မြန်မာနိုင်ငံအတွင်းမှာ ၂၀၂၅ခုနှစ်အတွင်း လူသားချင်းစာနာမှုဆိုင်ရာအကူအညီလိုအပ်ချက်ဟာ အာဏာသိမ်းပြီးအချိန်ကထက် အဆ ၂၀ကျော် ပိုမိုလိုအပ်လာတယ်လို့ နိုင်ငံတကာကထုတ်ပြန်လာပါတယ်။
စစ်တပ်အာဏာသိမ်းမှု လေးနှစ်ပြည့်တဲ့အပေါ် သြစတြေးလျ၊ ကနေဒါ၊ ဥရောပသမဂ္ဂ၊ ကိုရီးယားသမ္မတနိုင်ငံ၊ နယူးဇီလန်၊ နော်ဝေး၊ ဆွစ်ဇာလန်၊ ယူကေနဲ့ အမေရိကန်ပြည်ထောင်စုတို့ရဲ့ ပူးတွဲထုတ်ပြန်ချက်ထဲမှာ ဖော်ပြထားတာပါ။
နိုင်ငံလူဦးရေရဲ့ သုံးပုံတစ်ပုံ သို့မဟုတ် ၁၉.၉ သန်းကျော်ဟာ လူသားချင်းစာနာမှုဆိုင်ရာ အခြေခံအထောက်အပံ့တွေလိုအပ်နေပြီး ခန့် မှန်းခြေ ၁၅.၂ သန်းမျှသော ပြည်သူတွေဟာ စားနပ်ရိက္ခာထောက်ပံ့မှုကို လိုအပ်နေတယ်လို့ ဆိုပါတယ်။
ပဋိပက္ခတွေကြောင့် နေရပ်စွန့်ခွာခဲ့ရတဲ့ ပြည်သူအရေအတွက်ဟာလည်း ယမန်နှစ်ကထက် ၁ သန်းနီးပါးတိုးမြင့်လာခဲ့ပြီး မြန်မာနိုင်ငံနယ်နိမိတ်တွေကို ဖြတ်ကျော်တိမ်းရှောင်ထွက်ပြေးခဲ့ရတဲ့ ပြည်သူအမြောက်အမြားရှိနေတယ်လို့ ဖော်ပြထားပါတယ်။
မြန်မာစစ်အာဏာရှင်တွေဟာ လူ့အခွင့်အရေးချိုးဖောက်မှုတွေ၊ လိင်ပိုင်းဆိုင်ရာနဲ့ ကျား/မအခြေပြုအကြမ်းဖက်မှုတွေ၊ ဘာသာရေးနဲ့ တိုင်းရင်းသားလူနည်းစုတွေအပေါ် စနစ်တကျ နှိပ်ကွပ်မှုနဲ့ ခွဲခြားဆက်ဆံမှုတွေအပါအဝင် အကြမ်းဖက်မှုတွေ အရှိန်မြှင့်ဆောင်ရွက်နေတဲ့အပေါ် အပြင်းထန်ဆုံး ပြစ်တင်ရှုတ်ချတယ်လို့လည်း ထုတ်ပြန်ထားပါတယ်။
အကြမ်းဖက်မှုတွေကို ချက်ချင်းလျှော့ချဖို့နဲ့ နိုင်ငံတစ်ဝန်းကိုလူသားချင်းစာနာမှုဆိုင်ရာအကူအညီတွေ အတားအဆီးမရှိ အပြည့်အဝ ဘေးကင်းလုံခြုံစွာပေးအပ်နိုင်စေဖို့ မြန်မာစစ်တပ်ကိုတောင်းဆိုတယ်လို့လည်း ဖော်ပြထားပါတယ်။
ဒါ့အပြင် အကြမ်းဖက်မှုတွေကို အဆုံးသတ်ဖို့၊ မတရားဖမ်းဆီးထိန်းသိမ်းထားတဲ့ နိုင်ငံရေးအကျဉ်းသားတွေအားလုံးကို လွှတ်ပေးဖို့နဲ့ စစ်မှန်ပြီး အားလုံးပါဝင်တဲ့ တွေ့ဆုံဆွေးနွေးမှုတွေပြုလုပ်ဖို့လည်း မြန်မာစစ်အာဏာရှင်တွေကို တိုက်တွန်းထားပါသေးတယ်။
နိုင်ငံတကာအနေနဲ့လည်း မြန်မာပြည်သူတွေနဲ့အတူ တသားတည်း ဆက်လက် ရပ်တည်သွားမှာဖြစ်ပြီး၊ အားလုံးပါဝင်ပြီး ငြိမ်းချမ်းသာယာဝပြောတဲ့ အနာဂတ်ဖြစ်ပေါ်လာရေးကို ဆက်လက် အားပေးထောက်ခံသွားမယ်လို့လည်း ထုတ်ပြန်ထားပါတယ်။
