မြို့နယ် ၁၄ မြို့နယ်ကို သိမ်းပိုက်ထားတဲ့ အာရက္ခတပ်တော်ဟာ၊ မောင်တောမြို့ကို စစ်ကောင်စီလက်ထဲကနေ အပြီးသတ် သိမ်းပိုက်ရရှိပြီးနောက်ပိုင်း အိမ်နီးချင်းနိုင်ငံတွေဟာ အာရက္ခတပ်တော်ရဲ့ သြဇာကြီးထွားလာမှုအပေါ် ကို အသိမှတ်ပြုလာတာတွေ့ရတယ်လို့လည်း အိန္ဒိယသတင်းဌာနတွေက ဖော်ပြပါတယ်။

တဖက်မှာလည်း အာရက္ခတပ်တော်ရဲ့ မြို့သိမ်းတိုက်ပွဲတွေကြောင့် ကုလားတန်မြစ်ကြောင်း စီမံကိန်းရဲ့ လမ်းပိုင်း ဖောက်လုပ်မှုတွေ ရပ်တန့်သွားခဲ့ရပြီး ဒေသတွင်း အိန္ဒိယရဲ့ မဟာဗျူဟာ ရည်မှန်းချက်အတွက် သိသာထင်ရှားတဲ့ စိန်ခေါ်မှုတစ်ရပ် ဖြစ်လာခဲ့တယ်လို့ ဆိုပါတယ်။

ရခိုင်ပြည်နယ်အတွင်းက အဓိကကျတဲ့ ဆိပ်ကမ်း မြို့တွေမှာ မြန်မာစစ်ကောင်စီရဲ့ နယ်မြေထိန်းချုပ်မှုရှိနေသေးပေမယ့်၊ အိန္ဒိယလုံခြုံရေးအဖွဲ့တွေဟာ အာရက္ခတပ်တော်နဲ့ တည်ငြိမ်တဲ့ ဆက်ဆံရေးကို လုပ်ဆောင်ခဲ့တယ်လို့လည်း အိန္ဒိယသတင်းဌာနတွေက ဖော်ပြထားပါတယ်။

ရခိုင်ပြည်နယ်အတွင်းမှာ စစ်ကောင်စီဟာ စစ်တွေ၊ ကျောက်ဖြူနဲ့ မန်အောင်မြို့တို့ကို ထိန်းချုပ်ထားဆဲဖြစ်ပါတယ်။